Օրենք
ԻՆՏԵՐՆԵՏՈՎ ՀՐԱՊԱՐԱԿԱՅԻՆ ԵՎ ԱՆՀԱՏԱԿԱՆ ԾԱՆՈՒՑՄԱՆ ՄԱՍԻՆ
Գլուխ 0 (All Articles)
Հոդված 1.
1. Սույն օրենքը կարգավորում է Հայաստանի Հանրապետության օրենսդրությամբ
նախատեսված դեպքերում հրապարակային եւ անհատական ծանուցման` ինտերնետով
իրականացման կարգն ու պայմանները:
Հոդված 2.
1. Սույն օրենքում օգտագործվում են հետեւյալ հիմնական հասկացությունները.
1) անհատական ծանուցում` անձին առձեռն, պաշտոնական էլեկտրոնային
փոստով, փոստային կամ կապի այլ միջոցով տրամադրման ենթակա տեղեկատվություն.
2) հրապարակային ծանուցում՝ տեղեկատվություն պարունակող հայտարարություն.
3) հրապարակային ծանուցում հրապարակող անձ՝ հրապարակային ծանուցումը
հրապարակման լիազորություն ունեցող ֆիզիկական կամ իրավաբանական անձ, պետական
կամ տեղական ինքնակառավարման մարմին (այսուհետ՝ հրապարակող անձ).
4) Հայաստանի Հանրապետության հրապարակային ծանուցումների պաշտոնական
ինտերնետային կայք՝ համացանցի http://www.azdarar.am/ հասցեում գտնվող կայք (այսուհետ՝
կայք).
5) տպագրական նիշ` ցանկացած առանձին տառ, թիվ, կետադրական նշան կամ այլ նշան,
բացառությամբ բացատների.
6) կայքը վարող անձ՝ Հայաստանի Հանրապետության հրապարակային ծանուցումների
պաշտոնական ինտերնետային կայքի ադմինիստրատոր կամ մոդերատոր.
7) պաշտոնական էլեկտրոնային փոստ՝
ա. ֆիզիկական անձի դեպքում՝ անձին նույնականացման քարտի կամ հանրային
ծառայության համարանիշի հետ մեկտեղ Հայաստանի Հանրապետության կառավարության
սահմանած կարգով տրված էլեկտրոնային փոստը,
բ. իրավաբանական անձի դեպքում՝ իրավաբանական անձանց պետական գրանցման
գրանցամատյանում գրառված էլեկտրոնային փոստը,
գ. պետական կամ տեղական ինքնակառավարման մարմնի դեպքում՝ պետական կամ
տեղական ինքնակառավարման մարմնի պաշտոնական ինտերնետային կայքում
մատնանշված էլեկտրոնային փոստը:
(2-րդ հոդվածը լրաց. 05.12.13 ՀՕ-114-Ն, 25.10.17 ՀՕ-176-Ն, 08.12.22 ՀՕ-511-Ն)
Հոդված 3.
1. Օրենքով կամ նորմատիվ իրավական այլ ակտով սահմանված այն դեպքերում, երբ
նախատեսվում է հրապարակային ծանուցում` տեղեկատվությունը մամուլում հրապարակելու
միջոցով, հրապարակային ծանուցումը պետք է տեղադրվի նաեւ կայքում:
Հոդված 4.
1. Կայքի վարման եւ տեխնիկական սպասարկման ծառայությունները մատուցում է
Հայաստանի Հանրապետության արդարադատության նախարարությունը:
Հոդված 5.
1. Հրապարակող անձը հրապարակային ծանուցման տեքստը Հայաստանի
Հանրապետության կառավարության սահմանած էլեկտրոնային ձեւաչափով ներկայացնում է
Հայաստանի Հանրապետության արդարադատության նախարարության իրավաբանական
անձանց պետական ռեգիստրի գործակալություն (այսուհետ՝ գործակալություն):
2. Օրենքով կամ այլ նորմատիվ իրավական ակտերով հրապարակային ծանուցման
հրապարակման համար ժամկետ սահմանված լինելու դեպքում հրապարակային ծանուցման
տեքստը պետք է ներկայացվի գործակալություն սահմանված ժամկետից առնվազն մեկ օր
առաջ:
3. Հրապարակային ծանուցումը պետք է ներկայացնի այն հրապարակելու լիազորություն
ունեցող անձը կամ նրա լիազորած անձը:
4. Հրապարակային ծանուցման բովանդակության համար պատասխանատու է այն
հրապարակող անձը: Հրապարակային ծանուցումը ենթակա չէ հրապարակման, եթե օրենքով
արգելված է նման բովանդակությամբ ծանուցման հրապարակումը:
5. Հրապարակային ծանուցման ներկայացման եւ կայքը վարող անձին փոխանցելու կարգը
սահմանում է Հայաստանի Հանրապետության կառավարությունը:
6. Հրապարակային ծանուցումը պետք է շարադրված լինի Հայաստանի Հանրապետության
պաշտոնական լեզվով՝ գրական հայերենով:
7. Տեքստը պետք է գրված լինի պարզ եւ հստակ: Արգելվում է կատարել բառերի կամ
տերմինների անհարկի կրճատումներ, օգտագործել բարոյականության սկզբունքներին
հակասող բառեր: Թույլատրվում է բառերի կամ տերմինների համընդհանուր օգտագործման
հապավումների օգտագործում:
8. Հրապարակային ծանուցման անհամապատասխանություն հայտնաբերելու դեպքում
կայքը վարող անձը պարտավոր է ինքնուրույն ուղղել այն սխալները եւ վրիպակները, որոնց
ուղղման դեպքում չի արատավորվի հրապարակային ծանուցման բովանդակությունը, եւ այդ
մասին պարտավոր է մեկօրյա ժամկետում էլեկտրոնային փոստի միջոցով տեղեկացնել
հրապարակային ծանուցում հրապարակող անձին:
(5-րդ հոդվածը փոփ. 21.01.20 ՀՕ-58-Ն)
Հոդված 6.
1. Կայքը վարող անձը հրապարակային ծանուցումը ստանալու պահից երկու
աշխատանքային օրվա ընթացքում հրապարակային ծանուցման տեքստը տեղադրում է
կայքում:
2. Հայաստանի Հանրապետության պետական կառավարման եւ տեղական
ինքնակառավարման մարմինների կողմից, ինչպես նաեւ նոտարի կողմից գումարի
բռնագանձման պահանջով կարգադրություն արձակվելու նոտարական գործողության
ընթացքում հրապարակվող հրապարակային ծանուցումը հրապարակվում է կայքում
անմիջապես այն ստանալու պահից:
3. Կայքում հրապարակային ծանուցումների տեղադրման կարգը սահմանում է
Հայաստանի Հանրապետության կառավարությունը:
(6-րդ հոդվածը լրաց. 26.06.23 ՀՕ-232-Ն)
Հոդված 7.
1. Կայքում հրապարակային ծանուցման տեղադրման համար մատուցվող ծառայության
համար պետական բյուջե գանձվում է վճար սույն օրենքով սահմանված դրույքաչափերի
սահմաններում:
2. Հրապարակող անձը, բացառությամբ սույն օրենքի 6-րդ հոդվածի 2-րդ մասով
նախատեսված մարմինների կամ սույն օրենքի 3-րդ հոդվածով նախատեսված դեպքերի,
պարտավոր է վճարել սույն օրենքով սահմանված վճարը:
(7-րդ հոդվածը խմբ. 20.12.17 ՀՕ-25-Ն, 14.11.19 ՀՕ-231-Ն)
Հոդված 8.
1. Հրապարակային ծանուցման վճարը սահմանվում է ըստ տպագրական նիշի` մեկ
տպագրական նիշի համար` 10 դրամ:
2. Գործում են հրապարակային ծանուցման նվազագույն եւ առավելագույն վճարման
չափեր: Նվազագույն վճարման չափը կազմում է 2000 դրամ, իսկ առավելագույնը` 100.000
դրամ:
3. «Հասարակական կազմակերպությունների մասին» Հայաստանի Հանրապետության
օրենքով նախատեսված հաշվետվության հրապարակման համար վճարի չափը չի կարող
գերազանցել 5000 դրամը:
(8-րդ հոդվածը լրաց. 16.12.16 ՀՕ-29-Ն)
Հոդված 9.
1. Կայքում տեղադրված հրապարակային ծանուցմանը անձը կարող է ծանոթանալ
առանցքային բառերի ներմուծմամբ կայքում որոնում իրականացնելու միջոցով:
2. Կայքում տեղադրված հրապարակային ծանուցումն անձը կարող է ստանալ նաեւ
էլեկտրոնային փոստով` կայքում անվճար բաժանորդագրվելու միջոցով:
3. Հրապարակային ծանուցումների մասին տեղեկությունը տրամադրվում է անվճար
հիմունքներով:
4. Կայքում տեղեկատվության արխիվացման ժամկետը սահմանում է Հայաստանի
Հանրապետության կառավարությունը:
Հոդված 10.
1. Օրենքով կամ ենթաօրենսդրական նորմատիվ իրավական ակտով սահմանված այն
դեպքերում, երբ նախատեսվում է անհատական ծանուցում, անձը համարվում է պատշաճ
ծանուցված նաեւ այն դեպքում, երբ տեղեկատվությունն ուղարկվել է նրա պաշտոնական
էլեկտրոնային փոստի հասցեով, եւ առկա է այն կարդալու մասին էլեկտրոնային հավաստում:
2. Կողմերի համաձայնությամբ սահմանված դեպքերում անձը համարվում է պատշաճ
ծանուցված նաեւ այն դեպքում, երբ սույն հոդվածի 1-ին մասով նախատեսված
տեղեկատվությունն ուղարկվել է ծանուցվող անձի պաշտոնական էլեկտրոնային փոստի
հասցեով, եւ առկա է այն ստանալու մասին էլեկտրոնային հավաստում, եթե նույնիսկ
բացակայում է այն կարդալու մասին էլեկտրոնային հավաստումը: Սույն մասով նախատեսված
դեպքում անձը պատշաճ ծանուցված է համարվում ծանուցումն ստանալուն հաջորդող
հինգերորդ օրվանից:
3. Եթե սույն հոդվածի 1-ին մասին համապատասխան՝ ծանուցումն ուղարկած անձը կամ
մարմինը հնգօրյա ժամկետում չի ստանում ծանուցումը կարդալու մասին էլեկտրոնային
հավաստում, կամ ծանուցվող անձը մասնակի կամ ամբողջությամբ չի կատարում
ծանուցմամբ պահանջվող գործողությունը, ապա ծանուցումը եւս մեկ անգամ ուղարկվում է
ծանուցվող անձի պաշտոնական էլեկտրոնային փոստի հասցեով, իսկ դա ուղարկելուց հետո՝
հնգօրյա ժամկետում, այն կարդալու մասին էլեկտրոնային հավաստում չստանալու կամ
ծանուցմամբ պահանջվող գործողության ամբողջական կամ մասնակի կատարում կրկին
չլինելու դեպքում ծանուցումն ուղարկվում է փոստային կապի միջոցով՝ պատվիրված
նամակով՝ ծանուցումն ստացող ֆիզիկական անձի դեպքում՝ բնակչության պետական
ռեգիստրում հաշվառված հասցեով, իսկ իրավաբանական անձանց դեպքում՝ գտնվելու վայրի
փոստային հասցեով:
4. Բացառությամբ սույն հոդվածի 1-ին եւ 2-րդ մասերում նշված դեպքերի, անձը համարվում
է պատշաճ ծանուցված ծանուցողի կողմից սույն հոդվածի 3-րդ մասով սահմանված
գործողությունները կատարվելուց հետո ծանուցումը եւս մեկ անգամ ծանուցվող անձի
պաշտոնական էլեկտրոնային փոստի հասցեով ուղարկելու եւ Հայաստանի Հանրապետության
հրապարակային ծանուցումների պաշտոնական ինտերնետային կայքում անհատական
ծանուցման առկայության վերաբերյալ ծանուցում հրապարակելուց հետո՝ տասներորդ օրը:
5. Բնակչության պետական ռեգիստրի տվյալների համաձայն՝ նույնականացման քարտ
չունեցող ֆիզիկական անձանց կամ պաշտոնական էլեկտրոնային փոստ չունեցող
իրավաբանական անձանց անհատական ծանուցումը կատարվում է օրենքով սահմանված
կարգով:
(10-րդ հոդվածը խմբ. 05.12.13 ՀՕ-114-Ն, 25.10.17 ՀՕ-176-Ն)
Հայաստանի Հանրապետության
ՆախագահՌ. Քոչարյան
2007 թ. մայիսի 4
Երեւան
ՀՕ-172-Ն
Փոփոխման պատմություն
Փոփոխող ակտՀամապատասխան ինկորպորացիան
26.06.2023, ՀՕ-232-Ն11.12.2023, ՀՕ-172-Ն
08.12.2022, ՀՕ-511-Ն30.12.2022, ՀՕ-172-Ն
21.01.2020, ՀՕ-58-Ն22.02.2020, ՀՕ-172-Ն
14.11.2019, ՀՕ-231-Ն21.12.2019, ՀՕ-172-Ն
25.10.2017, ՀՕ-176-Ն01.04.2018, ՀՕ-172-Ն
20.12.2017, ՀՕ-25-Ն18.01.2018, ՀՕ-172-Ն
16.12.2016, ՀՕ-29-Ն04.02.2017, ՀՕ-172-Ն
05.12.2013, ՀՕ-114-Ն30.12.2013, ՀՕ-172-Ն
19.03.2012, ՀՕ-129-Ն05.05.2012, ՀՕ-172-Ն
17.11.2009, ՀՕ-204-Ն01.01.2010, ՀՕ-172-Ն
22.10.2008, ՀՕ-181-Ն06.12.2008, ՀՕ-172-Ն
Փոփոխված ակտ
Փոփոխող ակտՀամապատասխան ինկորպորացիան
Выберите статью в документе для работы с ней