Հոդված 1.Օրենքի կարգավորման առարկան 1. Սույն օրենքը սահմանում է Երեւան քաղաքում (այսուհետ` Երեւան) տեղական ինքնակառավարման, տարածքային կառավարման եւ տեղական ինքնակառավարման մարմինների ձեւավորման առանձնահատկությունները:

Հոդված 2.Երեւանի իրավական կարգավիճակը 1. Երեւանը համայնք է` Երեւանի բնակչության հանրություն: 2. Երեւանը Հայաստանի Հանրապետության մայրաքաղաքն է: 3. Երեւանը հանրային իրավունքի իրավաբանական անձ է, ունի սեփականության իրավունք եւ գույքային այլ իրավունքներ: 4. Երեւանն ունի բյուջե, ինչպես նաեւ Հայաստանի Հանրապետության զինանշանի պատկերով եւ իր անվանմամբ կնիք: (2-րդ հոդվածը լրաց. 04.10.17 ՀՕ-137-Ն)

Հոդված 3.Երեւանի տեղական ինքնակառավարման հիմնական սկզբունքները 1. Երեւանում տեղական ինքնակառավարումը հիմնվում է «Տեղական ինքնակառավարման մասին» Հայաստանի Հանրապետության օրենքով սահմանված սկզբունքների վրա` ապահովելով Երեւանի բոլոր վարչական շրջանների համաչափ զարգացումը:

Հոդված 4.Երեւանի վարչական սահմանները 1. Երեւանի վարչական սահմանները սահմանվում են «Հայաստանի Հանրապետության վարչատարածքային բաժանման մասին» Հայաստանի Հանրապետության օրենքով:

Հոդված 5.Երեւանի տեղական ինքնակառավարման մարմինները 1. Երեւանի տեղական ինքնակառավարման մարմիններն են` 1) Երեւանի ավագանին (այսուհետ` ավագանի). 2) Երեւանի քաղաքապետը (այսուհետ` քաղաքապետ):

Հոդված 6.Երեւանում տեղական ինքնակառավարման իրավական հիմքերը 1. Երեւանում տեղական ինքնակառավարման մարմինների լիազորությունները սահմանվում են սույն օրենքով եւ այլ օրենքներով: 2. Երեւանում տեղական ինքնակառավարման հետ կապված` սույն օրենքով չկարգավորվող հարաբերությունները կարգավորվում են «Տեղական ինքնակառավարման մասին» Հայաստանի Հանրապետության օրենքով այնքանով, որքանով դրանք չեն հակասում սույն օրենքին: (6-րդ հոդվածը լրաց. 04.10.17 ՀՕ-137-Ն)

Հոդված 7.Երեւանի տեղական ինքնակառավարման մարմինների նստավայրը 1. Երեւանի տեղական ինքնակառավարման մարմինները` ավագանին եւ քաղաքապետը, գործում են իրենց նստավայրում` Արգիշտիի փողոց 1 հասցեում: 2. Ավագանու որոշմամբ ավագանին իր գործունեությունը (ներառյալ` նիստերի անցկացումը) կարող է կազմակերպել այլ վայրում:

Հոդված 8.Երեւանի պաշտոնական համացանցային կայքը 1. Երեւանի պաշտոնական համացանցային կայքն է` www.yerevan.am:

Հոդված 9.Տարածքային կառավարումը Երեւանում 1. Տարածքային կառավարումը Երեւանում իրականացնում է Հայաստանի Հանրապետության կառավարության կողմից լիազորված մարմինը: Հայաստանի Հանրապետության այլ օրենքներով, իրավական ակտերով մարզպետներին վերապահված լիազորություններն իրականացնում է Հայաստանի Հանրապետության կառավարության կողմից լիազորված մարմինն այնքանով, որքանով դրանք չեն հակասում սույն օրենքին։ 2. Կառավարության որոշմամբ Երեւանում տարածքային կառավարման որոշակի գործառույթներ կարող են փոխանցվել պետական կառավարման համակարգի այլ մարմինների։ 3. Երեւանում տարածքային կառավարման առանձնահատկությունները սահմանվում են սույն օրենքով: (9-րդ հոդվածը փոփ., լրաց. 04.10.17 ՀՕ-137-Ն, փոփ. 21.01.20 ՀՕ-25-Ն)

Հոդված 10.Երեւանի խորհրդանիշերը 1. Երեւանի խորհրդանիշերն են` 1) Երեւանի զինանշանը. 2) Երեւանի դրոշը. 3) Երեւանի օրհներգը: 2. Երեւանի զինանշանի եւ դրոշի նկարագրությունը, ինչպես նաեւ Երեւանի օրհներգը սահմանում է ավագանին: 3. Ավագանու, քաղաքապետի նստավայրի շենքի վրա, ավագանու նիստերի դահլիճում եւ քաղաքապետի աշխատասենյակում տեղադրվում են Երեւանի դրոշն ու զինանշանը: 4. Ավագանու, քաղաքապետի, ինչպես նաեւ Երեւանին ենթակա կազմակերպությունների կողմից Երեւանի խորհրդանիշերի պարտադիր օգտագործման այլ դեպքերը եւ կարգը սահմանում է ավագանին:

Հոդված 11.Ավագանու իրավական կարգավիճակը 1. Ավագանին Երեւանում տեղական ինքնակառավարման բարձրագույն մարմին է, որը վերահսկողություն է իրականացնում քաղաքապետի գործունեության նկատմամբ: 2. Ավագանին Հայաստանի Հանրապետության Սահմանադրությամբ եւ օրենքով իր լիազորություններն իրականացնելիս անկախ է եւ գործում է միայն ի շահ Երեւանի եւ նրա անունից:

Հոդված 12.Ավագանու լիազորությունները 1. Ավագանին` 1) ընդունում է իր կանոնակարգը. 2) սույն օրենքով սահմանված դեպքերում եւ կարգով ընտրում է քաղաքապետին. 3) սույն օրենքով սահմանված կարգով որոշում է ընդունում քաղաքապետին անվստահություն հայտնելու վերաբերյալ. 4) քաղաքապետի ներկայացմամբ որոշում է ընդունում Երեւանի քաղաքապետարանի (այսուհետ` քաղաքապետարան) եւ վարչական շրջանի ղեկավարի աշխատակազմերի կանոնադրության, կառուցվածքի եւ հաստիքացուցակի վերաբերյալ. 5) որոշում է ընդունում քաղաքապետի, նրա տեղակալների, խորհրդականների, օգնականների, մամուլի քարտուղարի, քաղաքապետարանի աշխատակազմի աշխատակիցների, վարչական շրջանների ղեկավարների, ղեկավարների տեղակալների, վարչական շրջանի ղեկավարի աշխատակազմերի աշխատակիցների պաշտոնային դրույքաչափերի վերաբերյալ: Քաղաքապետի պաշտոնային դրույքաչափը չի կարող գերազանցել Ազգային ժողովի պատգամավորի պաշտոնային դրույքաչափի կրկնակին. 6) օրենքով նախատեսված դրույքաչափերի սահմաններում սահմանում է տեղական հարկեր եւ տուրքեր, համայնքի մատուցած ծառայությունների դիմաց սահմանում է վճարներ (ներառյալ` վարչական շրջանի ղեկավարի կողմից կառավարվող բազմաբնակարան շենքերի պահպանման նպատակով պարտադիր նորմերի շրջանակներում իրականացվող աշխատանքների համար անհրաժեշտ վճարներ): Նշված լիազորության իրականացման ընթացքում ավագանին կարող է առաջնորդվել գոտիավորման սկզբունքով, ընդ որում` տարբեր հարկերի, տուրքերի, վճարների համար կարող են սահմանվել տարբեր գոտիավորումներ. 7) որոշում է ընդունում Երեւանի սեփականություն համարվող գույքի կառավարման կարգի վերաբերյալ. 8) սահմանում է Երեւանի վարչական սահմաններում գտնվող անշարժ գույքի սեփականատիրոջ կամ տիրապետողի՝ իր տիրապետման տակ գտնվող անշարժ գույքի եւ դրան հարակից ընդհանուր օգտագործման տարածքի պարտադիր բարեկարգման էությունը, ծավալը, պայմանները եւ իրականացման կարգը. 9) որոշում է ընդունում այն մասին, թե որ գույքն է հանձնվում վարչական շրջանների ղեկավարների կառավարմանը. 10) որոշում է ընդունում այն մասին, թե Երեւանի ենթակայության որ կազմակերպություններն են հանձնվում վարչական շրջանների ղեկավարների ենթակայությանը. 11) որոշում է ընդունում Երեւանի զարգացման միամյա, հնգամյա, երկարաժամկետ եւ հատուկ ծրագրերի վերաբերյալ. 12) որոշում է ընդունում վարկերի, փոխատվությունների եւ օրենքով սահմանված կարգով այլ փոխառու միջոցների ներգրավման վերաբերյալ. 13) ի լրումն քաղաքաշինական նորմատիվ-տեխնիկական փաստաթղթերով սահմանված նորմերի` կարող է սահմանել Երեւանում գործող նորմերի իրականացման լրացուցիչ պայմաններ. 14) որոշում է ընդունում Երեւանի ենթակայության կազմակերպությունների ստեղծման, վերակազմակերպման, լուծարման, կանոնադրության կամ դրա փոփոխությունների հաստատման, ինչպես նաեւ այլ կազմակերպություններում Երեւանի մասնակցության եւ այդ մասնակցության դադարեցման մասին. 15) որոշում է ընդունում հիմնարկի կարգավիճակ ունեցող` Երեւանի ենթակայության կազմակերպությունների կառուցվածքի, աշխատակիցների քանակի, հաստիքացուցակի եւ պաշտոնային դրույքաչափերի վերաբերյալ. 16) որոշում է ընդունում Երեւանի միջնաժամկետ ծախսերի ծրագրի, բյուջեի, դրանց փոփոխությունների վերաբերյալ. 17) վերահսկողություն է իրականացնում բյուջեի կատարման նկատմամբ, իրավասու է որոշելու բյուջետային միջոցների նպատակային օգտագործման մանրամասները, վերացնելու բյուջետային միջոցները տնօրինելու վերաբերյալ քաղաքապետի համապատասխան որոշումները, քննարկելու եւ որոշում ընդունելու բյուջեի կատարման մասին քաղաքապետի տարեկան հաշվետվության վերաբերյալ. 18) որոշում է ընդունում Երեւանի սեփականություն հանդիսացող գույքը օգտագործման տրամադրելու եւ օտարման տարեկան ծրագրի (ներառյալ` իրավաբանական անձի կանոնադրական կապիտալում համայնքի մասնակցության) վերաբերյալ, որում պետք է նշվեն օգտագործման տրամադրման կամ օտարման եղանակը, ժամկետները, նպատակը, օգտագործման տրամադրման դեպքում` օգտագործման ժամկետը եւ վճարի չափը, ուղղակի վաճառքի դեպքում` վաճառքի գինը, իսկ հրապարակային սակարկությունների դեպքում` մեկնարկային գինը, ընդ որում` հողամասերի օտարման տարեկան ծրագրի մեջ պետք է նշվեն նաեւ հողամասերի գտնվելու վայրը, ծածկագրերը, Երեւանի գլխավոր հատակագծով սահմանված նպատակները եւ օտարման եղանակները. 19) որոշում է ընդունում Երեւան քաղաքի գլխավոր հատակագծի, դրա փոփոխությունների, ինչպես նաեւ նախագծման առաջադրանքի վերաբերյալ. 20) որոշում է ընդունում Երեւան քաղաքի գլխավոր հատակագծին համապատասխան մշակված` Երեւան քաղաքի առանձին տարածքների գոտիավորման նախագծերի, ինչպես նաեւ նախագծման առաջադրանքի վերաբերյալ. 20.1) որոշում է ընդունում հողամասերի նպատակային նշանակության փոփոխության մասին. 21) քաղաքապետի ներկայացմամբ որոշում է ընդունում այլ քաղաքների եւ այլ վարչատարածքային միավորների հետ համագործակցության մասին պայմանագրերը հաստատելու վերաբերյալ. 22) քաղաքապետի կամ ավագանու անդամների ընդհանուր թվի առնվազն մեկ երրորդի նախաձեռնությամբ ավագանու անդամների ընդհանուր թվի ձայների մեծամասնությամբ ընդունում է տեղական հանրաքվե անցկացնելու մասին որոշում. 23) որոշում է ընդունում Երեւանի փողոցների, պողոտաների, հրապարակների, զբոսայգիների, Երեւանի ենթակայության կրթական, մշակութային եւ այլ կազմակերպությունների անվանակոչման եւ անվանափոխման վերաբերյալ: Բացառիկ դեպքերում նշանավոր որեւէ անհատի անվամբ մինչեւ նրա մահվան հինգ տարին լրանալը անվանակոչում կամ անվանափոխում կատարելու վերաբերյալ կայացնում է որոշում այդ նպատակով անցկացված հանրային լսումների արդյունքների հիման վրա: Մանկապատանեկան մարզական կազմակերպությունների անվանակոչումը եւ անվանափոխումը կատարվում են Հայաստանի Հանրապետության ֆիզիկական կուլտուրայի եւ սպորտի պետական կառավարման լիազորված մարմնի սահմանած կարգի համաձայն. 24) ի լրումն առեւտրի, հասարակական սննդի եւ սպասարկման ոլորտում գործունեության կանոնների` սահմանում է Երեւանում այդ կանոնների կիրառման լրացուցիչ պայմանները, ինչպես նաեւ լրացուցիչ կանոններ. 24.1) սահմանում է Երեւանում առեւտրի եւ ծառայությունների բնագավառում գործունեություն իրականացնող օբյեկտներում, ըստ դրանց գտնվելու վայրերի, առեւտրի եւ ծառայությունների բնագավառում գործունեություն իրականացնող անձանց կողմից լռությունը կամ գիշերային անդորրն ապահովելու ժամերը (22.00-ից մինչեւ 7.00-ն, 23.00-ից մինչեւ 7.00-ն եւ 24.00-ից մինչեւ 7.00-ն). 24.2) սահմանում է մշակութային գործունեության իրականացման նպատակով Երեւան քաղաքի հանրային բացօթյա վայրերի (փողոց, մայթ, հրապարակ, այգի, պուրակ եւ այլն) օգտագործման պայմանները, պահանջները եւ սահմանափակումները. 25) սահմանում է առեւտրի եւ սպասարկման ոլորտի կազմակերպությունների որակավորման աստիճանների չափորոշիչներն ու շնորհման կարգը. 25.1) սահմանում է շրջիկ առեւտրի կետերին ներկայացվող պահանջները, պայմանները, ժամկետները, շրջիկ առեւտրի իրականացման թույլատրելի վայրերը, դրանց տրամադրման (հատկացման) կարգը, պայմանները եւ գործունեության իրականացման ժամերը, ինչպես նաեւ վաճառվող ապրանքների կամ մատուցվող ծառայությունների չթույլատրվող տեսակները. 25.2) սահմանում է շրջիկ առեւտրի կետերը կամ տրանսպորտային միջոցները հատուկ տարածք տեղափոխելու, դրանք այնտեղ հաշվառելու կարգը եւ շրջիկ առեւտրի կետերը կամ տրանսպորտային միջոցները հատուկ տարածք տեղափոխելու եւ պահպանելու համար վճարների չափը. 25.3) սահմանում է Երեւան քաղաքի վարչական տարածքում գտնվող՝ պետության եւ համայնքային սեփականություն հանդիսացող ընդհանուր օգտագործման տարածքներում (փողոցներ, հրապարակներ, զբոսայգիներ եւ այլ տարածքներ) շրջածախ առեւտրի իրականացմանը ներկայացվող պահանջները, պայմանները, շրջածախ առեւտուր իրականացնելու միջոցով վաճառվող ապրանքների տեսակները եւ շրջածախ առեւտրի իրականացման թույլատրելի վայրերը. 26) Հայաստանի Հանրապետությունում ոգելից խմիչքների եւ (կամ) ծխախոտի արտադրանքի վաճառքի կանոններին համապատասխան` որոշում է ընդունում Երեւանում ոգելից խմիչքների եւ ծխախոտի արտադրանքի վաճառքի թույլտվության լրացուցիչ պայմանների վերաբերյալ. 27) որոշում է ընդունում Երեւանում տոնավաճառներ կազմակերպելու, ինչպես նաեւ բացօթյա վաճառք կազմակերպելու լրացուցիչ պայմանների վերաբերյալ. 28) որոշում է ընդունում Երեւանում սահմանափակման ենթակա ծառայության օբյեկտների տեղակայմանը (հեռավորությանը) ներկայացվող պահանջների վերաբերյալ. 29) որոշում է ընդունում Երեւանում գտնվող գերեզմանատների գործունեության եւ դրանց պահպանման աշխատանքների կազմակերպման եւ իրականացման կարգի վերաբերյալ. 29.1) սահմանում է այն շենքերին եւ շինություններին ներկայացվող սահմանափակումները, պահանջները եւ պայմանները, որտեղ իրականացվում են եւ (կամ) մատուցվում են քաղաքացիական հոգեհանգստի (հրաժեշտի) ծիսակատարության ծառայություններ. 30) որոշում է ընդունում Երեւանի ընդհանուր օգտագործման կանաչ տարածքների պահպանման եւ օգտագործման կանոնների վերաբերյալ. 30.1) իրականացնում է «Աղբահանության եւ սանիտարական մաքրման մասին» Հայաստանի Հանրապետության օրենքով նախատեսված այլ լիազորություններ. 31) սահմանում է քաղաքային նշանակության գովազդային գոտին (քարտեզի տեսքով), քաղաքային նշանակության փողոցները, հրապարակները, այգիները. 32) սահմանում է քաղաքային նշանակության քաղաքաշինական գոտին (քարտեզի տեսքով), ինչպես նաեւ այն պայմանները, որոնց պարագայում քաղաքաշինական գործունեությունը թեեւ իրականացվում է քաղաքային նշանակության քաղաքաշինական գոտուց դուրս, սակայն ունի քաղաքային նշանակություն. 33) տեղական ինքնակառավարմանը վերաբերող եւ օրենքով այլ մարմինների լիազորություններին չվերապահված հարցերի վերաբերյալ ընդունում է իրավական ակտեր. 34) որոշում է ընդունում Երեւանի քաղաքաշինական կանոնադրության վերաբերյալ. 35) քաղաքապետի առաջարկությամբ որոշում է ընդունում Հայաստանի Հանրապետության եւ օտարերկրյա քաղաքացիներին Երեւանի պատվավոր քաղաքացու կոչում շնորհելու վերաբերյալ. 36) քաղաքապետի առաջարկությամբ սահմանում է քաղաքապետին եւ վարչական շրջանի ղեկավարին կից հասարակական կարգով գործող խորհրդակցական խորհուրդների կազմավորման եւ գործունեության կարգը, լիազորությունները. 37) քաղաքապետի ներկայացմամբ որոշում է կամավոր խնդիրների լուծման նպատակով սահմանված սեփական լիազորությունների իրականացման կարգը եւ անհրաժեշտ ֆինանսական միջոցները. 38) սահմանում է Երեւանում կենցաղային նշանակության հրագործական III դասի եւ տեխնիկական նշանակության հրագործական արտադրատեսակների կիրառման թույլատրելի վայրերը եւ ժամը. 39) սահմանում է Երեւանում հանրային սննդի ծառայություն մատուցող անձանց՝ տվյալ օբյեկտին հարակից ընդհանուր օգտագործման տարածքներում ամառային (մայիսի 1-ից հոկտեմբերի 31-ը ներառյալ) եւ ձմեռային (նոյեմբերի 1-ից ապրիլի 30-ը ներառյալ) սեզոններին հանրային սննդի ծառայության կազմակերպման համար տարածքի օգտագործման կարգը, պայմաններն ու սահմանափակումները. 40) սահմանում է «Տեղական տուրքերի եւ վճարների մասին» Հայաստանի Հանրապետության օրենքով նախատեսված թույլտվությունների տրամադրման կարգը, բացառությամբ տեղական տուրքերի կամ վճարների այն տեսակների, որոնց թույլտվությունների տրամադրման կարգը սահմանված է օրենքով կամ Հայաստանի Հանրապետության կառավարության որոշումներով. 41) օրինակելի կանոնադրության հիման վրա հաստատում է Երեւանի քաղաքապետի կողմից կամ համագործակցությամբ ստեղծվող երիտասարդական կենտրոնի կանոնադրությունը, ինչպես նաեւ աշխատանքային պլանը: 42) 2. Իրականացնում է սույն օրենքով եւ Հայաստանի Հանրապետության այլ օրենքներով սահմանված այլ լիազորություններ: (12-րդ հոդվածը խմբ., լրաց. 23.06.11 ՀՕ-229-Ն, լրաց. 23.06.11 ՀՕ-239-Ն, լրաց., խմբ. 08.12.11 ՀՕ-345-Ն, խմբ. 08.02.12 ՀՕ-15-Ն, լրաց. 26.02.15 ՀՕ-8-Ն, խմբ., լրաց., փոփ. 04.10.17 ՀՕ-137-Ն, լրաց. 21.03.18 ՀՕ-200-Ն, փոփ. 13.06.18 ՀՕ-350-Ն, լրաց., խմբ. 11.09.18 ՀՕ-379-Ն, լրաց. 24.01.20 ՀՕ-84-Ն, 06.03.20 ՀՕ-102-Ն, խմբ. 17.11.21 ՀՕ-355-Ն, լրաց. 16.12.21 ՀՕ-425-Ն, խմբ. 25.05.22 ՀՕ-135-Ն, լրաց. 22.03.23 ՀՕ-113-Ն, խմբ. 13.07.23 ՀՕ-262-Ն, լրաց. 05.03.25 ՀՕ-60-Ն, 29.05.25 ՀՕ-125-Ն) (հոդվածը 18.04.25 ՀՕ-92-Ն օրենքի փոփոխության մասով ուժի մեջ է մտնում 2027 թվականի հունվարի 1-ից)

Հոդված 13.Ավագանու կազմը, ընտրության կարգը 1. Ավագանին կազմված է 65 անդամից։ 2. Ավագանին ընտրվում է Հայաստանի Հանրապետության ընտրական օրենսգրքով սահմանված կարգով:

Հոդված 14.Ավագանու անդամի այլ պաշտոններ զբաղեցնելու սահմանափակումը 1. Ավագանու անդամը չի կարող միաժամանակ` 1) աշխատել քաղաքապետարանի կամ որեւէ վարչական շրջանի ղեկավարի աշխատակազմում, զբաղեցնել ղեկավար պաշտոն Երեւանի ենթակայության կազմակերպություններում. 2) պետական եւ տեղական ինքնակառավարման մարմիններում զբաղեցնել իր կարգավիճակով չպայմանավորված հանրային պաշտոններ կամ հանրային ծառայության պաշտոններ. 3) զբաղեցնել պետական ոչ առեւտրային կազմակերպության գործադիր մարմնի պաշտոնը: 2. Սույն հոդվածի 1-ին մասով սահմանված անհամատեղելի պաշտոններ զբաղեցնելու դեպքերում ավագանու անդամը պարտավոր է մեկշաբաթյա ժամկետում քաղաքապետին ներկայացրած գրավոր դիմումով հրաժարվել ավագանու անդամությունից, հակառակ դեպքում նրա լիազորությունները վաղաժամկետ դադարեցվում են սույն օրենքով սահմանված կարգով: (14-րդ հոդվածը փոփ. 17.01.18 ՀՕ-56-Ն, 21.01.20 ՀՕ-25-Ն, խմբ. 22.05.24 ՀՕ-228-Ն) (22.05.24 ՀՕ-228-Ն օրենքի փոփոխության գործողությունը չի տարածվում այն անձանց վրա, որոնք մինչեւ սույն օրենքն ուժի մեջ մտնելը հանրային պաշտոնը կամ հանրային ծառայության պաշտոնը համատեղել են համայնքի ավագանու անդամի պաշտոնի հետ: Այդ անձինք կարող են շարունակել համատեղ պաշտոնավարումը մինչեւ տվյալ նորընտիր ավագանու առաջին նիստի գումարման օրը` համաձայն 22.05.24 ՀՕ-228-Ն օրենքի 2-րդ հոդվածի 2-րդ մասի)

Հոդված 15.Ավագանու անդամի թափուր տեղը համալրելը 1. Ավագանու անդամի լիազորությունների վաղաժամկետ դադարեցման կամ դադարման դեպքում այդ մանդատը կենտրոնական ընտրական հանձնաժողովի արձանագրությամբ մեկշաբաթյա ժամկետում տրվում է համապատասխան կուսակցության, կուսակցությունների դաշինքի ընտրական ցուցակի հերթական հաջորդ հորիզոնականում գտնվող անձին: Եթե վերջինս հրաժարվում է մանդատից, ապա նա հանվում է թեկնածուների ցուցակից: Եթե ցուցակում այլ թեկնածու չկա, ապա մանդատը մնում է թափուր: (15-րդ հոդվածը լրաց., փոփ. 25.05.16 ՀՕ-64-Ն, լրաց. 04.10.17 ՀՕ-137-Ն)

Հոդված 16.Ավագանու լիազորությունների ժամկետը 1. Ավագանին ընտրվում է հինգ տարի ժամկետով: Նորընտիր ավագանու լիազորությունների ժամկետը սկսվում է առաջին նիստի գումարման պահից: Այդ պահից ավարտվում է նախորդ ավագանու լիազորությունների ժամկետը: 2. Ռազմական կամ արտակարգ դրության ժամանակ ավագանու ընտրություն չի անցկացվում, իսկ ավագանու լիազորությունների ժամկետը երկարաձգվում է մինչեւ ռազմական կամ արտակարգ դրության ավարտից հետո նորընտիր ավագանու առաջին նիստը, որը հրավիրվում է ավագանու ընտրության արդյունքների պաշտոնական հրապարակումից հետո`10-րդ օրը: (16-րդ հոդվածը փոփ. 04.10.17 ՀՕ-137-Ն, 05.12.24 ՀՕ-508-Ն)

Հոդված 17.Ավագանու լիազորությունների ժամկետը կրճատելը 1. Կառավարությունը կարող է կրճատել ավագանու լիազորությունների ժամկետը, եթե` 1) հերթական նստաշրջանի ընթացքում ավագանու նիստերը երեք ամսից ավելի չեն գումարվում. 2) հերթական նստաշրջանի ընթացքում ավագանին երեք ամսից ավելի իր քննարկած հարցերի վերաբերյալ որեւէ որոշում չի կայացնում. 3) ավագանին հերթական նստաշրջանի երեք ամսվա ընթացքում քաղաքապետի ներկայացրած արտահերթ քննարկման ենթակա նախագծի վերաբերյալ որոշում չի կայացնում։ 2. Կառավարությունը կրճատում է ավագանու լիազորությունների ժամկետը, եթե «Հայաստանի Հանրապետության ընտրական օրենսգիրք» սահմանադրական օրենքի 142.2- րդ հոդվածով սահմանված կարգով նիստը գումարելուց հետո` երկշաբաթյա ժամկետում, քաղաքապետի թեկնածու չի առաջադրվում, կամ առաջադրված մեկ թեկնածուն չի հավաքում անհրաժեշտ թվով ձայներ: 3. Ավագանու լիազորությունների ժամկետը կրճատելու մասին որոշման հետ միաժամանակ կառավարությունը նշանակում է ավագանու արտահերթ ընտրություններ: 4. Ավագանին իր լիազորությունների ժամկետը կրճատելուց հետո շարունակում է իր լիազորությունների իրականացումը մինչեւ նորընտիր ավագանու առաջին նիստը: 5. Ավագանին իր լիազորությունների ժամկետը կրճատելուց հետո իրավունք չունի ընդունելու տեղական հանրաքվե անցկացնելու մասին որոշում, անվստահություն հայտնելու քաղաքապետին, կատարելու պաշտոնների նշանակումներ, ընդունելու կամ փոփոխելու Երեւանի սեփականություն համարվող գույքն օգտագործման տրամադրելու եւ օտարելու տարեկան ծրագիրը: 6. Ավագանու արտահերթ ընտրությունն անցկացվում է ավագանու լիազորությունների ժամկետը կրճատելուց հետո ոչ շուտ, քան 50, եւ ոչ ուշ, քան 65 օրվա ընթացքում: Արտահերթ ընտրությունից հետո նորընտիր ավագանու նիստը հրավիրվում է ընտրության արդյունքների պաշտոնական հրապարակումից հետո` 10-րդ օրը: (17-րդ հոդվածը փոփ. 13.06.18 ՀՕ-350-Ն, 18.06.20 ՀՕ-336-Ն, 05.12.24 ՀՕ-508-Ն)

Հոդված 18.Ավագանու անդամի իրավունքները 1. Ավագանու անդամն իրավունք ունի` 1) նախաձեռնելու ավագանու ակտերի ընդունումը (ներառյալ` բյուջեի), բացառությամբ այն դեպքերի, երբ սույն օրենքով այդ ակտերի ընդունման նախաձեռնությունը վերապահված է բացառապես քաղաքապետին, ավագանու խմբակցությանը կամ ավագանու անդամների առնվազն մեկ երրորդին. 2) ստանալու ավագանու իրավական ակտերը, ինչպես նաեւ քաղաքապետարանի աշխատակազմի ստորաբաժանումների, քաղաքային ենթակայության կազմակերպությունների գործունեության վերաբերյալ տեղեկություններ, բացառությամբ օրենքով նախատեսված գաղտնիք համարվող տեղեկությունների. 3) ելույթ ունենալու ավագանու, ավագանու հանձնաժողովների նիստերում, հարցեր տալու. 4) կատարելու Երեւանի բնակիչների ընդունելություն, կազմակերպելու հանրային հանդիպումներ. 5) առաջարկություններ ներկայացնելու ավագանու նիստերի օրակարգի եւ քննարկվող հարցերի վերաբերյալ. 6) ավագանու եւ քաղաքապետի որոշումները կամ գործողությունները բողոքարկելու դատական կարգով, եթե խախտվել են նրա՝ որպես ավագանու անդամի, իրավունքները: Ավագանու անդամների մեկ հինգերորդը, ինչպես նաեւ յուրաքանչյուր խմբակցություն կարող են դիմել վարչական դատարան` ավագանու եւ քաղաքապետի ակտերի իրավաչափությունը վիճարկելու հարցով. 7) իրականացնելու սույն օրենքով եւ ավագանու կանոնակարգով սահմանված այլ լիազորություններ:

Հոդված 19.Ավագանու անդամի պարտականությունները 1. Ավագանու անդամը պարտավոր է` 1) մասնակցել ավագանու նիստերին. 2) ավագանու կանոնակարգով սահմանված կարգով անդամակցել որեւէ մշտական հանձնաժողովի, մասնակցել դրա նիստերին. 3) մասնակցել ավագանու կողմից անցկացվող Երեւանի բնակիչների ընդունելություններին. 4) (կետն ուժը կորցրել է 07.12.22 ՀՕ-553-Ն) 5) իրականացնել սույն օրենքով եւ ավագանու կանոնակարգով սահմանված այլ պարտականություններ. 6) պահպանել Երեւանի տեղական ինքնակառավարման մարմինների նստավայրի տարածքում եւ շենքում գործող անվտանգության կանոնները: (19-րդ հոդվածը լրաց. 23.03.18 ՀՕ-256-Ն, փոփ. 07.12.22 ՀՕ-553-Ն) Հոդված 19.1. Ավագանու անդամի շահերի բախումը 1. Ավագանու անդամը «Հանրային ծառայության մասին» Հայաստանի Հանրապետության օրենքի 33-րդ հոդվածով սահմանված իրավիճակում պարտավոր է չմասնակցել ավագանու որոշումների քվեարկությանը: 2. Ավագանու անդամը պարտավոր է սույն հոդվածի 1-ին մասով սահմանված դեպքում անհապաղ գրավոր տեղյակ պահել ավագանուն կամ քաղաքապետին: (19.1-ին հոդվածը լրաց. 07.12.22 ՀՕ-553-Ն)

Հոդված 20.Ավագանու անդամի լիազորությունների վաղաժամկետ դադարեցումը, դադարումը (վերնագիրը խմբ. 04.10.17 ՀՕ-137-Ն) 1. Ավագանու անդամի լիազորությունները վաղաժամկետ դադարեցվում են, եթե՝ 1) դադարել են ավագանու լիազորությունները. 2) նա կորցրել է համայնքի ավագանու ընտրական իրավունքը. 3) դատարանի՝ օրինական ուժի մեջ մտած վճռով նա անգործունակ, անհայտ բացակայող կամ մահացած է ճանաչվել. 4) նա ավագանու անդամության հետ անհամատեղելի պաշտոն զբաղեցնելու վերաբերյալ դիմում է ներկայացրել. 5) նա ավագանու անդամության հետ անհամատեղելի պաշտոն զբաղեցնելու պահից մեկ շաբաթվա ընթացքում այդ մասին գրավոր չի տեղեկացրել քաղաքապետին. 6) նա հրաժարական է տվել: 2. Ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից: 3. Ավագանու անդամի լիազորությունները վաղաժամկետ դադարում են, եթե նա մահացել է: 4. Սույն հոդվածի 1-ին մասով նախատեսված դեպքերում, բացառությամբ 1-ին կետով նախատեսված դեպքի, համապատասխան հիմնավորող փաստաթղթերի հիման վրա քաղաքապետը, իսկ սույն հոդվածի 5-րդ մասով սահմանված դեպքերում քաղաքապետի պաշտոնակատարը կամ աշխատակազմի քարտուղարը կազմում են ավագանու անդամի լիազորությունները վաղաժամկետ դադարեցնելու մասին արձանագրություն եւ յոթ աշխատանքային օրվա ընթացքում ուղարկում Կենտրոնական ընտրական հանձնաժողով: Կենտրոնական ընտրական հանձնաժողովը ավագանու անդամի հրաժարականի մասին դիմումն ստանալուց հետո՝ յոթ աշխատանքային օրվա ընթացքում, կազմում է ավագանու անդամի լիազորությունները դադարեցնելու մասին արձանագրություն: 5. Ավագանու անդամը հրաժարականի մասին իր դիմումն անձամբ ներկայացնում է քաղաքապետին կամ քաղաքապետի պաշտոնակատարին, որն այն հրապարակում է ավագանու առաջիկա նիստում: Քաղաքապետի կամ պաշտոնակատարի բացակայության դեպքում ավագանու անդամը հրաժարականի մասին իր դիմումն անձամբ ներկայացնում է քաղաքապետարանի աշխատակազմի քարտուղարին։ Մինչեւ նորընտիր ավագանու առաջին նիստի գումարումն ընկած ժամանակահատվածում ավագանու անդամը հրաժարականի մասին իր դիմումն անձամբ ներկայացնում է Կենտրոնական ընտրական հանձնաժողով։ Ավագանու անդամի կողմից իր դիմումն անձամբ ներկայացվելու անհնարինության դեպքում հրաժարականի դիմումը ներկայացնում է խմբակցության ղեկավարը կամ ավագանու անդամի ներկայացուցիչը: (20-րդ հոդվածը խմբ. 04.10.17 ՀՕ-137-Ն, 05.12.24 ՀՕ-508-Ն)

Հոդված 21.Ավագանու անդամի գործունեության համար փոխհատուցումն ու գործունեության երաշխիքները 1. Ավագանու անդամն իր պարտականությունների կատարման հետեւանքով առաջացած ծախսերի դիմաց իր ցանկությամբ եւ ավագանու որոշմամբ կարող է ստանալ ամսական դրամական փոխհատուցում` Հայաստանի Հանրապետության նվազագույն աշխատավարձի չափով: 2. Քաղաքապետը, քաղաքապետի տեղակալները, քաղաքապետարանի աշխատակազմի քարտուղարը, քաղաքապետարանի աշխատակազմի ստորաբաժանումների ղեկավարները, Երեւանի ենթակայության կազմակերպությունների ղեկավարները պարտավոր են ավագանու անդամի պահանջով հնարավոր սեղմ ժամկետում ընդունել նրան: 3. Վարչական շրջանի ղեկավարները պարտավոր են ավագանու անդամի պահանջով ամսական առնվազն մեկ օր կահավորված սենյակ կամ դահլիճ հատկացնել ավագանու անդամին` Երեւանի բնակիչների ընդունելության, ինչպես նաեւ հանրային հանդիպումներ կազմակերպելու համար: 4. Ավագանու անդամը իր լիազորությունների իրականացման ընթացքում եւ դրանից հետո չի կարող հետապնդվել եւ պատասխանատվության ենթարկվել ավագանու` իր կարգավիճակից բխող գործողությունների, ներառյալ` քվեարկության, ինչպես նաեւ ավագանիում հայտնած կարծիքի համար, եթե այն քրեորեն հետապնդելի արարք չէ:

Հոդված 22.Ավագանու իրավական ակտերը եւ դրանց ընդունման կարգը 1. Ավագանին ընդունում է որոշումներ: 1.1. Հայաստանի Հանրապետության Սահմանադրության եւ օրենքների հիման վրա եւ դրանց իրականացումն ապահովելու նպատակով ավագանին օրենքով սահմանված կարգով ընդունում է ենթաօրենսդրական նորմատիվ իրավական ակտեր, որոնք ենթակա են կատարման Երեւանի վարչական տարածքում: 2. Ավագանին Երեւանի շահերին վերաբերող, բայց իր իրավասությունից դուրս հարցերի առնչությամբ կարող է ընդունել ուղերձներ, հայտարարություններ` ուղղված Երեւանի բնակչությանը, քաղաքապետին, պետական ու տեղական ինքնակառավարման այլ մարմիններին: 3. Ավագանու որոշումները, հայտարարությունները եւ ուղերձներն ընդունվում են նիստին ներկա ավագանու անդամների ձայների մեծամասնությամբ, բացառությամբ սույն օրենքով սահմանված դեպքերի։ 4. Քաղաքապետի եզրակացության համաձայն` Երեւանի բյուջեի եկամուտները նվազեցնող կամ ծախսերն ավելացնող որոշման նախագծերն ավագանին ընդունում է ավագանու անդամների ընդհանուր թվի ձայների մեծամասնությամբ: 5. Ավագանու հայտարարությունները եւ ուղերձները մեկշաբաթյա ժամկետում ստորագրում եւ հրապարակում է քաղաքապետը: 6. Ավագանու որոշումները ստորագրում եւ հրապարակում է քաղաքապետը սույն օրենքով եւ «Նորմատիվ իրավական ակտերի մասին» օրենքով սահմանված կարգով: 7. Ավագանու նորմատիվ, անհատական եւ ներքին իրավական ակտերն ընդունվելուց հետո՝ մեկշաբաթյա ժամկետում, ներկայացվում են լիազոր մարմին՝ նորմատիվ իրավական ակտերի հրապարակման միասնական կայքում հրապարակելու նպատակով եւ նույն ժամկետում տեղադրվում քաղաքապետարանի պաշտոնական համացանցային կայքում: 8. Քաղաքապետը ավագանու ընդունած ուղերձն ստանալու օրվանից հետո` մեկամսյա ժամկետում, պարտավոր է քննության առնել այն եւ արդյունքների մասին պաշտոնապես տեղեկացնել ավագանուն: (22-րդ հոդվածը լրաց. 04.10.17 ՀՕ-137-Ն, փոփ. 21.03.18 ՀՕ-179-Ն, փոփ., խմբ. 14.11.23 ՀՕ-354-Ն)

Հոդված 23.Ավագանու որոշումների, հայտարարությունների, ուղերձների ընդունման նախաձեռնությունը, քննարկումը 1. Ավագանու որոշումների, ուղերձների եւ հայտարարությունների ընդունումը նախաձեռնելու իրավունքը պատկանում է ավագանու անդամին, քաղաքապետին, սույն օրենքով նախատեսված դեպքերում` ավագանու խմբակցությանը, ավագանու անդամների մեկ երրորդին: Քաղաքապետի պահանջով իր ներկայացրած նախագիծը քննարկվում է արտահերթ: 2. Ավագանու որոշումների, ուղերձների, հայտարարությունների ընդունումը կարող է նախաձեռնել նաեւ ավագանու ընտրությունների առումով ընտրական իրավունք ունեցող անձանց ոչ պակաս, քան մեկ տոկոսը: 3. Ընտրողների նախաձեռնությունները կատարելու եւ ավագանու նիստում դրանք քննարկելու կարգը սահմանվում է ավագանու կանոնակարգով: 4. Որոշումների, ուղերձների եւ հայտարարությունների ընդունման նախաձեռնությունները քննարկվում են ավագանու նիստում ոչ ուշ, քան 4 ամսվա ընթացքում:

Հոդված 24.Պայմանագրերի հաստատումը 1. Ավագանին հաստատում է քաղաքապետի կնքած այն պայմանագրերը (ներառյալ` դրանց փոփոխությունները), որոնք՝ 1) ավագանու կանոնակարգով սահմանված են որպես Երեւանի համար էական նշանակություն ունեցող. 2) ուղղակիորեն նախատեսում են ավագանու հաստատում: 2. Սույն հոդվածով նախատեսված պայմանագրերը առաջացնում են իրավական հետեւանքներ ավագանու կողմից հաստատվելուց հետո:

Հոդված 25.Ավագանու գործունեության կազմակերպումը 1. Ավագանին գործում է իր կանոնակարգին համապատասխան` նիստերի, հանձնաժողովների, խմբակցությունների աշխատանքի միջոցով: 2. Քաղաքապետը ավագանու նստավայրում անհրաժեշտ պայմաններ է ստեղծում ավագանու՝ սույն օրենքով, ինչպես նաեւ ավագանու կանոնակարգով սահմանված կարգով գործունեության իրականացման համար: 3. Ավագանու նիստերն արձանագրվում են: Այդ արձանագրությունները մեկշաբաթյա ժամկետում ենթակա են տեղադրման նաեւ Երեւանի պաշտոնական համացանցային կայքում:

Հոդված 26.Ավագանու հերթական նստաշրջանները եւ նիստերը 1. Ավագանու հերթական նստաշրջանները գումարվում են փետրվարի երկրորդ երեքշաբթի օրվանից մինչեւ հունիսի վերջին չորեքշաբթին եւ սեպտեմբերի երկրորդ երեքշաբթի օրվանից մինչեւ դեկտեմբերի վերջին չորեքշաբթին: Նստաշրջանի ընթացքում յուրաքանչյուր ամիս հրավիրվում է ավագանու առնվազն մեկ նիստ: 2. Նիստերի օրերը որոշում է ավագանին:

Հոդված 27.Ավագանու հերթական նիստի օրակարգը եւ որոշման, հայտարարության, ուղերձի նախագծեր ներկայացնելը 1. Ավագանու նիստերի օրակարգի նախագիծը կազմում է քաղաքապետը` քաղաքապետարանի աշխատակազմի քարտուղարին նիստից առնվազն երկու շաբաթ առաջ ներկայացրած նախաձեռնություններից: 1.1. Քաղաքապետի որոշմամբ անհետաձգելի համարվող՝ ավագանու իրավական ակտերի նախագծերը առաջիկա նիստի օրակարգում ընդգրկվելու համար կարող են ներկայացվել նիստից առնվազն երկու օր առաջ: 2. Նախաձեռնության հեղինակը պետք է ներկայացնի որոշման, հայտարարության, ուղերձի նախագիծը: Յուրաքանչյուր նախագծի կցվում են դրա ընդունման անհրաժեշտության հիմնավորումները: 3. Նիստի օրակարգի նախագիծը, դրանում ընդգրկված հարցերի մասին որոշման, հայտարարության, ուղերձի նախագծերը եւ դրանց կցված փաստաթղթերը նիստը սկսվելուց առնվազն մեկ շաբաթ առաջ տրամադրվում են ավագանու անդամներին: 4. Նիստի օրակարգը հաստատվում է ավագանու որոշմամբ: (27-րդ հոդվածը լրաց. 04.10.17 ՀՕ-137-Ն)

Հոդված 28.Հանրության տեղեկացումը ավագանու հերթական նիստերի մասին 1. Ավագանու հերթական նիստից առնվազն մեկ շաբաթ առաջ քաղաքապետը հրապարակում է տեղեկություն ավագանու նիստի ժամանակի վերաբերյալ` կցելով օրակարգի նախագիծը: Այդ տեղեկությունները փակցվում են քաղաքապետարանում եւ վարչական շրջանների ղեկավարների նստավայրերում, տարածվում զանգվածային լրատվության միջոցներով, տեղադրվում Երեւանի պաշտոնական համացանցային կայքում, ինչպես նաեւ http://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում: 2. Ավագանու անդամներին տրամադրված նիստի հետ կապված նախագծերը եւ դրանց կցված փաստաթղթերը նիստից առնվազն մեկ շաբաթ առաջ տեղադրվում են Երեւանի պաշտոնական համացանցային կայքում: Անձանց պահանջով քաղաքապետարանը նրանց պետք է տրամադրի այդ փաստաթղթերի պատճենները` դրա ծախսերը ծածկող վճարի դիմաց: (28-րդ հոդվածը լրաց. 19.03.12 ՀՕ-134-Ն)

Հոդված 29.Ավագանու նիստը 1. Նորընտիր ավագանու առաջին նիստը օրենքի ուժով գումարվում է ավագանու անդամների ընտրվելու վերաբերյալ որոշման պաշտոնական հրապարակումից հետո՝ նախորդ ավագանու լիազորությունների ժամկետի ավարտման օրը: Մինչեւ քաղաքապետի ընտրվելը ավագանու նիստը վարում է ավագանու նիստին ներկա տարիքով ավագ անդամը: 2. Ավագանու նիստը հրավիրում եւ վարում է քաղաքապետը, իսկ նրա բացակայության ժամանակ` քաղաքապետի առաջին տեղակալը: 3. Ավագանու նիստն իրավազոր է, եթե նիստին ներկա է ավագանու անդամների՝ օրենքով սահմանված թվի կեսից ավելին: Եթե կես ժամվա ընթացքում նիստին չի ներկայանում քաղաքապետը կամ նրա առաջին տեղակալը, ապա նիստը վարողի չներկայանալու մասին կազմվում է արձանագրություն, որն ստորագրում են ավագանու նիստին ներկայացած անդամները, որից հետո նիստը վարում է ավագանու նիստին ներկա տարիքով ավագ անդամը: 4. Ավագանու նիստը հրապարակային է: Ավագանու կանոնակարգով սահմանված դեպքերում ավագանու նիստին ներկա անդամների ընդհանուր թվի ձայների առնվազն կեսով ընդունված որոշմամբ կարող են անցկացվել դռնփակ քննարկումներ։ Ավագանու հրապարակային նիստերը առցանց հեռարձակվում են Երեւանի պաշտոնական համացանցային կայքում: Առցանց (ուղիղ ժամանակային ռեժիմում) հեռարձակման իրականացումն ապահովում է քաղաքապետարանի աշխատակազմը: 5. Քաղաքապետի տեղակալներն իրավունք ունեն մասնակցելու ավագանու նիստերին, արտահերթ ելույթ ունենալու, ինչպես նաեւ պատասխանելու հարցերի։ 6. Երեւանի վարչական շրջանների ղեկավարներն իրավունք ունեն մասնակցելու ավագանու նիստերին, ելույթ ունենալու եւ պատասխանելու հարցերի: 7. Ավագանու նիստերին քաղաքապետի կամ ավագանու խմբակցությունների հրավերով կարող են մասնակցել, ելույթներ ունենալ եւ պատասխանել հարցերին նաեւ այլ անձինք: 7.1. Երեւանի ավագանու հրապարակային նիստում, ավագանու անդամներից եւ հարցի քննարկմանը մասնակցելու իրավունք ունեցող անձանցից բացի, կարող են ներկա լինել՝ 1) օրենքով նման իրավունք ունեցող անձինք. 2) Երեւանի քաղաքապետարանի աշխատակազմի ղեկավարը եւ նրա սահմանած ցանկով նիստի սպասարկումը կամ լուսաբանումն ապահովող Երեւանի քաղաքապետարանի աշխատակազմի կամ Երեւանի ենթակայության կազմակերպությունների աշխատակիցները. 3) Երեւանի քաղաքապետի կամ նիստը վարողի հրավիրած՝ Երեւանի քաղաքապետարանի աշխատակազմի աշխատակիցները կամ այլ անձինք: 7.2. Երեւանի տեղական ինքնակառավարման մարմինների նստավայրում լրագրողներն իրենց մասնագիտական գործունեությունն իրականացնելիս իրավունք ունեն ներկա լինելու ավագանու հրապարակային նիստերին՝ ավագանու նիստերի դահլիճին անմիջապես կից առանձնացված տեղում, որտեղից ուղղակիորեն տեսանելի եւ լսելի է ավագանու նիստը: 8. Ավագանու նիստերի գումարման, նիստերում հարցերի քննարկման կարգը սահմանվում է ավագանու կանոնակարգով: (29-րդ հոդվածը խմբ. 04.10.17 ՀՕ-137-Ն, փոփ. 21.03.18 ՀՕ-179-Ն, լրաց. 23.03.18 ՀՕ- 256-Ն, խմբ. 10.09.19 ՀՕ-147-Ն, փոփ. 16.12.21 ՀՕ-429-Ն)

Հոդված 30.Ավագանու արտահերթ նիստը 1. Ավագանու արտահերթ նիստ գումարում է քաղաքապետը կամ ավագանու անդամների ընդհանուր թվի առնվազն մեկ երրորդը: Արտահերթ նիստ գումարելու կարգը սահմանվում է ավագանու կանոնակարգով: 2. Ավագանու արտահերթ նիստն անցկացվում է նախաձեռնողի սահմանած օրակարգով եւ ժամկետում, սակայն նախաձեռնությունից ոչ շուտ, քան երեք օրից: 3. Արտահերթ նիստի օրակարգը, դրանում ընդգրկված հարցերի որոշման նախագծերը եւ դրանց կցված փաստաթղթերն ավագանու անդամներին տրամադրվում են արտահերթ նիստը նախաձեռնելուց հետո ոչ ուշ, քան 24 ժամվա ընթացքում: Նույն ժամկետում այդ նյութերը պետք է տեղադրվեն նաեւ Երեւանի պաշտոնական համացանցային կայքում:

Հոդված 31.Ավագանու խմբակցությունների ստեղծման կարգը 1. Ավագանու խմբակցություններն ստեղծվում են նորընտիր ավագանու առաջին նստաշրջանի բացման օրը` հետեւյալ սկզբունքին համապատասխան. ավագանու անդամների մանդատների բաշխմանը մասնակցած կուսակցության կամ կուսակցությունների դաշինքի առաջադրմամբ ընտրված ավագանու անդամներն ընդգրկվում են նույնանուն խմբակցություններում: 2. Ավագանու խմբակցությունը քաղաքապետին գրավոր ներկայացնում է իր կանոնադրությունը, անվանումը, կազմը, ղեկավարի եւ քարտուղարի անունները, ազգանունները, որոնք նիստը վարողը հրապարակում է ավագանու առաջիկա նիստում: 3. Ավագանու անդամը կարող է դուրս գալ խմբակցությունից` այդ մասին գրավոր տեղյակ պահելով համապատասխան խմբակցության ղեկավարին եւ քաղաքապետին: 4. Խմբակցության գործունեությունը դադարում է, եթե նրա բոլոր անդամները դուրս են գալիս խմբակցությունից: 5. Խմբակցության կազմի փոփոխության, ինչպես նաեւ գործունեության դադարման եւ վերականգնման մասին գրավոր տեղեկացվում է քաղաքապետին կամ ավագանու նիստը վարողին, որն այդ մասին հայտարարում է ավագանու առաջիկա նիստում: (31-րդ հոդվածը լրաց., փոփ. 04.10.17 ՀՕ-137-Ն)

Հոդված 32.Խմբակցությունների գործունեության ապահովումը 1. Ավագանու նիստերի դահլիճում խմբակցություններին հատկացվում են առանձին հատվածներ: 2. Երեւանի քաղաքապետարանում կամ Երեւանի ավագանու որոշած այլ վայրում խմբակցություններն ապահովվում են կահավորված, տեխնիկական եւ կապի միջոցներով հագեցված առանձին աշխատասենյակներով: 3. Խմբակցությանը տրամադրվում է ավտոմեքենա: 4. Խմբակցության գործավարը եւ փորձագետները աշխատանքի են ընդունվում ժամկետային պայմանագրով` համապատասխան խմբակցության ղեկավարի ներկայացմամբ, կատարում են նրա հանձնարարությունները, ինչպես նաեւ նրա հանձնարարությամբ աջակցում են խմբակցության, ավագանու անդամների աշխատանքին: 5. Մինչեւ 7 անդամ ունեցող խմբակցությունն ունենում է քաղաքապետարանի աշխատակազմի հաստիքացուցակով սահմանված մեկ գործավար եւ մեկ փորձագետ, 7-ից 11 անդամ ունեցող խմբակցությունն ունենում է մեկ գործավար եւ 2 փորձագետ, իսկ 11-ից ավելի անդամ ունեցողը` մեկ գործավար եւ 3 փորձագետ:

Հոդված 33.Ավագանու մշտական հանձնաժողովները 1. Ավագանին իր իրավասության մեջ մտնող հարցերի քննարկման եւ նախապատրաստման, ինչպես նաեւ ավագանու անունից վերահսկողություն իրականացնելու համար ստեղծում է ոչ ավելի, քան 4 մշտական հանձնաժողով: 2. Մշտական հանձնաժողովներում խմբակցություններին տեղեր են հատկացվում նրանց խմբակցության անդամների թվաքանակի համամասնությամբ` ավագանու կանոնակարգով սահմանված կարգով։ 3. Մշտական հանձնաժողովների նախագահների եւ նրանց տեղակալների պաշտոններում ավագանու անդամների կազմից թեկնածուների առաջադրման իրավունքը խմբակցությունների միջեւ բաշխվում է ավագանու առաջին նստաշրջանի բացման օրը` ըստ յուրաքանչյուր պաշտոնի համար ստացված գործակցի, որը հաշվարկվում է հետեւյալ բանաձեւով` Գխ=Ախ /(Պխ +1), որտեղ Գխ-ն խմբակցության գործակիցն է, Ախ-ն խմբակցության անդամների ընդհանուր թիվն է, Պխ-ն հերթական պաշտոնի համար խմբակցության գործակիցը հաշվելիս թեկնածու առաջադրելու իրավունքով խմբակցությանը վերապահված մշտական հանձնաժողովների նախագահների եւ նրանց տեղակալների պաշտոնների ընդհանուր թիվն է: 4. Գործակիցների հաշվարկի սկզբում ամենամեծ գործակիցն ունեցող խմբակցությունն ստանում է մշտական հանձնաժողովի նախագահի կամ մշտական հանձնաժողովի նախագահի տեղակալի առաջին պաշտոնի ընտրության եւ դրանում թեկնածու առաջադրելու իրավունքը: Մշտական հանձնաժողովի նախագահի կամ մշտական հանձնաժողովի նախագահի տեղակալի հերթական պաշտոնի ընտրության եւ դրանում թեկնածու առաջադրելու իրավունքն ստանում է մյուս խմբակցությունների համեմատ առավել մեծ գործակից ունեցող խմբակցությունը: Գործակիցների հաշվարկը կրկնվում է մինչեւ մշտական հանձնաժողովների նախագահների եւ նրանց տեղակալների վերջին պաշտոնում թեկնածու առաջադրելու իրավունքը որոշելը: Հավասար՝ ամենամեծ գործակիցների դեպքում մշտական հանձնաժողովի նախագահի կամ տեղակալի հերթական պաշտոնում թեկնածու առաջադրելու իրավունքը որոշվում է հավասար գործակիցներ ունեցող խմբակցությունների փոխհամաձայնությամբ, իսկ դրա անհնարինության դեպքում՝ վիճակահանությամբ: Եթե խմբակցությունը չի առաջադրում մշտական հանձնաժողովի նախագահի եւ (կամ) տեղակալի թեկնածու, ապա տվյալ պաշտոնում թեկնածու առաջադրելու իրավունքն անցնում է խմբակցությունների գործակիցների հաշվարկի սկզբում ամենամեծ գործակիցն ունեցող խմբակցությանը: 5. Մշտական հանձնաժողովների նախագահների եւ նրանց տեղակալների պաշտոններում թեկնածուների առաջադրման իրավունքը որոշելուց հետո խմբակցությունները կարող են փոխհամաձայնությամբ փոխարինել եւ (կամ) միմյանց զիջել մշտական հանձնաժողովի նախագահի եւ (կամ) նրա տեղակալի պաշտոնում իրենց կողմից թեկնածու առաջադրելու իրավունքը: 6. Քաղաքապետը, քաղաքապետարանի աշխատակազմի քարտուղարը, վարչական շրջանների ղեկավարը, Երեւանի ենթակայության կազմակերպությունները ավագանու մշտական հանձնաժողովի անդամների ընդհանուր թվի առնվազն մեկ երրորդի պահանջով պարտավոր են հանձնաժողովին տրամադրել անհրաժեշտ փաստաթղթեր ու տեղեկանքներ։ 7. Մշտական հանձնաժողովն իր նիստին կարող է հրավիրել քննարկվող հարցին առնչվող Երեւանի քաղաքապետարանի աշխատակազմի ստորաբաժանումների ղեկավարներին, Երեւանի ենթակայության կազմակերպությունների ղեկավարներին, ինչպես նաեւ Երեւանի քաղաքապետարանի աշխատակազմի քարտուղարին` իր անդամների ընդհանուր թվի ձայների մեծամասնությամբ: 8. Ավագանու անդամների` այս կամ այն մշտական հանձնաժողովին անդամակցելու հարցը լուծում է համապատասխան խմբակցությունը, իսկ դրա անհնարինության դեպքում հարցը լուծվում է ավագանու անդամի դիմումի հիման վրա: (33-րդ հոդվածը լրաց. 04.10.17 ՀՕ-137-Ն)

Հոդված 34.Ժամանակավոր հանձնաժողովները 1. Ավագանու առանձին որոշումների, հայտարարությունների, ուղերձների նախագծերի եւ այլ հարցերի նախնական քննարկման եւ դրանց վերաբերյալ ավագանուն եզրակացություններ կամ տեղեկանքներ ներկայացնելու համար ավագանու որոշմամբ կարող են ստեղծվել ժամանակավոր հանձնաժողովներ։ 2. Ժամանակավոր հանձնաժողովը գործում է մինչեւ սույն հոդվածի 1-ին մասի լիազորությունների իրականացումը, սակայն ոչ ավելի, քան 2 ամիս: Երեւանի ավագանու որոշմամբ ժամանակավոր հանձնաժողովի լիազորությունները կարող են երկարաձգվել եւս 2 ամսով: 3. Ժամանակավոր հանձնաժողովների վրա համապատասխանաբար տարածվում են մշտական հանձնաժողովների համար սահմանված դրույթները:

Հոդված 35.Քննող հանձնաժողովը 1. Ավագանու որեւէ խմբակցության պահանջով Երեւանում տեղական ինքնակառավարմանը վերաբերող հասարակական հետաքրքրություն ներկայացնող փաստեր պարզելու նպատակով ստեղծվում է ժամանակավոր քննող հանձնաժողով։ Պահանջի հետ ներկայացվում է նաեւ հանձնաժողովի նախագահի անունը: 2. Խմբակցությունը քննող հանձնաժողով ստեղծելը կարող է նախաձեռնել օրացուցային տարվա ընթացքում մեկ անգամ: 3. Քննող հանձնաժողովը գործում է մինչեւ տվյալ փաստը պարզելը, սակայն ոչ ավելի, քան 6 ամիս: 4. Քննող հանձնաժողովը բաղկացած է խմբակցությունների մեկական ներկայացուցչից, եթե ավագանին որոշում չի ընդունում այլ հավասար ներկայացուցչության մասին։ 5. Քաղաքապետը, քաղաքապետարանի աշխատակազմի քարտուղարը, վարչական շրջանների ղեկավարը, Երեւանի ենթակայության կազմակերպությունները քննող հանձնաժողովի նախագահի, ինչպես նաեւ հանձնաժողովի անդամների մեկ հինգերորդի պահանջով պարտավոր են հանձնաժողովին տրամադրել անհրաժեշտ փաստաթղթեր: Քննող հանձնաժողովի նիստերը հրապարակային են, հանձնաժողովի ընդհանուր թվի կեսով ընդունված որոշմամբ կարող են անցկացվել փակ նիստեր: 6. Քննող հանձնաժողովի վրա համապատասխանաբար տարածվում են մշտական հանձնաժողովների համար սահմանված դրույթները:

Հոդված 36.Այլ պաշտոնատար անձանց պարտադիր մասնակցությունը ավագանու նիստերին 1. Ավագանու անդամների ընդհանուր թվի մեկ երրորդի պահանջով քաղաքապետը, նրա տեղակալները, քաղաքապետարանի աշխատակազմի քարտուղարը, ստորաբաժանումների ղեկավարները, Երեւանի ենթակայության կազմակերպությունների ղեկավարները պարտավոր են մասնակցել ավագանու կողմից որոշված նիստերին եւ քննարկվող հարցի առնչությամբ ելույթ ունենալ, պատասխանել ավագանու անդամների հարցերին։

Հոդված 37.Ավագանու անդամի գրավոր եւ բանավոր հարցերը 1. Ավագանու նստաշրջանների ընթացքում ավագանու կանոնակարգով երկու ամսվա մեջ առնվազն մեկ նիստի ընթացքում քաղաքապետը, քաղաքապետի տեղակալները եւ քաղաքապետարանի աշխատակազմի ստորաբաժանումների ղեկավարները պատասխանում են ավագանու անդամների բանավոր հարցերին։ Այդ նիստերի սղագրությունը նիստից հետո` երկշաբաթյա ժամկետում, տեղադրվում է քաղաքապետարանի պաշտոնական համացանցային կայքում: 2. Ավագանու անդամն իրավունք ունի գրավոր հարցեր ուղղելու քաղաքապետին, որն այդ հարցերին պատասխանում է երեք շաբաթվա ընթացքում։ Գրավոր հարցերի պատասխանները ավագանու նիստում չեն ներկայացվում: Այդ պատասխանները մեկշաբաթյա ժամկետում տեղադրվում են Երեւանի պաշտոնական համացանցային կայքում:

Հոդված 38.Հրատապ թեմայով քննարկումները 1. Ավագանու հերթական նիստում ավագանու անդամների ընդհանուր թվի առնվազն մեկ երրորդի պահանջով կարող են անցկացվել հասարակական հետաքրքրություն ներկայացնող հրատապ թեմայով քննարկումներ։

Հոդված 39.Հանրաքվե անցկացնելու մասին որոշում ընդունելը եւ լսումներ անցկացնելը (վերնագիրը խմբ. 13.06.18 ՀՕ-350-Ն) 1. Ավագանին տեղական հանրաքվե անցկացնելու մասին որոշումն ընդունում է ավագանու անդամների ընդհանուր թվի առնվազն մեկ երրորդի կամ քաղաքապետի նախաձեռնությամբ՝ ավագանու անդամների ընդհանուր թվի ձայների մեծամասնությամբ: 2. Ավագանին իր իրավասության մեջ մտնող հարցերի վերաբերյալ բնակչության կարծիքը պարզելու նպատակով մինչեւ հարցի լուծումը կարող է անցկացնել հանրային լսումներ, ինչպես նաեւ սույն հոդվածի 1-ին մասով սահմանված կարգով ընդունել տեղական հանրաքվե անցկացնելու մասին որոշում, որի արդյունքները պարտադիր բնույթ չունեն: (39-րդ հոդվածը փոփ. 25.05.16 ՀՕ-64-Ն, խմբ. 13.06.18 ՀՕ-350-Ն)

Հոդված 40.Քաղաքապետին անվստահություն հայտնելը 1. Ավագանու անդամների ընդհանուր թվի առնվազն մեկ երրորդը կարող է ներկայացնել քաղաքապետին անվստահություն հայտնելու որոշման նախագիծ: Որոշման նախագիծը ներառում է ավագանու այն անդամի անուն-ազգանունը, որին նախաձեռնող խումբն առաջադրում է որպես քաղաքապետի թեկնածու, ինչպես նաեւ այն պետք է ստորագրեն նախաձեռնող խմբի բոլոր անդամները: 2. Քաղաքապետին անվստահություն հայտնելու վերաբերյալ որոշման նախագիծը հանձնվում է քաղաքապետին, ինչպես նաեւ ավագանու խմբակցություններին: Ավագանու խմբակցություններն այդ մասին անհապաղ տեղեկացնում են իրենց խմբակցությունների անդամներին: 3. Քաղաքապետին անվստահություն հայտնելու մասին որոշման նախագիծը ներկայացվելուց հետո` 36 ժամվա ընթացքում, նախաձեռնող խմբի մեջ չմտնող ավագանու անդամների ընդհանուր թվի առնվազն մեկ երրորդը կարող է եւս ներկայացնել քաղաքապետին անվստահություն հայտնելու վերաբերյալ որոշման նախագիծ` առաջադրելով քաղաքապետի այլ թեկնածու: 4. Քաղաքապետին անվստահություն հայտնելու մասին որոշման նախագիծը ներկայացնելուց հետո` երրորդ աշխատանքային օրը` ժամը 10.00-ին, օրենքի ուժով հրավիրվում է ավագանու նիստ, որում գաղտնի քվեարկությամբ որոշվում է քաղաքապետին անվստահություն հայտնելու հարցը: 5. Քվեարկությունն անցկացվում է գաղտնի` քվեաթերթիկների միջոցով, որում ընդգրկվում է քաղաքապետին անվստահություն հայտնելու մասին որոշման նախագծով առաջադրված թեկնածուն, իսկ եթե այդպիսի նախագծերը երկուսն են, ապա երկու թեկնածուները: Ավագանու յուրաքանչյուր անդամ ունի մեկ ձայնի իրավունք: 6. Քաղաքապետին անվստահություն է հայտնվում, եթե առաջադրված թեկնածուն (թեկնածուներից մեկը) ստանում է ավագանու անդամների ընդհանուր թվի ձայների մեծամասնությունը: 7. Գործող քաղաքապետը սույն հոդվածի 6-րդ մասով սահմանված դեպքում վայր է դնում իր լիազորությունները, իսկ նորընտիր քաղաքապետն իր լիազորությունները ստանձնում է մեկշաբաթյա ժամկետում՝ սույն օրենքի 47-րդ հոդվածով սահմանված կարգով: 8. Քաղաքապետին անվստահություն հայտնելու մասին որոշման նախագիծ ներկայացնելու նախաձեռնություն կարող է ցուցաբերվել քաղաքապետի լիազորություններն ստանձնելուց եւ անվստահության հարցը քննարկելուց ոչ շուտ, քան մեկ տարի հետո: 9. Քաղաքապետին անվստահություն հայտնելու առաջարկություն չի կարող ներկայացվել ռազմական կամ արտակարգ դրության ժամանակ:

Հոդված 41.Քաղաքապետի իրավական կարգավիճակը 1. Քաղաքապետը` 1) տեղական ինքնակառավարման մարմին է. 2) ներկայացնում է Երեւանը` որպես համայնք, ավագանին եւ քաղաքապետարանը այլ անձանց եւ մարմինների հետ հարաբերություններում. 3) ղեկավարում է քաղաքապետարանի աշխատանքները. 4) ավագանու անդամ է. 5) օրենքով նախատեսված դեպքերում որպես համայնքի (Երեւանի) ներկայացուցիչ հանդես է գալիս դատարանում, ինչպես նաեւ իր իրավասության սահմաններում տալիս է դատարանում հանդես գալու լիազորագրեր: 2. Քաղաքապետի ընտրության անցկացման կարգը սահմանվում է «Հայաստանի Հանրապետության ընտրական օրենսգիրք» սահմանադրական օրենքով: (41-րդ հոդվածը լրաց. 25.03.20 ՀՕ-192-Ն, 18.06.20 ՀՕ-336-Ն)

Հոդված 42.Քաղաքապետին ներկայացվող պահանջները 1. Քաղաքապետ կարող է դառնալ 30 տարին լրացած, Հայաստանի Հանրապետության քաղաքացիություն ունեցող եւ ավագանու անդամ համարվող այն անձը, որը չունի այլ պետության քաղաքացիություն: 2. Քաղաքապետը չի կարող զբաղվել ձեռնարկատիրական գործունեությամբ, զբաղեցնել այլ պաշտոն պետական կամ տեղական ինքնակառավարման մարմիններում կամ առեւտրային կազմակերպություններում, կատարել վճարովի այլ աշխատանք, բացի գիտական, մանկավարժական եւ ստեղծագործական աշխատանքից:

Հոդված 43.Քաղաքապետի լիազորությունների ժամկետը 1. Քաղաքապետ ընտրվում է իրեն ընտրած ավագանու լիազորությունների ողջ ժամկետով:

Հոդված 44.Քաղաքապետի ընտրության անցկացումը (հոդվածն ուժը կորցրել է 18.06.20 ՀՕ-336-Ն) Հոդված 45.Քաղաքապետի լիազորությունների դադարումը, դադարեցումը 1. Քաղաքապետի լիազորությունները դադարում են նորընտիր քաղաքապետի կողմից լիազորություններն ստանձնելու պահից: 2. Քաղաքապետի լիազորությունները վաղաժամկետ դադարում են, եթե նա` 1) կորցրել է ավագանու անդամի ընտրական իրավունքը. 2) քաղաքապետի պաշտոնի հետ անհամատեղելի պաշտոն է զբաղեցնում. 3) հրաժարական է տվել. 4) կորցրել է ավագանու անդամի լիազորությունը. 5) ստացել է այլ երկրի քաղաքացիություն. 6) մահացել է: 3. Քաղաքապետի լիազորությունները վաղաժամկետ դադարեցվում են սույն օրենքի 40-րդ հոդվածով սահմանված կարգով անվստահություն հայտնելու դեպքում: 4. Սույն հոդվածի 2-րդ մասով սահմանված դեպքերում, բացառությամբ 6-րդ կետով սահմանված դեպքի, ավագանին կազմում է քաղաքապետի լիազորությունների վաղաժամկետ դադարման մասին արձանագրություն: 5. Քաղաքապետի լիազորությունները վաղաժամկետ դադարեցվելուց հետո` մեկ տարվա ընթացքում, նույն անձը չի կարող առաջադրվել քաղաքապետ: (45-րդ հոդվածը խմբ. 04.10.17 ՀՕ-137-Ն)

Հոդված 46.Քաղաքապետի արտահերթ ընտրությունները (հոդվածն ուժը կորցրել է 18.06.20 ՀՕ-336-Ն) Հոդված 47.Քաղաքապետի լիազորությունների ստանձնումը 1. Քաղաքապետը իր լիազորությունները ստանձնում է իր ընտրվելուց հետո` երրորդ օրացուցային օրը, ավագանու` օրենքի ուժով հրավիրված նիստում Երեւանի բնակիչներին տրված հետեւյալ երդմամբ. «Ստանձնելով Հայաստանի Հանրապետության մայրաքաղաք Երեւանի քաղաքապետի պաշտոնը` երդվում եմ. Երեւանի քաղաքապետի լիազորություններն իրականացնելու ընթացքում պահպանել Հայաստանի Հանրապետության Սահմանադրությունը, օրենքները, Երեւանի ավագանու որոշումները, ազնվորեն եւ բարեխղճորեն կատարել Երեւանի քաղաքապետի լիազորությունները, ծառայել Երեւանի բարգավաճմանը, գործել ի բարօրություն նրա բնակիչների: Պարտավորվում եմ հոգ տանել մեր հնագույն մայրաքաղաքի փառքի պահպանման եւ բազմապատկման համար, պաշտպանել համայնքի իրավունքները, օրինական շահերը եւ սեփականությունը, ուժերիս անմնացորդ նվիրումով սատարել ժողովրդի հավատին, նպաստել նրա նյութական եւ հոգեւոր վերելքին: Աջակից լինել ամեն մի ազնիվ նախաձեռնության, որ միտված կլինի իմ համաքաղաքացիների նվիրական գաղափարների իրականացմանը:»: 2. Քաղաքապետի երդման արարողության կարգը սահմանվում է ավագանու կանոնակարգով:

Հոդված 48.Քաղաքապետի տեղակալները, խորհրդականները, օգնականները, մամուլի քարտուղարը 1. Քաղաքապետն ունի մեկ առաջին տեղակալ եւ կարող է ունենալ եւս ոչ ավելի, քան 5 տեղակալ: 2. Քաղաքապետի առաջին տեղակալը փոխարինում է քաղաքապետին վերջինիս բացակայության ժամանակ: 3. Քաղաքապետի տեղակալներին քաղաքապետի ներկայացմամբ նշանակում է ավագանին: 4. Քաղաքապետի առաջին տեղակալը պետք է լինի Երեւանի ավագանու անդամ: 5. Քաղաքապետի տեղակալներին պաշտոնից ազատում է քաղաքապետը: 6. Քաղաքապետի տեղակալներն իրականացնում են քաղաքապետարանի կանոնադրությամբ իրենց վերապահված լիազորությունները: 6.1. Քաղաքապետի տեղակալն օրենքով նախատեսված դեպքերում որպես համայնքի (Երեւանի) ներկայացուցիչ հանդես է գալիս դատարանում, ինչպես նաեւ իր իրավասության սահմաններում տալիս է դատարանում հանդես գալու լիազորագրեր: 6.2. (մասն ուժը կորցրել է 12.02.25 ՀՕ-39-Ն) 7. Քաղաքապետի հանձնարարությամբ քաղաքապետի տեղակալները կարող են իրականացնել նաեւ այլ լիազորություններ: 8. Քաղաքապետի տեղակալները չեն կարող զբաղվել ձեռնարկատիրական գործունեությամբ, զբաղեցնել այլ պաշտոն պետական կամ տեղական ինքնակառավարման մարմիններում կամ առեւտրային կազմակերպություններում, կատարել այլ վճարովի աշխատանք, բացի գիտական, մանկավարժական եւ ստեղծագործական աշխատանքից: 9. Քաղաքապետը կարող է ունենալ խորհրդականներ եւ օգնականներ, մամուլի քարտուղար: 10. Քաղաքապետի խորհրդականների եւ օգնականների թվաքանակը քաղաքապետի ներկայացմամբ սահմանում է ավագանին: 11. Քաղաքապետի խորհրդականներին, մամուլի քարտուղարին եւ օգնականներին պաշտոնի նշանակում եւ պաշտոնից ազատում է քաղաքապետը: (48-րդ հոդվածը լրաց. 25.03.20 ՀՕ-192-Ն, 28.10.20 ՀՕ-469-Ն, փոփ. 03.11.20 ՀՕ-485- Ն, 16.12.21 ՀՕ-429-Ն, 12.02.25 ՀՕ-39-Ն) Հոդված 48.1. Երեւանի գլխավոր ճարտարապետը (հոդվածն ուժը կորցրել է 16.12.21 ՀՕ-429-Ն)

Հոդված 49.Քաղաքապետի իրավական ակտերը 1. Քաղաքապետն իր իրավասության սահմաններում, ղեկավարվելով Հայաստանի Հանրապետության օրենսդրությամբ, ընդունում է որոշումներ, արձակում կարգադրություններ: 2. Քաղաքապետի իրավական ակտերն ընդունվելուց հետո՝ մեկշաբաթյա ժամկետում, ներկայացվում են լիազոր մարմին՝ նորմատիվ իրավական ակտերի հրապարակման միասնական կայքում հրապարակելու նպատակով (բացառությամբ աշխատանքային հարաբերություններից բխող իրավական ակտերի) եւ նույն ժամկետում տեղադրվում քաղաքապետարանի պաշտոնական համացանցային կայքում: 3. Քաղաքապետի իրավական ակտերն ուժի մեջ են մտնում «Նորմատիվ իրավական ակտերի մասին» օրենքով սահմանված կարգով: (49-րդ հոդվածը խմբ., լրաց. 14.11.23 ՀՕ-354-Ն)

Հոդված 50.Քաղաքապետի գործունեության կազմակերպումը 1. Քաղաքապետն իր գործունեությունը կազմակերպում է քաղաքապետի տեղակալի (տեղակալների), վարչական շրջանների ղեկավարների, քաղաքապետի խորհրդականների, օգնականների, մամուլի քարտուղարի, Երեւանի քաղաքապետարանի աշխատակազմի միջոցով: (50-րդ հոդվածը լրաց. 08.12.11 ՀՕ-345-Ն, փոփ. 16.12.21 ՀՕ-429-Ն)

Հոդված 51.Քաղաքապետարանի աշխատակազմը 1. Քաղաքապետարանի աշխատակազմի գործունեության կազմակերպումն ու ղեկավարումն իրականացնում է քաղաքապետարանի աշխատակազմի քարտուղարը: 2. Քաղաքապետարանում իրականացվում է համայնքային ծառայություն: Քաղաքապետարանի աշխատակազմում համայնքային ծառայությունը կարգավորվում է «Համայնքային ծառայության մասին» Հայաստանի Հանրապետության օրենքով: 3. Քաղաքապետարանի աշխատակազմն ունի կառուցվածքային (վարչություն, քարտուղարություն, բաժին) եւ առանձնացված (վարչական շրջանի ղեկավարի աշխատակազմ, բաժին, ծառայություն եւ այլն) ստորաբաժանումներ: 4. Քաղաքապետարանի աշխատակազմի քարտուղարը` 1) իր իրավասության շրջանակում կազմակերպում է քաղաքապետարանի աշխատակազմի գործունեությունը եւ իրականացնում է կառուցվածքային ստորաբաժանումների աշխատանքների համակարգումը. 2) ապահովում է քաղաքապետի որոշումների, կարգադրությունների կատարման ընթացքը, դրանց մասին զեկուցում քաղաքապետին. 3) մշակում եւ քաղաքապետի հաստատմանն է ներկայացնում քաղաքապետարանի աշխատակազմի աշխատանքային տարեկան եւ եռամսյակային ծրագրերը, վերահսկողություն է իրականացնում դրանց կատարման նկատմամբ, արդյունքների մասին զեկուցում է քաղաքապետին. 4) ապահովում է Երեւանի բյուջետային ծախսերի կատարումը. 5) կազմակերպում է Երեւանի բնակիչների ընդունելությունը, նրանց հանրագրերի, դիմումների ու բողոքների սահմանված կարգով քննարկումը. 5.1) հաստատում է Երեւանի տեղական ինքնակառավարման մարմինների նստավայրի տարածքում եւ շենքում գործող անվտանգության կանոնները. 6) իրականացնում է օրենքով եւ քաղաքապետարանի աշխատակազմի կանոնադրությամբ սահմանված այլ լիազորություններ: 5. Քաղաքապետարանի աշխատակազմի տեխնիկական սպասարկում իրականացնող անձանց աշխատանքի ընդունում եւ աշխատանքից ազատում է քաղաքապետարանի աշխատակազմի քարտուղարը: (51-րդ հոդվածը լրաց., փոփ. 08.12.11 ՀՕ-345-Ն, փոփ. 21.12.17 ՀՕ-17-Ն, լրաց. 23.03.18 ՀՕ-256-Ն)

Հոդված 52.Քաղաքապետի լիազորությունների ընդհանուր բնութագիրը 1. Քաղաքապետն իրականացնում է հետեւյալ սեփական լիազորությունները. 1) կազմակերպում է ավագանու աշխատանքները եւ ապահովում նրա բնականոն գործունեությունը, կատարում է ավագանու որոշումները, իրականացնում է քաղաքապետարանի աշխատակազմի ընդհանուր ղեկավարումը. 1.1) առանձին բնագավառների, գործառույթների եւ դրանք ապահովող կառուցվածքային ստորաբաժանումների, համայնքային կազմակերպությունների եւ հիմնարկների գործունեության համակարգումը վերապահում է քաղաքապետի տեղակալներին. 2) իր իրավասության սահմաններում միջոցներ է ձեռնարկում բնակիչների իրավունքները եւ ազատություններն ապահովելու համար. 3) օրենքով սահմանված կարգով նշանակում եւ ազատում է քաղաքապետարանի աշխատակազմի քարտուղարին, կառուցվածքային եւ առանձնացված ստորաբաժանումների ղեկավարներին. 4) սահմանում է Երեւանի շենքերի եւ շինությունների, ինչպես նաեւ հողամասերի համարակալումը, տալիս է համայնքի վարչական տարածքում անշարժ գույքի հասցեի տրամադրման թույլտվություն. 4.1) տալիս է համայնքի անվանումը ֆիրմային անվանման մեջ օգտագործելու թույլտվություն. 4.2) սահմանված կարգով տալիս է քաղաքացիական հոգեհանգստի (հրաժեշտի) ծիսակատարության ծառայություններ իրականացնելու եւ (կամ) մատուցելու թույլտվություն. 4.3) սահմանված կարգով տալիս է Երեւան քաղաքում շրջիկ առեւտրի կետի միջոցով վաճառքի կազմակերպման կամ ծառայության մատուցման թույլտվություն. 4.4) որոշում է ընդունում Հայաստանի Հանրապետության կառավարության սահմանած կարգի համաձայն շրջիկ առեւտրի իրականացման համար նախատեսված թույլատրելի վայրերը գծանշելու եւ համապատասխան նշանով կահավորելու վերաբերյալ: 4.5) սահմանված կարգով տալիս է Երեւանում շրջածախ առեւտուր իրականացնելու թույլտվություն. 5) ավագանուն է ներկայացնում Երեւանի սեփականություն համարվող գույքը օգտագործման տրամադրելու եւ օտարելու տարեկան ծրագիրը, դրան համապատասխան` տնօրինում է Երեւանի սեփականություն համարվող գույքը. 6) պաշտոնի նշանակում եւ պաշտոնից ազատում է քաղաքային կազմակերպությունների ղեկավարներին. 6.1) որոշում է ընդունում Երեւանի ենթակայության կազմակերպությունների կառուցվածքի, աշխատակիցների քանակի, հաստիքացուցակի եւ պաշտոնային դրույքաչափերի վերաբերյալ. 7) նշանակում եւ ազատում է վարչական շրջանի ղեկավարներին. 8) սահմանում է վարչական շրջանի ղեկավարի նստավայրը. 9) օրենքով կամ կառավարության սահմանած կարգով ինքնուրույն եւ սեփական պատասխանատվությամբ կազմակերպում եւ ղեկավարում է պետության պատվիրակած լիազորությունների իրականացումը. 10) ամենամյա հաշվետվություններ է ներկայացնում հանրությանը ավագանու, իր գործունեության եւ Երեւանի ընդհանուր սոցիալ-տնտեսական վիճակի մասին: Այդ հաշվետվությունները տեղադրվում են Երեւանի պաշտոնական համացանցային կայքում. 11) վերահսկողություն է իրականացնում վարչական շրջանի ղեկավարի գործունեության նկատմամբ եւ պատասխանատու է նրանց լիազորությունների պատշաճ իրականացման համար. 12) իրականացնում է Երեւանի սեփականություն համարվող ենթակառուցվածքների կառավարումը եւ ապահովում դրանց շահագործումը. 13) (կետն ուժը կորցրել է 23.03.18 ՀՕ-256-Ն) 14) ավագանուն է ներկայացնում առաջարկություն քաղաքապետին եւ վարչական շրջանի ղեկավարին կից հասարակական կարգով գործող խորհրդակցական խորհուրդների քանակի, անվանումների, ձեւավորման եւ գործունեության կարգի ու լիազորությունների վերաբերյալ. 14.1) (կետն ուժը կորցրել է 13.07.23 ՀՕ-262-Ն) 14.1. (կետն ուժը կորցրել է 10.09.19 ՀՕ-147-Ն) 14.3) հանդես է գալիս տեղական հանրաքվե անցկացնելու նախաձեռնությամբ. 14.4) ընդունում է տեղական հանրաքվե նշանակելու մասին որոշում. 15) բացառապես սույն օրենքով եւ այլ օրենքներով սահմանված այլ իրավասություններ: 2. Քաղաքապետն իրականացնում է հետեւյալ պատվիրակված լիազորությունները. 1) օրենքով սահմանված կարգով լուծում է Երեւանի տարածքում հավաքներ անցկացնելու հարցը. 1.1) մարզպետի կարգավիճակ ունեցող Երեւանի քաղաքապետի, Երեւան քաղաքի շրջանային խորհուրդների եւ նրանց գործադիր մարմինների, Երեւանի քաղաքային խորհուրդների ընդունած եւ իրենց իրավական ուժը պահպանած ակտերի պահանջների կատարման համար անհրաժեշտ փոփոխություններ եւ լրացումներ է կատարում համապատասխան ակտերում կամ ուժը կորցրած ճանաչում մարզպետի կարգավիճակ ունեցող Երեւանի քաղաքապետի, Երեւան քաղաքի շրջանային խորհուրդների եւ նրանց գործադիր մարմինների, Երեւանի քաղաքային խորհուրդների ընդունած եւ իրենց իրավական ուժը պահպանած ակտերը. 2) օրենքով Երեւանի քաղաքապետի համար պատվիրակված այլ լիազորություններ: 3. Երեւանում տեղական ինքնակառավարումն արդյունավետ իրականացնելու նպատակով քաղաքապետի որոշ լիազորություններ օրենքով տրվում են վարչական շրջանի ղեկավարին: 4. Քաղաքապետի առաջարկությամբ եւ ավագանու որոշմամբ վարչական շրջանի ղեկավարին կարող են պատվիրակվել նաեւ քաղաքապետի այլ լիազորություններ, բացառությամբ ավագանու հետ հարաբերություններում ունեցած լիազորությունների: (52-րդ հոդվածը լրաց. 06.12.12 ՀՕ-226-Ն, 26.02.15 ՀՕ-8-Ն, փոփ., խմբ., լրաց. 04.10.17 ՀՕ-137-Ն, լրաց. 21.03.18 ՀՕ-200-Ն, լրաց., փոփ. 23.03.18 ՀՕ-256-Ն, լրաց. 13.06.18 ՀՕ- 350-Ն, փոփ. 10.09.19 ՀՕ-147-Ն, լրաց. 24.01.20 ՀՕ-84-Ն, 11.02.21 ՀՕ-78-Ն, 17.11.21 ՀՕ- 353-Ն, 16.12.21 ՀՕ-429-Ն, խմբ. 16.12.21 ՀՕ-411-Ն, փոփ. 13.07.23 ՀՕ-262-Ն)

Հոդված 53.Քաղաքապետի լիազորությունները ավագանու հետ հարաբերություններում 1. Ավագանու հետ հարաբերություններում քաղաքապետն իրականացնում է հետեւյալ սեփական լիազորությունները. ավագանուն է ներկայացնում` 1) առաջարկություններ՝ Երեւանի ենթակայության կազմակերպությունների ստեղծման, վերակազմակերպման, լուծարման, կանոնադրության կամ դրա փոփոխությունների հաստատման, ինչպես նաեւ այլ կազմակերպություններում Երեւանի մասնակցության դադարեցման մասին. 2) (կետն ուժը կորցրել է 08.12.11 ՀՕ-345-Ն) 3) Երեւանի զարգացման միամյա, հնգամյա, երկարաժամկետ եւ հատուկ ծրագրերը (ներառյալ՝ «Պետություն-մասնավոր գործընկերության մասին» Հայաստանի Հանրապետության օրենքի շրջանակներում նախատեսված ՊՄԳ ծրագրերը). 4) քաղաքապետարանի աշխատակազմի եւ հիմնարկի կարգավիճակ ունեցող` Երեւանի ենթակայության այլ կազմակերպությունների կառուցվածքների, աշխատակիցների թվաքանակի, հաստիքացուցակի եւ պաշտոնային դրույքաչափերի վերաբերյալ որոշման նախագծերը եւ դրանցում առաջարկվող փոփոխությունները. 5) Երեւանի միջնաժամկետ ծախսերի ծրագիրը, բյուջեի նախագիծը եւ դրանցում առաջարկվող փոփոխությունները. 6) այն առեւտրային կազմակերպությունների խորհուրդների եւ վերստուգիչ մարմինների կազմերի վերաբերյալ որոշման նախագծերը, որոնց կանոնադրական կապիտալում Երեւանն ունի մասնակցություն. 7) տեղական հարկերի եւ տուրքերի (օրենքով սահմանված սահմաններում), ինչպես նաեւ քաղաքապետարանի մատուցած ծառայությունների դիմաց գանձվող վճարների տեսակների ու դրույքաչափերի մասին որոշման նախագծերը. 8) Երեւանի փողոցների, պողոտաների, հրապարակների, զբոսայգիների, Երեւանի ենթակայության կրթական, մշակութային եւ այլ կազմակերպությունների անվանման եւ վերանվանման որոշման նախագծերը եւ օրենքով սահմանված կարգով ներկայացնում է գրանցման (բացառությամբ պատմամշակութային ու բնության հուշարձանների). 9) Երեւան քաղաքի գլխավոր հատակագծի եւ դրա փոփոխությունների, ինչպես նաեւ նախագծման առաջադրանքի նախագծերը` Հայաստանի Հանրապետության օրենսդրությամբ սահմանված կարգով. 10) Երեւան քաղաքի գլխավոր հատակագծին համապատասխան մշակված Երեւանի առանձին տարածքների գոտիավորման, ինչպես նաեւ նախագծման առաջադրանքի նախագծերը. 11) հողամասերի նպատակային նշանակության փոփոխության մասին նախագծերը` Հայաստանի Հանրապետության օրենսդրությամբ սահմանված կարգով եւ դեպքերում. 12) Երեւանի զարգացման միամյա, հնգամյա, երկարաժամկետ եւ հատուկ ծրագրերում ներառում է երիտասարդական ծրագրեր՝ ելնելով երիտասարդների կարիքներից, ակնկալիքներից, ձգտումներից, երիտասարդների կյանքում առկա եւ պոտենցիալ մարտահրավերներից եւ հնարավորություններից, ինչպես նաեւ պետական երիտասարդական քաղաքականության ռազմավարական ծրագրից, կամ մշակում է Երեւան քաղաքի երիտասարդական քաղաքականությունը: 2. Սույն հոդվածի 1-ին մասի 1-8-րդ կետերում նշված հարցերի վերաբերյալ որոշումների ընդունման նախաձեռնությամբ կարող են հանդես գալ նաեւ ավագանու անդամները: (53-րդ հոդվածը խմբ., լրաց. 23.06.11 ՀՕ-229-Ն, խմբ., փոփ., լրաց. 08.12.11 ՀՕ-345-Ն, փոփ. 04.10.17 ՀՕ-137-Ն, լրաց. 28.06.19 ՀՕ-117-Ն, խմբ. 25.05.22 ՀՕ-135-Ն, լրաց. 05.03.25 ՀՕ-60-Ն)

Հոդված 54.Քաղաքապետի լիազորությունները ֆինանսների բնագավառում 1. Քաղաքապետը ֆինանսների բնագավառում իրականացնում է հետեւյալ սեփական լիազորությունները. 1) կազմում է Երեւանի միջնաժամկետ ծախսերի ծրագիրը, բյուջեի նախագիծը եւ սահմանված կարգով ներկայացնում ավագանուն. 2) տնօրինում է Երեւանի բյուջեի միջոցները, ապահովում է դրանց նպատակային օգտագործումը. 3) հսկում է գլխավոր ֆինանսիստի եւ քաղաքապետարանի աշխատակազմի քարտուղարի ֆինանսական գործունեությունը. 4) օրենքով սահմանված կարգով կազմակերպում է գույքահարկի ու հողի հարկի գանձումը, ինչպես նաեւ կազմակերպում է տեղական հարկերի եւ տուրքերի եւ իրենց մատուցած ծառայությունների դիմաց վճարների, Երեւանի սեփականություն համարվող գույքի վարձակալությունից եւ օտարումից մուտքերի գանձումն ու վերահսկումը. 5) Երեւանի բյուջեի հարկերը եւ օրենքով սահմանված այլ մուտքերը չվճարող անձանց (բացառությամբ եկամտային հարկ եւ շահութահարկ չվճարողների) նկատմամբ օրենքով սահմանված կարգով կիրառում է համապատասխան միջոցներ. 6) ավագանու առջեւ հանդես է գալիս բյուջեի կատարման վերաբերյալ տարեկան հաշվետվությամբ. 7) ապահովում է օրենսդրության շրջանակներում քաղաքապետարանում ներքին աուդիտի համակարգի առկայությունը: (54-րդ հոդվածը փոփ. 22.12.10 ՀՕ-260-Ն, 04.10.17 ՀՕ-137-Ն, խմբ. 25.05.22 ՀՕ-135-Ն)

Հոդված 55.Քաղաքապետի լիազորությունները քաղաքաշինության եւ կոմունալ տնտեսության բնագավառներում 1. Քաղաքաշինության եւ կոմունալ տնտեսության բնագավառներում քաղաքապետը իրականացնում է հետեւյալ սեփական լիազորությունները. 1) «Քաղաքաշինության մասին» Հայաստանի Հանրապետության օրենքով եւ այլ օրենքներով, այլ իրավական ակտերով համայնքի ղեկավարին քաղաքաշինության ոլորտում վերապահված լիազորությունների մասով քաղաքային նշանակության քաղաքաշինական գործունեության ոլորտում լիազորությունն իրականացնում է քաղաքապետը: Քաղաքային նշանակության քաղաքաշինական գործունեություն է համարվում այն ամենը, ինչն իրականացվում է քաղաքային նշանակության քաղաքաշինական գոտում կամ բավարարում է որոշակի պայմանների. 2) օրենքով սահմանված կարգով տալիս է քաղաքային նշանակության գովազդային գոտում (քաղաքային նշանակության փողոցներում եւ դրանց անմիջապես հարող տարածքներում, ինչպես նաեւ քաղաքային նշանակության հրապարակներում եւ այգիներում) արտաքին գովազդ տեղադրելու թույլտվություն. 3) ավագանուն է ներկայացնում վարչական շրջանի ղեկավարի կողմից կառավարվող բազմաբնակարան շենքերի պահպանման նպատակով պարտադիր նորմերի շրջանակներում իրականացվող աշխատանքների համար անհրաժեշտ վճարների չափերը. 4) իր իրավասության սահմաններում կազմակերպում է բնակարանային եւ այլ շինարարություն. 5) իրականացնում է քաղաքային նշանակության գոյություն ունեցող քաղաքաշինական օբյեկտներում հաշմանդամություն ունեցող անձանց եւ բնակչության սակավաշարժ խմբերի ազատ տեղաշարժման համար պայմաններ ստեղծելու ծրագիր. 5.1) ընդունում է համայնքային սեփականություն հանդիսացող հողամասում ինքնակամ կառույցի քանդման (ապամոնտաժման) մասին որոշում եւ իր լիազորությունների շրջանակներում օրենսդրությամբ սահմանված կարգով ապահովում է ինքնակամ կառույցի քանդման (ապամոնտաժման) մասին որոշման կատարումը. 6) կազմակերպում է ինքնակամ կառուցման կասեցման եւ ինքնակամ կառույցների վերացման ուղղությամբ վարչական շրջանի ղեկավարների կողմից կատարվող աշխատանքները. 7) վերահսկողություն է իրականացնում Երեւանի տարածքում գտնվող շենքերի, շինությունների նպատակային օգտագործման եւ պահպանման նկատմամբ. 8) կազմակերպում է քաղաքային գերեզմանատների գործունեությունը, վերահսկողություն է իրականացնում մասնավոր գերեզմանատների գործունեության նկատմամբ. 9) կազմակերպում է Երեւանի սեփականություն համարվող հաղորդակցության ուղիների, ջրմուղի, կոյուղու, գազի, ոռոգման ու ջեռուցման ցանցերի եւ ճարտարագիտական այլ կառույցների շահագործումը. 10) (կետն ուժը կորցրել է 04.10.17 ՀՕ-137-Ն) 11) կազմակերպում է աղբահանությունը, քաղաքային նշանակության փողոցների, հրապարակների, այգիների եւ ընդհանուր օգտագործման այլ հասարակական վայրերի մաքրումը, բարեկարգումը եւ կանաչապատումը. 11.1) իրականացնում է «Աղբահանության եւ սանիտարական մաքրման մասին» Հայաստանի Հանրապետության օրենքով նախատեսված այլ լիազորություններ. 12) կազմում է Երեւանի քաղաքաշինական կանոնադրության նախագիծը եւ ներկայացնում ավագանուն, վերահսկողություն է իրականացնում կանոնադրության պահանջների կատարման նկատմամբ. 13) իրականացնում է բազմաբնույթ կադաստրի (անտառային, քաղաքաշինական, կապի, տրանսպորտի, հուշարձանների եւ այլն) վարումը: 2. Քաղաքաշինության եւ կոմունալ տնտեսության բնագավառներում քաղաքապետն իրականացնում է հետեւյալ պատվիրակված լիազորությունները. 1) կառավարում է իր կառավարմանը հանձնված պետական սեփականություն համարվող ներհամայնքային հաղորդակցության ուղիների, ջրմուղի, կոյուղու, գազի, ոռոգման ու ջեռուցման ցանցերի եւ ճարտարագիտական այլ կառույցների շահագործումը. 2) ընդունում է Երեւան քաղաքի վարչական սահմաններում գտնվող պետական սեփականություն հանդիսացող հողամասում ինքնակամ կառույցի քանդման (ապամոնտաժման) մասին որոշում եւ իր լիազորությունների շրջանակներում օրենսդրությամբ սահմանված կարգով ապահովում է ինքնակամ կառույցի քանդման (ապամոնտաժման) մասին որոշման կատարումը: (55-րդ հոդվածը լրաց. 23.06.11 ՀՕ-239-Ն, փոփ. 04.10.17 ՀՕ-137-Ն, լրաց. 16.12.21 ՀՕ- 399-Ն, փոփ. 08.12.22 ՀՕ-526-Ն)

Հոդված 56.Քաղաքապետի լիազորությունները հասարակական կարգի պահպանության բնագավառում 1. Հասարակական կարգի պահպանության բնագավառում քաղաքապետը իրականացնում է հետեւյալ սեփական լիազորությունները. 1) հետեւում է համակեցության կանոնների պահպանմանը. 2) հետեւում է ավագանու հաստատած կանոնների պահանջների պահպանմանը. 3) Վարչական իրավախախտումների վերաբերյալ Հայաստանի Հանրապետության օրենսգրքով սահմանված դեպքերում վարչական պատասխանատվության է ենթարկում զանցառուներին. 4) միջոցառումներ է իրականացնում այդ զանցանքների կանխարգելման, նվազեցման, կանխման եւ բացահայտման համար: 2. Սույն հոդվածի 1-ին մասով սահմանված լիազորության իրականացման նպատակով քաղաքապետը ստեղծում է Երեւանի հասարակական կարգի պահպանության համայնքային ծառայություն: (56-րդ հոդվածը փոփ. 04.10.17 ՀՕ-137-Ն) Հոդված 56.1. Քաղաքապետի գործառույթները հանրային միջոցառումների կանոնակարգման բնագավառում (վերնագիրը փոփ. 04.10.17 ՀՕ-137-Ն) 1. Հանրային է հավաք չհամարվող այն միջոցառումը (տոնակատարություններ, մշակութային եւ մարզական միջոցառումներ եւ այլն), որը տեղի է ունենում բացօթյա վայրում (փողոց, մայթ, հրապարակ, այգի, պուրակ եւ այլն), կամ որին կարող են մասնակցել անձինք, որոնց շրջանակը անհատապես որոշված չէ հանրային միջոցառման կազմակերպչի կողմից: 2. Ծիսակատարությունների կազմակերպման եւ անցկացման կարգը սահմանվում է «Խղճի ազատության եւ կրոնական կազմակերպությունների մասին» Հայաստանի Հանրապետության օրենքի 7-րդ հոդվածով սահմանված կարգով: 3. Եթե ակնկալվում է, որ հանրային միջոցառման մասնակիցների թիվը գերազանցելու է երեք հարյուրը, ապա այդ հանրային միջոցառումն անցկացվում է քաղաքապետի տեղեկացմամբ: Տեղեկացումն իրականացնում է հանրային միջոցառման կազմակերպիչը հանրային միջոցառման անցկացման օրվանից ոչ ուշ, քան 3 օր առաջ, կազմակերպչի նախընտրած հետեւյալ եղանակներից որեւէ մեկով` անձամբ, հեռախոսով կամ փոստի միջոցով: 4. Եթե ակնկալվում է, որ հանրային միջոցառման մասնակիցների թիվը չի գերազանցելու երեք հարյուրը, ապա տեղեկացում չի պահանջվում, սակայն հանրային միջոցառման կազմակերպիչը հանրային միջոցառման անվտանգությունն ու բնականոն ընթացքն ապահովելու նպատակով կարող է հանրային միջոցառման անցկացման մասին տեղեկացնել քաղաքապետին: 5. Տեղեկացումը պետք է ներառի հետեւյալ տեղեկությունները. 1) հանրային միջոցառման վայրը, 2) հանրային միջոցառման սկզբի եւ ավարտի մոտավոր ժամանակը, 3) մասնակիցների սպասվող թիվը, 4) հանրային միջոցառման անցկացման համար օգտագործվելիք առարկաները կամ տեխնիկական միջոցները, 5) հանրային միջոցառման կազմակերպչի անունը, ազգանունը եւ առկայության դեպքում` հեռախոսահամարները։ 6. Քաղաքապետը հանրային միջոցառումն անցկացնելու մասին տեղեկացումը քննարկում է հանրային միջոցառման մասին տեղեկացումը ստանալու պահից 24 ժամվա ընթացքում: Եթե պատասխանի ժամկետի վերջին օրը ոչ աշխատանքային օր է, ապա պատասխանը ներկայացվում է դրան հաջորդող աշխատանքային օրը: 7. Եթե քաղաքապետին ներկայացված տեղեկացումից կամ նրա տրամադրության տակ գտնվող այլ տեղեկություններից պարզ է դառնում, որ նախատեսված հանրային միջոցառման ժամանակը, վայրը կամ եղանակը անմիջականորեն կարող են հանգեցնել սույն հոդվածի 12- րդ մասում նշված վտանգների առաջացմանը, ապա լիազոր մարմինը հանրային միջոցառման անցկացման համար կարող է առաջադրել պայմաններ։ Դրանք կարող են վերաբերել բացառապես հանրային միջոցառման անցկացման ժամանակին, վայրին կամ եղանակին։ 8. Պայմանների վերաբերյալ համաձայնություն ձեռք բերվելու դեպքում դրանք արձանագրվում են եւ կցվում գործին։ Պայմանների վերաբերյալ համաձայնություն ձեռք չբերվելու դեպքում լիազոր մարմինը որոշում է կայացնում հանրային միջոցառման ժամանակի, վայրի կամ եղանակի նկատմամբ սահմանափակումներ սահմանելու մասին։ 9. Հանրային միջոցառման անցկացման համար սահմանվող սահմանափակումները չեն կարող աղավաղել հանրային միջոցառման նպատակը կամ հանրային միջոցառման մասնակիցների տարածքային մեկուսացման, ինչպես նաեւ հանրային միջոցառման անցկացման ժամանակի փոփոխության միջոցով էականորեն նվազեցնել դրա պոտենցիալ ներգործությունը կազմակերպիչների նախընտրած հանրային լսարանի վրա կամ որեւէ այլ ձեւով հանգեցնել հանրային միջոցառման փաստացի արգելմանը։ 10. Այլ վայր առաջարկվելու դեպքում մասնավորապես պետք է ապահովվի տեղեկացման մեջ նշված՝ մասնակիցների սպասվող թվով մասնակցության հնարավորությունը, չպետք է առաջարկվեն կազմակերպիչների ընտրած համայնքի տարածքից դուրս վայրեր, իսկ առաջարկվող վայրը հնարավորինս պետք է մոտ լինի տեղեկացման մեջ նշված վայրին։ 11. Հանրային միջոցառման մասին տեղեկացման մեջ հիշատակված ժամանակում եւ վայրում այլ հանրային միջոցառման անցկացումն ինքնին հիմք չէ հանրային միջոցառման նկատմամբ սահմանափակումներ սահմանելու համար։ 12. Եթե ներկայացվել են միեւնույն օրը միեւնույն վայրում հանրային հավաք եւ հանրային միջոցառում անցկացնելու դիմումներ, ապա նախապատվությունը տրվում է հանրային հավաքին: 13. Եթե միեւնույն օրը միեւնույն վայրում հանրային հավաք անցկացնելու վերաբերյալ դիմումը ներկայացվել է ավելի ուշ, քան հանրային միջոցառում անցկացնելու վերաբերյալ դիմումը, նախապատվությունը տրվում է հանրային հավաքին, բացառությամբ այն դեպքերի, երբ` 1) հանրային միջոցառումն ակնկալվող մասնակիցների թվով էականորեն գերազանցելու է հանրային հավաքի մասնակիցների թիվը, կամ 2) հանրային միջոցառումը նախօրոք պլանավորված է եղել, եւ դրա տեղափոխումն այլ վայր կառաջացնի անհամարժեք բարդություններ կամ ծախսեր, եւ հանրային հավաքի անցկացման համար հնարավոր է առաջարկվել այլընտրանքային վայր, որը չի հանգեցնի հավաքի նպատակի աղավաղման կամ հավաքի մասնակիցների տարածքային մեկուսացման, ինչպես նաեւ հավաքի անցկացման ժամանակի կամ վայրի փոփոխության միջոցով էականորեն չի նվազեցնի դրա պոտենցիալ ներգործությունը կազմակերպիչների նախընտրած հանրային լսարանի վրա կամ որեւէ այլ ձեւով չի հանգեցնի հավաքի փաստացի արգելմանը։ 14. Քաղաքապետը կարող է արգելել հանրային միջոցառման անցկացումը, եթե դա անհրաժեշտ է` 1) անձանց կյանքի, առողջության կամ սեփականության պաշտպանության համար. 2) հանրության համար առաջացող էական անհարմարությունները կանխելու համար. 3) շրջակա միջավայրին անմիջականորեն սպառնացող էական վտանգը կանխելու համար: 15. Քաղաքապետը չի կարող արգելել հանրային միջոցառման անցկացումը, եթե միջոցառման անցկացման սահմանափակումների միջոցով հնարավոր է կանխել սույն հոդվածի 14-րդ մասում նշված վտանգները: 16. Եթե չեն առաջանում սույն հոդվածով սահմանված հանրային միջոցառումն արգելելու հիմքերը, ապա տեղեկացումը համարվում է ի գիտություն ընդունված: Տեղեկացումն ի գիտություն ընդունելու մասին քաղաքապետն անհապաղ տեղեկացնում է կազմակերպիչներին եւ Հայաստանի Հանրապետության ոստիկանությանը, ինչպես նաեւ դրա մասին գրություն է փակցնում տեղական ինքնակառավարման մարմնի վարչական շենքում` բոլորի համար մատչելի ու տեսանելի տեղում։ 17. Հանրային միջոցառման կազմակերպիչը` 1) որոշում է հանրային միջոցառման ընթացքը, 2) պարտավոր է ներկա լինել հանրային միջոցառմանը եւ հասանելի լինել ոստիկանության ներկայացուցչի համար, 3) հանրային միջոցառման ընթացքում պարտավոր է անհրաժեշտ միջոցներ ձեռնարկել հանրային միջոցառման բնականոն ընթացքն ապահովելու համար, մասնավորապես հանրային միջոցառման մասնակիցների կողմից բռնի գործողությունները կանխելու, բռնությունից զերծ մնալու եւ ուժի կիրառմանը պատրաստ մասնակիցներից սահմանազատվելու կոչերի միջոցով, 4) իրավունք ունի դիմելու ոստիկանության ծառայողներին` հանրային միջոցառման անցկացման վայրից հարկադիր դուրս բերելու այն անձանց, ովքեր կոպտորեն խախտում են հանրային միջոցառման բնականոն ընթացքը, 5) պարտավոր է հավաքի մասնակիցներին անմիջապես տեղեկացնել հանրային միջոցառման բնականոն ընթացքն ապահովելու վերաբերյալ ոստիկանության ծառայողների պահանջների մասին։ (56.1-ին հոդվածը լրաց. 14.04.11 ՀՕ-74-Ն, փոփ. 04.10.17 ՀՕ-137-Ն, 16.12.22 ՀՕ-474- Ն, 24.10.24 ՀՕ-441-Ն)

Հոդված 57.Քաղաքապետի լիազորությունները տրանսպորտի եւ ճանապարհաշինության բնագավառում 1. Տրանսպորտի եւ ճանապարհաշինության բնագավառում քաղաքապետն իրականացնում է հետեւյալ սեփական լիազորությունները. 1) կազմակերպում է քաղաքային նշանակության ավտոմոբիլային ճանապարհների, կամուրջների, թունելների, այլ ճարտարագիտական կառույցների շինարարությունը, պահպանումը եւ շահագործումը. 2) աջակցում է Երեւանի միջով անցնող միջպետական եւ հանրապետական նշանակության ավտոմոբիլային ճանապարհների տարանցիկ հատվածների շինարարության, պահպանման ու շահագործման աշխատանքների կազմակերպմանը. 3) կազմակերպում է Երեւանում հասարակական տրանսպորտի աշխատանքը (բացառությամբ Երեւանի մետրոպոլիտենի). 4) իրականացնում է հասարակական տրանսպորտը հաշմանդամություն ունեցող անձանց եւ բնակչության սակավաշարժ խմբերի ազատ տեղաշարժմանը հարմարեցնելու ծրագիր: 2. Քաղաքապետը սույն բնագավառում իրականացնում է հետեւյալ պատվիրակված լիազորությունները. 1) Երեւանի տարածքում ճանապարհային երթեւեկության կարգավորումը` ճանապարհային գծանշումների, ինչպես նաեւ երթեւեկության նշանների եւ լուսացույցների (բացառությամբ օրենսդրությամբ նախատեսված դեպքերում ժամանակավոր տեղադրվածների) տեղադրման միջոցով. 2) կազմակերպում է Երեւանի մետրոպոլիտենի աշխատանքները: (57-րդ հոդվածը փոփ. 04.10.17 ՀՕ-137-Ն, 08.12.22 ՀՕ-526-Ն)

Հոդված 58.Քաղաքապետի լիազորությունները անասնաբուժության եւ բուսասանիտարիայի բնագավառներում (վերնագիրը խմբ. 21.06.14 ՀՕ-139-Ն) 1. Քաղաքապետն անասնաբուժության եւ բուսասանիտարիայի բնագավառներում իրականացնում է պետության պատվիրակած հետեւյալ լիազորությունները` 1) աջակցում է անասնահակահամաճարակային տարեկան միջոցառումների պետական ծրագրի իրականացման աշխատանքներին. 2) աջակցում է անասնաբուժական ծառայության աշխատանքներին, կենդանիների հիվանդությունների կանխարգելման, ախտորոշման, բուժման եւ վերացման միջոցառումներին, կենդանիների դիակների, խոտանման ենթակա կենդանական ծագման մթերքի եւ հումքի մեկուսացման, վնասազերծման եւ ոչնչացման, տարածքների ախտահանման, օրգանական ծագման կենդանական թափոնների տեղադրման, պահման եւ այդ տարածքներ կենդանիների մուտքի արգելման, անասնաբուժական հսկողությամբ կենդանիների կենտրոնացված սպանդի, կենդանական ծագման հումքի եւ մթերքի հավաքման, պահեստավորման աշխատանքներին. 3) աջակցում է համայնքի տարածքում գյուղատնտեսական մշակաբույսերի հիվանդությունների, վնասատուների եւ մոլախոտերի դեմ պայքարի աշխատանքներին. 4) աջակցում է գյուղատնտեսական կենդանիների համարակալման, հաշվառման եւ գրանցման, ինչպես նաեւ սույն օրենքով եւ այլ իրավական ակտերով սահմանված` կենդանիների անձնագրերի, կենդանիների հաշվառման եւ անասնաբուժական միջոցառումների գրանցամատյանների վարման աշխատանքներին: 2. Քաղաքապետն անասնաբուժության բնագավառում իրականացնում է հետեւյալ սեփական լիազորությունը. 1) ապահովում է անասնաբուժական ծառայության գործունեության կազմակերպումը՝ համայնքն սպասարկող անասնաբույժի միջոցով: (58-րդ հոդվածը խմբ. 21.06.14 ՀՕ-139-Ն, լրաց. 21.12.17 ՀՕ-39-Ն)

Հոդված 59.Քաղաքապետի լիազորությունները հողօգտագործման բնագավառում 1. Հողօգտագործման բնագավառում քաղաքապետն իրականացնում է հետեւյալ սեփական լիազորությունները. 1) կազմակերպում է ապօրինի հողօգտագործման կասեցման եւ վերացման ուղղությամբ վարչական շրջանի ղեկավարների կողմից կատարվող աշխատանքները. 2) Հայաստանի Հանրապետության հողային օրենսգրքի 102-րդ հոդվածի 1-ին մասի 8.1-ին կետով նախատեսված հիմքով հայցադիմում է ներկայացնում դատարան՝ հողամասը հարկադիր կարգով օտարելու կամ փոխհատուցմամբ այն համայնքի սեփականությանը փոխանցելու պահանջով: 2. Հողօգտագործման բնագավառում քաղաքապետն իրականացնում է հետեւյալ պատվիրակված լիազորությունները. 1) (կետն ուժը կորցրել է 04.10.17 ՀՕ-137-Ն) 2) օրենսդրությամբ սահմանված կարգով իրականացնում է Երեւանի վարչական տարածքում գտնվող հողերի ընթացիկ հաշվառումը, ցամաքային տարածքի ծածկույթի ընթացիկ դասակարգումը, կազմում է Երեւանի հողային հաշվեկշիռը. 3) իր լիազորությունների շրջանակում տիրապետում եւ օգտագործում է իր կառավարմանը հանձնված պետական սեփականության հողերը. 4) սահմանված կարգով ապահովում է Երեւանի վարչական սահմաններում գտնվող գեոդեզիական կետերի եւ սահմանանիշերի պահպանությունը: (59-րդ հոդվածը փոփ. 04.10.17 ՀՕ-137-Ն, փոփ., լրաց. 16.01.18 ՀՕ-76-Ն, լրաց. 13.06.18 ՀՕ-362-Ն)

Հոդված 60.Քաղաքապետի լիազորությունները առեւտրի եւ սպասարկման բնագավառում 1. Առեւտրի եւ սպասարկման բնագավառում քաղաքապետն իրականացնում է հետեւյալ սեփական լիազորությունները. 1) օրենքով իրեն վերապահված լիազորությունների շրջանակում հսկողություն է իրականացնում առեւտրի, հանրային սննդի, կենցաղային եւ սահմանափակման ենթակա ծառայությունների ոլորտում. 2) ավագանու սահմանած կարգով եւ չափորոշիչներին համապատասխան` դիմումի հիման վրա առեւտրի եւ սպասարկման ոլորտի կազմակերպություններին շնորհում է որակի աստիճաններ. 3) Երեւան քաղաքի տարածքում տալիս է «Առեւտրի եւ ծառայությունների մասին» օրենքի 15.2-րդ հոդվածով սահմանված սահմանափակման ենթակա ծառայության օբյեկտների գործունեության թույլտվություն. 4) Երեւան քաղաքի տարածքում տալիս է հանրային սննդի ծառայություն մատուցող անձանց՝ տվյալ օբյեկտին հարակից ընդհանուր օգտագործման տարածքներում ամառային (մայիսի 1-ից հոկտեմբերի 31-ը ներառյալ) եւ ձմեռային (նոյեմբերի 1-ից ապրիլի 30-ը ներառյալ) սեզոններին հանրային սննդի ծառայության կազմակերպման թույլտվություններ. 5) ոչ սահմանված տեղերում կամ օրենսդրությամբ սահմանված պահանջների խախտմամբ առեւտուր իրականացնելու կամ ծառայություններ մատուցելու կամ առանց համապատասխան թույլտվության իրականացված բացօթյա առեւտրի կամ առանց թույլտվության կամ թույլտվությամբ սահմանված պահանջների կամ պայմանների խախտմամբ շրջածախ առեւտրի իրականացման դեպքում կիրառվում է առեւտրի իրականացման եւ ծառայությունների մատուցման առարկաների առգրավում: Քաղաքապետի որոշմամբ սույն մասով սահմանված առգրավելու իրավասությունը կարող է վերապահվել աշխատակազմի համապատասխան պաշտոնատար անձին: (60-րդ հոդվածը փոփ. 04.10.17 ՀՕ-137-Ն, փոփ., լրաց. 11.09.18 ՀՕ-379-Ն, 16.12.21 ՀՕ-425-Ն, լրաց. 22.03.23 ՀՕ-118-Ն)

Հոդված 61.Քաղաքապետի լիազորությունները կրթության, մշակույթի եւ երիտասարդության հետ տարվող աշխատանքների բնագավառում 1. Կրթության, մշակույթի եւ երիտասարդության հետ տարվող աշխատանքների բնագավառում քաղաքապետն իրականացնում է հետեւյալ սեփական լիազորությունները. 1) կազմակերպում է Երեւանի ենթակայության դպրոցների, մանկապարտեզների, ակումբների, մշակույթի տների, գրադարանների, կրթական եւ մշակութային այլ կազմակերպությունների գործունեությունը, դրանց շահագործման եւ նորոգման աշխատանքները. 2) իրականացնում է օրենքներով, այլ իրավական ակտերով համայնքի ղեկավարին սույն ոլորտում վերապահված սեփական լիազորությունները. 3) աջակցում է Երեւան քաղաքում կազմակերպվող երիտասարդական միջոցառումների իրականացմանը. 4) մասնակցում է պետական երիտասարդական քաղաքականության իրականացման աշխատանքներին. 5) վարչական շրջանում երիտասարդական քաղաքականության մշակումն ու իրականացումը ապահովելու նպատակով վարչական շրջանի աշխատակազմի աշխատողներից առնվազն մեկի գործառույթներում սահմանում է երիտասարդական աշխատողի գործառույթները կամ ավագանու հաստատմանն է ներկայացնում վարչական շրջանի հաստիքացուցակում երիտասարդական աշխատողի հաստիք սահմանելու վերաբերյալ առաջարկություն: 2. Սույն բնագավառում քաղաքապետն իրականացնում է հետեւյալ պատվիրակված լիազորությունը. 1) կազմակերպում է համապետական մշակութային, մարզական, ինչպես նաեւ պետական, ազգային տոների, հիշատակի օրերի հետ կապված հանրային միջոցառումներ: (61-րդ հոդվածը փոփ. 14.04.11 ՀՕ-74-Ն, 04.10.17 ՀՕ-137-Ն, լրաց. 05.03.25 ՀՕ-60-Ն)

Հոդված 62.Քաղաքապետի լիազորությունները առողջապահության, ֆիզիկական կուլտուրայի եւ սպորտի բնագավառում 1. Առողջապահության, ֆիզիկական կուլտուրայի եւ սպորտի բնագավառում քաղաքապետն իրականացնում է հետեւյալ սեփական լիազորությունները. 1) կառավարում է Երեւանի սեփականություն համարվող առողջապահական եւ մարզական կազմակերպությունները. 2) Երեւանի տարածքում ապահովում է համաճարակների կամ դրանց վտանգի դեպքում հատուկ ռեժիմի պահանջների կատարումը. 3) կազմակերպում է քաղաքային հանգստի գոտիների ստեղծումը, պահպանումն ու շահագործումը. 4) «Հայաստանի Հանրապետության բնակչության սանիտարահամաճարակային անվտանգության ապահովման մասին» օրենքի 20.2-րդ հոդվածով սահմանված կարգով կայացնում է կարանտին սահմանելու մասին որոշում: 2. Սույն բնագավառում քաղաքապետն իրականացնում է հետեւյալ պատվիրակված լիազորությունները. 1) օրենքով սահմանված կարգով մասնակցում է պետական սեփականություն համարվող առողջապահական եւ մարզական կազմակերպությունների կառավարմանը. 2) օրենքով սահմանված դեպքերում եւ կարգով մասնակցում է հիգիենիկ եւ հակահամաճարակային մարմինների սանիտարահիգիենիկ, հակահամաճարակային եւ կարանտինային միջոցառումների իրականացմանը. 3) օրենքով սահմանված դեպքերում եւ կարգով գնահատում է Երեւանի բնակիչների առողջության ցուցանիշները եւ առաջարկություններ է ներկայացնում լիազոր մարմնին. 4) օրենքով սահմանված դեպքերում եւ կարգով մասնակցում է Երեւանում պետական առողջապահական միջոցառումների իրականացմանը։ (62-րդ հոդվածը փոփ. 04.10.17 ՀՕ-137-Ն, լրաց. 04.09.20 ՀՕ-408-Ն)

Հոդված 63.Քաղաքապետի լիազորությունները սոցիալական պաշտպանության բնագավառում 1. Սոցիալական պաշտպանության բնագավառում քաղաքապետն իրականացնում է հետեւյալ սեփական լիազորությունը. 1) կազմակերպում է քաղաքային սոցիալական ապահովության հաստատությունների եւ կազմակերպությունների գործունեությունը։ 2. (մասն ուժը կորցրել է 04.03.20 ՀՕ-99-Ն) (63-րդ հոդվածը փոփ. 04.10.17 ՀՕ-137-Ն, 04.03.20 ՀՕ-99-Ն)

Հոդված 64.Քաղաքապետի լիազորությունները շրջակա միջավայրի պահպանության բնագավառում (վերնագիրը փոփ. 04.10.17 ՀՕ-137-Ն) 1. Շրջակա միջավայրի պահպանության բնագավառում քաղաքապետն իրականացնում է հետեւյալ սեփական լիազորությունները. 1) իրականացնում է Երեւանի սեփականություն համարվող հողերի պահպանությունը հողատարումից, ողողումներից, ճահճացումից, քիմիական, ռադիոակտիվ նյութերով եւ արտադրական թափոններով աղտոտումից. 2) իրականացնում է շրջակա միջավայրի պահպանության համայնքային ծրագրեր. 3) իրականացնում է Երեւանի սեփականություն համարվող հողերում բույսերի հիվանդությունների եւ վնասատուների դեմ պայքարի աշխատանքները. 4) քաղաքապետը շրջակա միջավայրի պահպանության ոլորտի պետական կառավարման մարմնի հետ համաձայնեցնելուց հետո Երեւանի ավագանուն է ներկայացնում յուրաքանչյուր տարվա համար Երեւանի շրջակա միջավայրի պահպանությանն ուղղված անհրաժեշտ միջոցառումների ցանկը եւ դրանց իրականացման ժամանակացույցը: 2. Սույն բնագավառում քաղաքապետն իրականացնում է հետեւյալ պատվիրակված լիազորությունները. 1) իրականացնում է բնապահպանական պետական ծրագրերով նախատեսված աշխատանքները Երեւանի տարածքում. 2) աջակցում է Երեւանի տարածքում գտնվող արգելոցների, արգելավայրերի հատուկ պահպանվող գոտիների պահպանությանը եւ օգտագործմանը, այդ տարածքներում որսագողության, ապօրինի ձկնորսության, ծառահատումների դեմ կազմակերպվող միջոցառումների իրականացմանը։ (64-րդ հոդվածը փոփ. 04.10.17 ՀՕ-137-Ն, 04.03.20 ՀՕ-123-Ն)

Հոդված 65.Քաղաքապետի հարաբերությունները պետական կառավարման համակարգի մարմինների եւ դրանց Երեւանի տարածքային ծառայությունների հետ (վերնագիրը փոփ. 21.01.20 ՀՕ-25-Ն) 1. Քաղաքապետը պետական կառավարման համակարգի մարմինների եւ դրանց Երեւանի տարածքային ծառայությունների հետ հարաբերություններում` 1) առաջարկություններ է ներկայացնում վերջիններիս իրավասությանը վերաբերող Երեւանին առնչվող հարցերի վերաբերյալ. 2) պետական կառավարման համակարգի Երեւանի տարածքային մարմինների ղեկավարների մասնակցությամբ կազմակերպում է խորհրդակցություններ, հրավիրում է մասնակիցների ուշադրությունը Երեւանին առնչվող խնդիրների վրա. 3) Երեւանի տարածքում ապօրինի շինարարության, ընդերքի օգտագործման, ինչպես նաեւ հողազավթումների, ապօրինի ծառահատման, որսագողության եւ ապօրինի ձկնորսության դեպքերի կանխման եւ արգելման հետ կապված` կարող է դիմել ոստիկանություն` համապատասխան աջակցություն ստանալու համար. 4) քաղաքապետը ոստիկանությանը տեղեկացնում է Երեւանում կազմակերպվող միջոցառումների (ներառյալ` հավաքների եւ հանրային միջոցառումների) վերաբերյալ, որի պարագայում ոստիկանությունը ձեռնարկում է անհրաժեշտ միջոցներ այդ միջոցառումների ընթացքում հասարակական կարգը պահպանելու, ինչպես նաեւ Երեւանի բնականոն գործունեությունն ապահովելու նպատակով. 5) քաղաքապետն իրավունք ունի պետական կառավարման համակարգի մարմին ներկայացնելու գրավոր, փաստարկված առաջարկություն` վերջինիս տարածքային ծառայության գործունեության վերաբերյալ։ (65-րդ հոդվածը փոփ. 14.04.11 ՀՕ-74-Ն, 21.01.20 ՀՕ-25-Ն)

Հոդված 66.Քաղաքապետի լիազորությունները արտակարգ իրավիճակներից բնակչության պաշտպանության եւ քաղաքացիական պաշտպանության կազմակերպման բնագավառում (վերնագիրը փոփ. 01.03.17 ՀՕ-55-Ն, խմբ. 04.10.17 ՀՕ-137-Ն) 1. Քաղաքապետը արտակարգ իրավիճակներից բնակչության պաշտպանության եւ քաղաքացիական պաշտպանության կազմակերպման բնագավառում իրականացնում է հետեւյալ սեփական լիազորությունները. 1) քաղաքապետը քաղաքացիական պաշտպանության պետն է. 2) քաղաքացիական պաշտպանության եւ արտակարգ իրավիճակների բնագավառում քաղաքապետն իրականացնում է «Տեղական ինքնակառավարման մասին» Հայաստանի Հանրապետության օրենքով եւ բնագավառը կարգավորող այլ օրենքներով համայնքի ղեկավարին վերապահված լիազորություններ: (66-րդ հոդվածը փոփ. 01.03.17 ՀՕ-55-Ն, փոփ., խմբ. 04.10.17 ՀՕ-137-Ն)

Հոդված 67.Քաղաքապետի լիազորությունները էլեկտրոնային հաղորդակցության, էլեկտրամատակարարման, ջրամատակարարման, գազամատակարարման բնագավառներում 1. Էլեկտրոնային հաղորդակցության, էլեկտրամատակարարման, ջրամատակարարման, գազամատակարարման բնագավառներում քաղաքապետն իրականացնում է հետեւյալ սեփական լիազորությունները. 1) Երեւանի տարածքում էլեկտրոնային հաղորդակցության, էլեկտրամատակարարման, ջերմամատակարարման, գազամատակարարման խնդիրների առնչությամբ քաղաքապետը հրավիրում է համապատասխան կազմակերպությունների պաշտոնատար անձանց, անցկացնում է խորհրդակցություններ եւ նրանց ուշադրությունն է հրավիրում ծագած խնդիրների լուծման անհրաժեշտության վրա. 2) էլեկտրոնային հաղորդակցության բնագավառում գերիշխող օպերատորները, ինչպես նաեւ էլեկտրամատակարարման, ջրամատակարարման, գազամատակարարման բնագավառներում ծառայություններ մատուցող մասնավոր կազմակերպությունները յուրաքանչյուր տարին մեկ քաղաքապետին են ներկայացնում հաղորդում` իրենց կատարած աշխատանքների ու պլանավորվող միջոցառումների վերաբերյալ. առանց քաղաքապետին նախօրոք տեղեկացնելու եւ նրա հետ համաձայնեցնելու` այս կազմակերպություններն իրավունք չունեն 3 ժամից ավելի երկար ժամանակով դադարեցնելու էլեկտրաէներգիայի, գազի եւ ջրի մատակարարումը, բացառությամբ վթարային դեպքերի: (67-րդ հոդվածը փոփ. 04.10.17 ՀՕ-137-Ն)

Հոդված 68.Քաղաքապետի լիազորությունները պաշտպանության կազմակերպման բնագավառում (վերնագիրը խմբ. 18.11.09 ՀՕ-217-Ն) 1. Երեւան քաղաքում պաշտպանության կազմակերպման բնագավառում քաղաքապետն իրականացնում է հետեւյալ սեփական լիազորությունները. 1) օրենքով սահմանված կարգով վարում է համայնքի զինապարտների գրանցամատյան, նրանց վերաբերյալ ցուցակները, ինչպես նաեւ ըստ բնակության վայրի հաշվառումից հանվելու, աշխատանքի ընդունվելու եւ աշխատանքից ազատվելու վերաբերյալ տվյալները ներկայացնում է տարածքային զինվորական կոմիսարիատ. 2) օրենքով սահմանված դեպքերում եւ կարգով մասնակցում է զորակոչի, զորահավաքի ու վարժական հավաքների կազմակերպմանը. 3) իրենց պարտականությունները խախտած զինապարտ քաղաքացիների վերաբերյալ տեղեկություններ ունենալու դեպքում այդ մասին անհապաղ գրավոր տեղեկատվություն է տրամադրում տարածքային զինվորական կոմիսարիատին: 2. (մասն ուժը կորցրել է 04.10.17 ՀՕ-137-Ն) 3. (մասն ուժը կորցրել է 12.02.25 ՀՕ-39-Ն) (68-րդ հոդվածը խմբ. 18.11.09 ՀՕ-217-Ն, փոփ. 04.10.17 ՀՕ-137-Ն, լրաց. 28.10.20 ՀՕ- 469-Ն, փոփ. 12.02.25 ՀՕ-39-Ն)

Հոդված 69.Քաղաքապետի՝ համայնքի կամավոր խնդիրների լուծմանն ուղղված լիազորությունները (վերնագիրը խմբ. 04.10.17 ՀՕ-137-Ն) 1. Քաղաքապետը, սույն օրենքով սահմանված սեփական եւ պետության պատվիրակած լիազորություններից բացի, օժտված է նաեւ ավագանու սահմանած կամավոր խնդիրների լուծմանն ուղղված լիազորություններով: 2. Համայնքի կամավոր խնդիրները սահմանում է համայնքի ավագանին: (69-րդ հոդվածը փոփ. 14.04.11 ՀՕ-74-Ն, խմբ. 04.10.17 ՀՕ-137-Ն)

Հոդված 70.Երեւանի բյուջեն 1. Երեւանի բյուջեն Երեւանի միջնաժամկետ ծախսերի ծրագրով նախատեսված եկամուտների (մուտքերի) ձեւավորման եւ ծախսման մեկ տարվա ֆինանսական ծրագիրն է, որը նպատակաուղղվում է Երեւանի զարգացման ծրագրի, ավագանու եւ քաղաքապետի՝ սույն օրենքով սահմանված լիազորությունների իրականացմանը: 2. Երեւանի բյուջեն ընդունվում է մեկ տարով: 3. Բյուջեն բաղկացած է վարչական եւ ֆոնդային մասերից: Բյուջեն կատարվում է օրենքով սահմանված կարգով: 4. Երեւանի բյուջեից քաղաքապետի պատվիրակված լիազորությունների իրականացումը չի կարող ֆինանսավորվել սույն օրենքի 73-րդ հոդվածով սահմանված (բացառությամբ 16-րդ կետում նշվածի) մուտքերի աղբյուրներից: 5. Տվյալ տարվա համար հաստատվող Երեւանի բյուջեում սույն օրենքի 73-րդ հոդվածում ներկայացված մուտքերի աղբյուրներից (բացառությամբ 3-5-րդ, 14-րդ, 16-րդ, 19-24-րդ կետերում նշվածների) միջոցների ստացումների ընդհանուր ծրագրված ծավալի առնվազն 3 տոկոսը նախատեսվում է համայնքի կամավոր խնդիրների լուծման նպատակով սահմանված լիազորությունների ֆինանսավորման համար: (70-րդ հոդվածը փոփ. 04.10.17 ՀՕ-137-Ն, խմբ. 25.05.22 ՀՕ-135-Ն)

Հոդված 71.Երեւանի բյուջեի քննարկումը եւ հաստատումը 1. Քաղաքապետը Երեւանի բյուջեի նախագիծը ավագանու քննարկմանն է ներկայացնում Հայաստանի Հանրապետության կառավարության կողմից ֆինանսական համահարթեցման սկզբունքով համայնքներին տրամադրվող դոտացիաների նախնական թվերի հրապարակումից հետո՝ երկամսյա ժամկետում: Բյուջեի նախագիծն ավագանու անդամներին է ուղարկվում քննարկումից առնվազն 20 օր առաջ: Եթե պետական բյուջեն ընդունելիս ֆինանսական համահարթեցման սկզբունքով Երեւանին տրամադրվող դոտացիայի նախնական թիվը փոփոխվում է, ապա քաղաքապետը երկշաբաթյա ժամկետում ավագանու հաստատմանն է ներկայացնում բյուջեի համապատասխան փոփոխությունները: 2. Ավագանու նիստում Երեւանի բյուջեի նախագծի քննարկման կարգը սահմանվում է օրենքով եւ ավագանու կանոնակարգով: 3. Երեւանի բյուջեն չընդունվելու դեպքում բյուջեի նոր նախագծի քննարկման ժամկետները կարող է որոշել ավագանին՝ համաձայնեցնելով քաղաքապետի հետ, կամ քաղաքապետը՝ հրավիրելով ավագանու արտահերթ նիստ: 4. Եթե ավագանին մինչեւ տարվա սկիզբը Երեւանի բյուջեն չի ընդունում, ապա ծախսերը կատարվում են նախորդ տարվա բյուջեի համամասնություններով: Այդ դեպքում քաղաքապետը պարտավոր է կատարել նախկինում կնքած պայմանագրերից բխող պարտավորությունները, չիրականացնել նոր ներդրումներ, իսկ ծախսերը կատարել նախորդ տարվա յուրաքանչյուր ամսում կատարված ծախսերից ոչ ավելի: 5. Բյուջետային տարվա ընթացքում քաղաքապետը կարող է տվյալ տարվա Երեւանի բյուջեի մասին ավագանու որոշմամբ հաստատված հատկացումների ընդհանուր գումարի 5 տոկոսի սահմաններում վերաբաշխել հաստատված հատկացումների գումարները այդ որոշմամբ սահմանված ծախսային ծրագրերի միջեւ, եթե տվյալ տարվա Երեւանի բյուջեի մասին ավագանու որոշմամբ այլ բան նախատեսված չէ: Բյուջետային տարվա ընթացքում քաղաքապետը կարող է կատարել յուրաքանչյուր ծրագրի գծով Երեւանի բյուջեի մասին ավագանու որոշմամբ սահմանված հատկացումների ընդհանուր գումարի 17 տոկոս չափաքանակը չգերազանցող ներքին վերաբաշխումներ տնտեսագիտական դասակարգման հոդվածների միջեւ, եթե տվյալ տարվա Երեւանի բյուջեի մասին ավագանու որոշմամբ այլ բան նախատեսված չէ: 6. Պետական լիազորված մարմինը մեթոդական եւ խորհրդատվական օգնություն է ցույց տալիս Երեւանի բյուջեի նախագծի մշակման նախապատրաստման ընթացքում, ինչպես նաեւ օրենքով սահմանված կարգով վերահսկում է բյուջետային գործընթացը: 7. Երեւանի բյուջեն կազմելու եւ ներկայացնելու կարգը սահմանվում է «Հայաստանի Հանրապետության բյուջետային համակարգի մասին» Հայաստանի Հանրապետության օրենքով:

Հոդված 72.Երեւանի բյուջեին ներկայացվող պահանջները 1. Բյուջետային տարվա համար Երեւանի բյուջեի յուրաքանչյուր (վարչական եւ ֆոնդային) մասում նախատեսված հաշվարկային-դրամարկղային ելքերը չեն կարող գերազանցել տվյալ տարվա բյուջեի համապատասխան մասերով նախատեսված հաշվարկային-դրամարկղային մուտքերը: 2. Բյուջեի ծախսերի նկատմամբ եկամուտների գերազանցումը կազմում է բյուջեի հավելուրդը, իսկ բյուջեի եկամուտների նկատմամբ ծախսերի գերազանցումը՝ բյուջեի դեֆիցիտը (այսուհետ՝ պակասուրդ): 3. Երեւանի բյուջեի պակասուրդը ֆինանսավորվում է օրենքով սահմանված կարգով ներգրավվող փոխառու, Երեւանի բյուջեի միջոցների տարեսկզբի ազատ մնացորդի, բյուջետային փոխատվությունների վերադարձից ստացվող, ինչպես նաեւ իրավաբանական անձանց կանոնադրական կապիտալում պետական մասնակցության մասնավորեցումից (բացառությամբ մինչեւ 2014 թվականի հունվարի 31-ը բնական գազի ոլորտի գազամատակարարման համակարգի ենթակառուցվածքների զարգացման նպատակներով կատարված մասնավորեցումների), պետական սեփականություն համարվող անշարժ գույքի օտարումից Երեւանի բյուջե օրենքով սահմանված չափերով մասհանվող միջոցների հաշվին: Երեւանի բյուջեի պակասուրդի գումարը չպետք է գերազանցի պակասուրդի ֆինանսավորման համար օրենքով սահմանված աղբյուրների ընդհանուր գումարը: 4. Երեւանի բյուջեի պակասուրդի կամ հավելուրդի չափը սահմանվում է Երեւանի ավագանու՝ տվյալ տարվա Երեւանի բյուջեի մասին որոշմամբ: 5. Տվյալ բյուջետային տարվա համար հաստատվող Երեւանի բյուջեի՝ 1) վարչական մասի ֆինանսավորման աղբյուրներով ապահովված պակասուրդի գումարը չի կարող գերազանցել տվյալ տարվան նախորդող (եզրափակված) բյուջետային տարում վարչական մասից ֆինանսավորման ենթակա, սակայն չֆինանսավորված ծախսերի գծով առկա պարտավորությունների ֆինանսավորմանն ուղղվող տվյալ տարվա Երեւանի բյուջեի վարչական մասի տարեսկզբի ազատ մնացորդի միջոցների գումարի, ինչպես նաեւ տվյալ տարվան նախորդող տարիներին Երեւանի բյուջեի վարչական մասից տրամադրված փոխատվությունների միջոցների վերադարձից տվյալ տարում ստացվելիք եւ նախորդ տարիներին ստացված փոխատվության գծով բյուջեի վարչական մասից տվյալ տարում մարվելիք գումարների տարբերության հանրագումարը. 2) ֆոնդային մասի պակասուրդի ֆինանսավորման նպատակով ներգրավվող փոխառու միջոցների (ներառյալ` համայնքային արժեթղթերի թողարկումից) զուտ (ստացված եւ մարված փոխառու միջոցների դրական տարբերության չափով) մուտքերի գումարը չի կարող գերազանցել այդ տարվան նախորդող երկրորդ եւ երրորդ բյուջետային տարիների Երեւանի բյուջեի ֆոնդային մասում փաստացի ստացված եկամուտների (առանց պաշտոնական դրամաշնորհների գումարների) միջին տարեկանի 30 տոկոսը: 6. Եթե Երեւանի բյուջեն հաստատվում է առանց պակասուրդի, ապա պետական լիազորված մարմինը բյուջետային գործընթացի նկատմամբ իրականացնում է միայն իրավական վերահսկողություն: 7. Երեւանի բյուջեի պակասուրդային լինելու դեպքում քաղաքապետը պետական լիազորված մարմնի հետ համատեղ վերջինիս սահմանած կարգով մշակում է բյուջեի պակասուրդը ծածկող վարկային պարտքերն աստիճանաբար մարելու ծրագիր: 8. Ծրագրի իրականացման ժամանակահատվածում այն բյուջեն կազմելու հիմք է: Այդ դեպքում պետական լիազորված մարմինը, բացի իրավական վերահսկողությունից, մշտական վերահսկողություն է իրականացնում ծրագրի կատարման ընթացքի նկատմամբ վարկային պարտքը մարելու ծրագրի իրականացման առնչությամբ: 9. Երեւանի բյուջեում պետք է առանձին բաժիններով սահմանվեն Երեւանի վարչական շրջանների ծախսերը: (72-րդ հոդվածը լրաց. 23.12.13 ՀՕ-195-Ն)

Հոդված 73.Երեւանի բյուջեի ձեւավորման աղբյուրները 1. Երեւանի բյուջեն ձեւավորվում է Երեւանի բյուջեին օրենքով եւ իրավական այլ ակտերով ամրագրվող մուտքերի աղբյուրներից, ներառյալ՝ 1) հողի հարկ՝ Երեւանի վարչական տարածքում գտնվող հողի համար. 2) գույքահարկ՝ Երեւանի վարչական տարածքում գտնվող գույքի համար. 3) Երեւանի տարածքում գանձվող եկամտային հարկից մասհանումներ. 4) Երեւանի տարածքում գանձվող շահութահարկից մասհանումներ. 5) բնապահպանական վճարներից մասհանումներ. 6) հողի հարկի եւ գույքահարկի գծով Երեւանի բյուջե կատարվող վճարումների բնագավառում բացահայտված հարկային օրենսդրության խախտումների համար հարկատուներից գանձվող տույժեր եւ տուգանքներ: Եկամտային հարկի, շահութահարկի եւ բնապահպանական վճարների գումարներից Երեւանի բյուջե կատարվող մասհանումների չափերը սահմանվում են յուրաքանչյուր տարվա պետական բյուջեի մասին օրենքով. 7) պետական տուրք` քաղաքացիական կացության ակտերի պետական գրանցման մարմինների կողմից քաղաքացիական կացության ակտեր գրանցելու, դրանց մասին քաղաքացիներին կրկնակի վկայականներ, քաղաքացիական կացության ակտերում կատարված գրառումներում փոփոխություններ, լրացումներ, ուղղումներ կատարելու եւ վերականգնելու կապակցությամբ վկայականներ տալու համար. 8) պետական տուրք` նոտարական գրասենյակների կողմից նոտարական ծառայություններ կատարելու, նոտարական կարգով վավերացված փաստաթղթերի կրկնօրինակներ տալու, նշված մարմինների կողմից գործարքների նախագծեր եւ դիմումներ կազմելու, փաստաթղթերի պատճեններ հանելու եւ դրանցից քաղվածքներ տալու համար. 9) տեղական հարկեր, տուրքեր եւ վճարներ. 10) Երեւանի սեփականություն համարվող հողերի վարձակալության կամ կառուցապատման իրավունքի դիմաց գանձվող վարձավճարներ, ինչպես նաեւ Երեւանի վարչական տարածքում գտնվող պետական սեփականություն համարվող այն հողերի վարձակալության կամ կառուցապատման իրավունքի դիմաց գանձվող վարձավճարներ, որոնց կառավարումը հանձնված է Երեւանի քաղաքապետին. 11) Երեւանի սեփականություն համարվող այլ գույքի վարձակալությունից առաջացած եկամուտներ. 12) վարչական իրավախախտումների համար քաղաքապետարանի կիրառած պատժամիջոցներից առաջացած եկամուտներ. 13) Երեւանի սեփականություն համարվող կազմակերպությունների տրամադրության տակ մնացած շահույթից Երեւանի ավագանու որոշումներով կատարվող մասհանումներ. 14) քաղաքապետարանի մատուցած ծառայությունների դիմաց գանձվող եւ Երեւանի բյուջեի եկամուտներին հաշվանցման ենթակա վճարներ. 15) Երեւանի սեփականություն համարվող, ինչպես նաեւ տիրազուրկ, ժառանգության իրավունքով, ֆիզիկական եւ իրավաբանական անձանցից նվիրատվության կարգով Երեւանին որպես սեփականություն անցած հիմնական միջոց կամ ոչ նյութական ակտիվ չհամարվող գույքի օտարումից եկամուտներ. 16) պետության կողմից քաղաքապետին պատվիրակված լիազորությունների իրականացման համար Երեւանի բյուջեից ծախսերի ֆինանսավորման նպատակով պետական բյուջեից տրամադրվող հատկացումներ. 17) տիրազուրկ, ժառանգության իրավունքով, ինչպես նաեւ ֆիզիկական եւ իրավաբանական անձանցից (բացառությամբ պետության, հանրապետության այլ համայնքների, միջազգային կազմակերպությունների եւ օտարերկրյա պետությունների տեղական ինքնակառավարման մարմինների) նվիրատվության կարգով Երեւանին որպես սեփականություն անցած դրամական միջոցներ. 18) համայնքային սեփականություն համարվող հիմնական միջոցների, հողերի եւ ոչ նյութական ակտիվների օտարումից, ներառյալ` համայնքի սեփականություն համարվող լուծարված կազմակերպությունների մնացորդային գույքի օտարումից ստացվող, ինչպես նաեւ համայնքի սեփականություն համարվող պահուստներում պահվող ապրանքանյութական արժեքների իրացումից ստացվող միջոցներ. 19) պետական բյուջեից ֆինանսական համահարթեցման սկզբունքով տրամադրվող դոտացիաներ. 20) պետական բյուջեից տրամադրվող այլ դոտացիաներ եւ ծախսերի ֆինանսավորման նպատակային հատկացումներ (սուբվենցիաներ). 21) այլ աղբյուրներից ստացվող պաշտոնական դրամաշնորհներ. 22) վարկերի եւ փոխատվությունների ձեւով ներգրավված միջոցներ, ընդ որում` քաղաքապետարանի թողարկած պարտատոմսերի տեղաբաշխումից ստացված միջոցներ: Քաղաքապետարանի կողմից պարտատոմսեր թողարկելու եւ տեղաբաշխելու կարգը սահմանում է Հայաստանի Հանրապետության կառավարությունը. 23) Երեւանի բյուջեի միջոցների տարեսկզբի ազատ մնացորդը, ինչպես նաեւ տվյալ տարվան նախորդող (եզրափակված) բյուջետային տարիներին Երեւանի բյուջեից տրամադրված բյուջետային փոխատվության վերադարձից տվյալ տարում ստացվող մուտքերը. 24) Երեւանի վարչական տարածքում տեղաբաշխված իրավաբանական անձանց կանոնադրական կապիտալում պետական մասնակցության մասնավորեցումից (բացառությամբ մինչեւ 2014 թվականի հունվարի 31-ը բնական գազի ոլորտի գազամատակարարման համակարգի ենթակառուցվածքների զարգացման նպատակներով իրականացված գործարքների), պետական սեփականություն համարվող անշարժ գույքի, ներառյալ` անավարտ շինարարության օբյեկտների մասնավորեցումից եւ օտարումից ստացված միջոցներ` ստացվող մուտքերի 30 տոկոսի չափով, որոնք ուղղվում են Երեւանի բյուջեի ֆոնդային մաս` համաքաղաքային կապիտալ բնույթի ծախսերի ֆինանսավորմանը: Նշված միջոցները փոխանցվում են Հայաստանի Հանրապետության օրենսդրությամբ սահմանված կարգով բացված հատուկ հաշվին: Երեւանի ավագանին սույն կետում նշված միջոցները կարող է ուղղել բացառապես Հայաստանի Հանրապետության կառավարության որոշմամբ հավանության արժանացած ծրագրերի ֆինանսավորմանը` Հայաստանի Հանրապետության կառավարության սահմանած կարգով. 25) «Պետություն-մասնավոր գործընկերության մասին» Հայաստանի Հանրապետության օրենքով նախատեսված ՊՄԳ ծրագրի շրջանակներում առաջացած ֆինանսական միջոցներ, եթե ՊՄԳ ծրագիրը նախատեսում է Երեւանի համար նման ֆինանսական միջոցների առաջացում: (73-րդ հոդվածը փոփ. 22.12.10 ՀՕ-260-Ն, լրաց. 23.12.13 ՀՕ-195-Ն, 28.06.19 ՀՕ-117- Ն, փոփ., լրաց. 12.09.23 ՀՕ-279-Ն)

Հոդված 74.Երեւանի բյուջեի վարչական եւ ֆոնդային մասերը 1. Երեւանի բյուջեի վարչական եւ ֆոնդային մասերին ամրագրվող բյուջետային մուտքերի աղբյուրները սահմանվում են Հայաստանի Հանրապետության բյուջետային օրենսդրությամբ, իսկ այդ աղբյուրների հաշվին Երեւանի բյուջեի համապատասխան մասերից ելքերի իրականացման ուղղությունները՝ սույն օրենքով եւ Հայաստանի Հանրապետության բյուջետային օրենսդրությամբ: 2. Երեւանի բյուջեի վարչական մասից ֆինանսավորվում են սեփական լիազորությունների հետ կապված ընթացիկ (Հայաստանի Հանրապետության բյուջետային օրենսդրությամբ սահմանված իմաստով), պետության կողմից պատվիրակված լիազորությունների կատարման եւ ֆոնդային մասի միջոցների մասհանումների գծով ծախսերը, վարչական մասի ծախսերի ֆինանսավորման նպատակով ներգրաված բյուջետային փոխատվությունների մարումը, ինչպես նաեւ բյուջետային փոխատվությունների տրամադրումը: 3. Երեւանի բյուջեի ֆոնդային մասից ֆինանսավորվում են սեփական լիազորությունների հետ կապված կապիտալ (Հայաստանի Հանրապետության բյուջետային օրենսդրությամբ սահմանված իմաստով) ծախսերը, ֆոնդային մասի ծախսերի ֆինանսավորման նպատակով ներգրաված վարկերի մարումը, ինչպես նաեւ բյուջետային փոխատվությունների տրամադրումը: (74-րդ հոդվածը փոփ. 04.10.17 ՀՕ-137-Ն)

Հոդված 75.Երեւանի բյուջեի պահուստային ֆոնդը 1. Երեւանի բյուջեն ունի պահուստային ֆոնդ, որը կարող է օգտագործվել տվյալ տարվա բյուջեով չկանխատեսված ծախսերի կամ նախատեսված ծախսերի լրացուցիչ ֆինանսավորման համար: 2. Բյուջեի վարչական մասի պահուստային ֆոնդը կարող է նախատեսվել բյուջեի վարչական մասի եկամուտների 5-ից 30 տոկոսի չափով: 3. Երեւանի բյուջեի ֆոնդային մասում կարող է ձեւավորվել պահուստային ֆոնդ, որը չի կարող գերազանցել բյուջեի ֆոնդային մասի եկամուտների 30 տոկոսը: Երեւանի բյուջեի վարչական մասի պահուստային ֆոնդից կարող են ֆինանսական միջոցներ ուղղվել ֆոնդային մաս: Ֆոնդային մասի ֆինանսական միջոցները չեն կարող փոխանցվել բյուջեի վարչական մաս, բացառությամբ բյուջետային տարվա առանձին ժամանակահատվածում վարչական բյուջեում առաջացող պակասուրդի ֆինանսավորման համար՝ ավագանու առաջարկությամբ, Հայաստանի Հանրապետության կառավարության որոշմամբ եւ սահմանած կարգով տվյալ բյուջետային տարում ֆոնդային բյուջե վերադարձնելու պայմանով համայնքի ֆոնդային բյուջեից ժամանակավոր ազատ միջոցների բյուջեի վարչական մաս ուղղելու դեպքերի (ընդ որում` այդ միջոցների ընդհանուր գումարը չի կարող գերազանցել համայնքի տվյալ տարվա բյուջեի վարչական մասի եկամուտների գծով հաստատված տարեկան ընդհանուր գումարի եւ ֆոնդային մասից միջոցների ներգրավման ամսվա 1-ի դրությամբ համայնքի բյուջեի վարչական մասի եկամուտների փաստացի մուտքերի ընդհանուր գումարի տարբերության մեկ երկրորդը): 4. Պահուստային ֆոնդերը կարող են օգտագործվել միայն ավագանու որոշմամբ: Բյուջետային տարվա առանձին ժամանակահատվածներում վարչական բյուջեում առաջացող պակասուրդի ֆինանսավորման նպատակով ֆոնդային մասի ժամանակավոր ազատ միջոցները մինչեւ նույն բյուջետային տարվա ավարտը ամբողջ ծավալով Երեւանի բյուջեի ֆոնդային մաս չվերադարձնելու դեպքում քաղաքապետը պետական լիազորված մարմնի հետ համատեղ Հայաստանի Հանրապետության կառավարության սահմանած կարգով մշակում է այդ գումարները ֆոնդային մաս վերադարձնելու ծրագիր` մեկ բյուջետային տարվա կտրվածքով: Ծրագրի իրականացման ժամանակահատվածում դա Երեւանի բյուջեն կազմելու հիմք է: Այդ դեպքում պետական լիազորված մարմինը, բացի իրավական վերահսկողությունից, մշտական վերահսկողություն է իրականացնում ծրագրի կատարման ընթացքի նկատմամբ բյուջետային տարվա առանձին ժամանակահատվածներում վարչական բյուջեում առաջացող պակասուրդի ֆինանսավորման նպատակով ներգրաված ֆոնդային մասի ժամանակավոր ազատ միջոցների ֆոնդային մաս չվերադարձված գումարները վերադարձնելու ծրագրի իրականացման առնչությամբ: (75-րդ հոդվածը խմբ. 22.11.23 ՀՕ-373-Ն)

Հոդված 76.Երեւանի բյուջեի միջոցների տարեսկզբի ազատ մնացորդը 1. Երեւանի տվյալ տարվա բյուջեի միջոցների տարեսկզբի ազատ մնացորդը նախորդ տարվա բյուջեի կատարման ընթացքում իրականացված ելքերի նկատմամբ մուտքերի գերազանցումն է, որը Երեւանի ավագանու որոշումներով կարող է օգտագործվել տվյալ տարվա բյուջեով նախատեսված ելքերի լրացուցիչ ֆինանսավորման կամ չկանխատեսված ելքերի ֆինանսավորման նպատակով: 2. Երեւանի բյուջեի վարչական մասի տարեսկզբի ազատ մնացորդի գումարն ուղղվում է՝ 1) նախորդ (եզրափակված) բյուջետային տարում բյուջեի վարչական մասից ֆինանսավորման ենթակա, սակայն չֆինանսավորված՝ առկա պարտավորությունների կատարմանը. 2) վերը նշված պարտավորությունները կատարելուց հետո առաջացած միջոցների մնացորդն ուղղվում է Երեւանի բյուջեի ֆոնդային մաս՝ ավագանու որոշմամբ սահմանված ելքերի ֆինանսավորման համար:

Հոդված 77.Երեւանի միջնաժամկետ ծախսերի ծրագրի եւ բյուջեի հրապարակումը (վերնագիրը խմբ. 25.05.22 ՀՕ-135-Ն) 1. Երեւանի միջնաժամկետ ծախսերի ծրագիրը եւ բյուջեն հրապարակվում են «Նորմատիվ իրավական ակտերի մասին» օրենքով սահմանված կարգով: 2. Երեւանի միջնաժամկետ ծախսերի ծրագիրը եւ բյուջեն Երեւանի բնակչության համար առավել մատչելի դարձնելու համար պատրաստվում եւ հրատարակվում են հիմնական ցուցանիշներ, վիճակագրական եւ գրաֆիկական տվյալներ պարունակող տեղեկատուներ ու գրքույկներ: (77-րդ հոդվածը խմբ. 25.05.22 ՀՕ-135-Ն)

Հոդված 78.Երեւանի բյուջեի կատարումը 1. Քաղաքապետը Երեւանի բյուջեի հիման վրա ճշտում է քաղաքապետարանի աշխատակազմի, դրա կառուցվածքային եւ առանձնացված ստորաբաժանումների եւ քաղաքային ենթակայության կազմակերպությունների խնդիրները, հաստատում է դրանց դրամարկղային գործառնությունների եռամսյակային կամ ամսական պլանները: 2. Քաղաքապետը օրենքով սահմանված կարգով ապահովում է բյուջեի կատարումը եւ հսկում է ֆինանսական գործառնությունները ճշգրիտ ու օրենքին համապատասխան կատարելու համար: 3. Երեւանի ենթակայության կազմակերպությունների կողմից ապրանքների, աշխատանքների եւ ծառայությունների ձեռքբերման գործընթացն իրականացվում է «Գնումների մասին» Հայաստանի Հանրապետության օրենքով սահմանված կարգով:

Հոդված 79.Երեւանի բյուջեի կատարման սպասարկումը 1. Երեւանի բյուջեի կատարման սպասարկումն օրենքով եւ այլ իրավական ակտերով սահմանված կարգով իրականացվում է պետական ֆինանսների կառավարման լիազոր պետական մարմնի գանձապետական ստորաբաժանումների (այսուհետ՝ գանձապետական ստորաբաժանումներ) միջոցով, որտեղ Երեւանն ունի իր առանձին բյուջետային հաշվի համարը: 2. Երեւանի հաստատված բյուջեն, ինչպես նաեւ բյուջեում կատարված փոփոխությունները մեկշաբաթյա ժամկետում ներկայացվում են Երեւանի բյուջեն սպասարկող գանձապետական ստորաբաժանում, որը պարտավոր է համայնքի պահանջով անհապաղ կատարել համապատասխան ֆինանսական միջոցների հատկացումը, եթե դրանք առկա են բյուջեի հաշվում, նախատեսված են Երեւանի բյուջեով, եւ ֆինանսական միջոցներ հատկացնելու մասին համայնքի պահանջը գանձապետական ստորաբաժանում ներկայացված է Հայաստանի Հանրապետության օրենսդրությամբ սահմանված կարգով: 3. Երեւանին հատուկ ծրագրերի իրականացման նպատակով մասնավոր անձանց կողմից նվիրատվության կարգով տրամադրված ֆինանսական միջոցներն այդ անձանց պահանջով, պետական լիազորված մարմնի համաձայնությամբ եւ ավագանու որոշմամբ կարող են տեղադրվել որեւէ բանկում: 4. Գանձապետական ստորաբաժանումները Երեւանի բյուջեի մուտքերի եւ ելքերի մասին քաղաքապետին ներկայացնում են ամենօրյա տեղեկություններ:

Հոդված 80.Երեւանի բյուջեի մուտքերի ապահովումը 1. Հողի հարկի, գույքահարկի, տեղական հարկերի, տուրքերի եւ վճարների, պետական սեփականություն համարվող հողերի վարձավճարների, Երեւանի սեփականություն համարվող գույքի վարձավճարների, Երեւանի մասնակցությամբ կազմակերպությունների՝ իրենց հասանելիք շահույթի մասնաբաժնի, ինչպես նաեւ Երեւանի սեփականության օտարումից ստացվող գումարների եւ պարտադիր այլ վճարների մուտքագրումը Երեւանի բյուջե ինքնուրույն ապահովում են Երեւանի համապատասխան ստորաբաժանումները: Այլ մուտքերը Երեւանի բյուջե ապահովվում են օրենսդրությամբ սահմանված կարգով: 2. Ազգային ժողովի ընդունած օրենքներով Երեւանի եկամուտների նվազեցումը եւ ծախսերի ավելացումը պետք է փոխհատուցի պետությունը, բացառությամբ հարկային եկամուտների գծով օրենքով սահմանված դեպքերում հարկային պարտավորությունների դադարեցման (բացի հարկային արտոնությունների տրամադրումից եւ հարկի վերացումից) եւ օրենքով սահմանված այլ դեպքերի։

Հոդված 81.Երեւանի բյուջեի կատարման վերահսկողությունը 1. Երեւանի բյուջեի կատարման վերահսկողությունն իրականացնում է Երեւանի ավագանին, որն իրավազոր է ստուգելու յուրաքանչյուր բյուջետային գործողություն, աշխատանքների կատարման արդյունավետությունը եւ որակը, պահանջելու հաշվետվություններ՝ կատարված ծախսերի վերաբերյալ: 2. Երեւանի բյուջեի կատարման վերահսկողությունն արդյունավետ իրականացնելու նպատակով ավագանին պարտավոր է սահմանված կարգով ներգրավել աուդիտորական ծառայություններ, որոնց դիմաց վճարումը կատարվում է Երեւանի բյուջեից: 3. Պետությունը Երեւանի բյուջեի կատարման վերահսկողությունն իրականացնում է Հաշվեքննիչ պալատի եւ Հայաստանի Հանրապետության կառավարության միջոցով` օրենքով իրենց վերապահված լիազորությունների շրջանակում: (81-րդ հոդվածը փոփ. 16.01.18 ՀՕ-67-Ն) (հոդվածը 29.05.25 ՀՕ-190-Ն օրենքի փոփոխության մասով ուժի է մտնում ««Պետական վերահսկողական ծառայության մասին» օրենքում փոփոխություն կատարելու մասին» օրենքի 2-րդ հոդվածի 2-րդ մասով սահմանված վարչապետի որոշման ընդունումից հետո՝ եռամսյա ժամկետում) (29.05.25 ՀՕ-190-Ն օրենքն ունի անցումային դրույք)

Հոդված 82.Երեւանի բյուջեի կատարման հաշվետվության հաստատումը 1. Քաղաքապետը Երեւանի բյուջեի կատարման տարեկան հաշվետվությունը ավագանուն ներկայացնում է մինչեւ հաշվետու բյուջետային տարվան հաջորդող տարվա մարտի 1-ը: 2. Քաղաքապետի ներկայացրած բյուջեի կատարման տարեկան հաշվետվության վերաբերյալ աուդիտորական վերստուգիչ մարմինն ավագանուն ներկայացնում է իր ուսումնասիրությունների արդյունքները եւ եզրակացությունները: 3. Ավագանու նիստում քաղաքապետը պատասխանում է ավագանու անդամների հարցերին եւ տալիս անհրաժեշտ բացատրություններ: 4. Ավագանին բյուջեի կատարման տարեկան հաշվետվության վերաբերյալ անցկացնում է անկախ աուդիտ, իսկ իրավախախտումներ հայտնաբերելու դեպքում կարող է դիմել համապատասխան իրավասու մարմինների: 5. Ավագանին քննարկումն ավարտելուց հետո որոշում է կայացնում բյուջեի կատարման հաշվետվությունը հաստատելու մասին: 6. Ավագանու նիստում Երեւանի բյուջեի կատարման տարեկան հաշվետվության քննարկման կարգը սահմանվում է ավագանու կանոնակարգով: 7. Երեւանի բյուջեի կատարման տարեկան հաշվետվությունը, ինչպես նաեւ Երեւանի ավագանու կողմից այդ հաշվետվության քննարկման եւ հաստատման ժամկետը սահմանվում են Հայաստանի Հանրապետության բյուջետային օրենսդրությամբ: 8. Երեւանի բյուջեի կատարման տարեկան հաշվետվության քննարկման եւ հաստատման հետ կապված՝ սույն օրենքով չկարգավորված հարցերը կանոնակարգվում են «Հայաստանի Հանրապետության բյուջետային համակարգի մասին» Հայաստանի Հանրապետության օրենքով:

Հոդված 83.Երեւանի զարգացման ծրագրերը 1. Երեւանի զարգացման ծրագիրը փաստաթուղթ է, որը բովանդակում է Երեւանի սոցիալ- տնտեսական վիճակը, ինչպես նաեւ զարգացման հիմնական ուղղությունների, տարածական պլանավորման եւ ենթակառուցվածքների ընդհանուր զարգացման վիճակի վերլուծությունն ու կանխատեսումները: 2. Քաղաքապետը կազմում եւ ավագանուն է ներկայացնում Երեւանի զարգացման միամյա, հնգամյա, երկարաժամկետ եւ հատուկ ծրագրեր: «Պետություն-մասնավոր գործընկերության մասին» Հայաստանի Հանրապետության օրենքի շրջանակներում նախատեսված ՊՄԳ ծրագրերը համարվում են հատուկ ծրագրեր եւ կարող են կազմված չլինել քաղաքապետի կողմից: 3. Ծրագրի իրականացման վերաբերյալ քաղաքապետը հաշվետվություն է ներկայացնում ավագանուն: 4. Երեւանի զարգացման ծրագրերը ենթակա են հրապարակման ավագանու սահմանած կարգով: 5. Երեւանի զարգացման ծրագրի իրականացմանը խոչընդոտող հանգամանքներ ի հայտ գալու դեպքում քաղաքապետը կարող է նախաձեռնել Երեւանի զարգացման ծրագրում փոփոխությունների կատարում: 6. Երեւանի զարգացման ծրագրի առանձին բաժիններում սահմանվում են Երեւանի վարչական շրջանների զարգացման ծրագրերը: 7. Քաղաքապետը տարեկան բյուջեի նախագիծը մշակելիս հաշվի է առնում Երեւանի բնակչության կենսական շահերը, Երեւանի զարգացման ծրագրերը, Երեւանի միջնաժամկետ ծախսերի ծրագիրը, ինչպես նաեւ առկա ռեսուրսները: (83-րդ հոդվածը փոփ. 04.10.17 ՀՕ-137-Ն, լրաց. 28.06.19 ՀՕ-117-Ն, խմբ. 25.05.22 ՀՕ- 135-Ն)

Հոդված 84.Երեւանի բյուջեի վարկերը եւ փոխատվությունները 1. Քաղաքապետը Երեւանի ավագանու որոշմամբ բյուջեի ծախսերը կատարելու նպատակով պետական ֆինանսների կառավարման լիազորված մարմնի համաձայնությամբ կարող է ստանալ բյուջետային վարկեր եւ փոխատվություններ (այլ համայնքի բյուջեից փոխատվություն ստանալու համար պահանջվում է նաեւ փոխատվություն տրամադրող համայնքի ավագանու համաձայնությունը): 2. Քաղաքապետը ավագանու որոշմամբ պետական ֆինանսների կառավարման լիազորված մարմնի համաձայնությամբ համայնքի սոցիալական ենթակառույցները զարգացնելու նպատակով ներդրումներ կատարելու համար կարող է վարկ ստանալու պայմանագիր կնքել կամ, սույն օրենքի 73-րդ հոդվածի 22-րդ կետին համապատասխան, թողարկել համայնքային արժեթղթեր: Երեւանը պետական լիազորված մարմնի համաձայնությամբ կարող է վարկային պայմանագիր կնքել այն պայմանով, որ յուրաքանչյուր բյուջետային տարում վարկի մարման ծրագրով նախատեսված տարեկան գումարը՝ մայր գումարի եւ տոկոսավճարների հանրագումարը, չգերազանցի Երեւանի բյուջեի համապատասխան տարվա ֆոնդային մասի եկամուտների 20 տոկոսը: Տվյալ վարկային միջոցները պարտադիր ուղղվում են Երեւանի բյուջեի ֆոնդային մաս: 3. Վարկային պայմանագրի գրավ կարող են լինել միայն Երեւանի բյուջեի եկամուտները եւ Հայաստանի Հանրապետության կառավարության երաշխիքները: Երեւանի բյուջեի միջոցների հաշվին վարկեր եւ փոխատվություններ չեն տրամադրվում (բացառությամբ այլ համայնքների բյուջեներին օրենսդրությամբ սահմանված կարգով փոխատվությունների տրամադրման դեպքերի) եւ արժեթղթեր չեն գնվում (բացառությամբ Երեւանի կողմից ստեղծվող կամ ստեղծված բաժնետիրական ընկերությունների բաժնետոմսերի գնման դեպքերի):

Հոդված 85.Երեւանի մատուցած ծառայությունների դիմաց գանձվող վճարները 1. Երեւանի բնակչության կենսաապահովման խնդիրները լուծելու նպատակով Երեւանի մատուցած ծառայությունների համար ավագանին սահմանում է վճարներ, բացառությամբ այն դեպքերի, երբ ծառայությունների սակագները հաստատում է Հանրային ծառայությունները կարգավորող հանձնաժողովը: 2. Ծառայությունների դիմաց գանձվող գումարները ուղղվում են Երեւանի բյուջե:

Հոդված 86.Երեւանը վարչական շրջանների բաժանելը 1. Երեւանում արդյունավետ տեղական ինքնակառավարում եւ տարածքային կառավարում իրականացնելու, Երեւանի տեղական ինքնակառավարման մարմինները բնակչությանն առավել մատչելի դարձնելու նպատակով Երեւան քաղաքը բաժանվում է 12 վարչական շրջանների (Աջափնյակ, Ավան, Արաբկիր, Դավթաշեն, Էրեբունի, Կենտրոն, Մալաթիա- Սեբաստիա, Նոր Նորք, Նորք-Մարաշ, Նուբարաշեն, Շենգավիթ, Քանաքեռ-Զեյթուն): 2. Երեւանի վարչական շրջանների սահմանները սահմանվում են սույն օրենքի հավելվածով։

Հոդված 87.Վարչական շրջանի ղեկավարին ներկայացվող պահանջները 1. Վարչական շրջանի ղեկավար կարող է նշանակվել 25 տարին լրացած, ընտրական իրավունք ունեցող յուրաքանչյուր ոք: 2. Վարչական շրջանի ղեկավարի պաշտոնը համայնքային վարչական պաշտոն է: (87-րդ հոդվածը փոփ. 21.01.20 ՀՕ-25-Ն)

Հոդված 88.Վարչական շրջանի ղեկավարի պաշտոնի անհամատեղելիությունը 1. Վարչական շրջանի ղեկավարը չի կարող զբաղվել ձեռնարկատիրական գործունեությամբ, զբաղեցնել այլ պաշտոն պետական կամ տեղական ինքնակառավարման մարմիններում կամ առեւտրային կազմակերպություններում, կատարել այլ վճարովի աշխատանք, բացի գիտական, մանկավարժական եւ ստեղծագործական աշխատանքից:

Հոդված 89.Վարչական շրջանի ղեկավարի նշանակման եւ լիազորությունների դադարեցման կարգը 1. Վարչական շրջանի ղեկավարին նշանակում եւ նրա լիազորություւնները դադարեցնում է քաղաքապետը: 2. Քաղաքապետը վարչական շրջանի ղեկավար նշանակելու նրա լիազորությունները դադարեցնելու մասին որոշումները ուղարկում է ավագանու խմբակցությունների ղեկավարներին:

Հոդված 90.Վարչական շրջանի ղեկավարի վարձատրությունը 1. Վարչական շրջանի ղեկավարի պաշտոնային դրույքաչափը, որը չի կարող գերազանցել քաղաքապետի պաշտոնային դրույքաչափի 70 տոկոսը, սահմանում է ավագանին:

Հոդված 91.Վարչական շրջանի ղեկավարի լիազորությունների ընդհանուր բնութագիրը 1. Վարչական շրջանի ղեկավարը` 1) գործում է քաղաքապետի անունից: Քաղաքապետը պատասխանատու է վարչական շրջանի ղեկավարի գործունեության համար. 2) կազմում է վարչական շրջանի զարգացման ծրագիրը եւ այն ներկայացնում քաղաքապետին. 3) քաղաքապետին է ներկայացնում իր աշխատակազմի կանոնադրությունը. 4) իր աշխատակազմի կառուցվածքի վերաբերյալ առաջարկություններ է ներկայացնում քաղաքապետին. 5) իր աշխատակազմի աշխատակիցների թվաքանակի, հաստիքացուցակի եւ պաշտոնային դրույքաչափերի վերաբերյալ առաջարկություններ է ներկայացնում քաղաքապետին. 6) օրենքով սահմանված կարգով նշանակում եւ ազատում է վարչական շրջանի ղեկավարի տեղակալին (տեղակալներին), աշխատակազմի քարտուղարին, կառուցվածքային ստորաբաժանումների ղեկավարներին. 7) կնքում է վարչական շրջանի տնօրինությանը հանձնած գույքը վարձակալությամբ հանձնելու պայմանագրերը. 8) իր իրավասության շրջանակում ընդունում է որոշումներ, կարգադրություններ. 9) կազմակերպում է Երեւանի բյուջեի մուտքերի` իրեն հանձնարարված մուտքերի հավաքումը. 10) իրականացնում է ավագանու որոշումներով սահմանված այլ լիազորություններ. 11) օրենքով նախատեսված դեպքերում որպես քաղաքապետի ներկայացուցիչ հանդես է գալիս դատարանում, ինչպես նաեւ իր իրավասության սահմաններում տալիս է դատարանում հանդես գալու լիազորագրեր: 2. Վարչական շրջանի ղեկավարի եւ նրա աշխատակազմի գործունեության կարգը սահմանում է Երեւանի ավագանին։ (91-րդ հոդվածը խմբ. 08.12.11 ՀՕ-345-Ն, լրաց. 25.03.20 ՀՕ-192-Ն)

Հոդված 92.Վարչական շրջանի ղեկավարի լիազորությունները բնակիչների եւ տնտեսավարող սուբյեկտների իրավունքների պաշտպանության բնագավառում 1. Վարչական շրջանի ղեկավարը բնակիչների եւ տնտեսավարող սուբյեկտների իրավունքների պաշտպանության բնագավառում իրականացնում է հետեւյալ լիազորությունները. 1) սահմանում է խնամակալություն, հոգաբարձություն, իրականացնում է խնամակալության եւ հոգաբարձության մարմիններին օրենքով վերապահված այլ լիազորություններ. 2) կատարում է Երեւանի բնակիչների ընդունելություն, օրենքով սահմանված կարգով քննության է առնում տրված հանրագրերն ու դիմումները. 3) կազմակերպում է փաստաթղթերի պատճենների եւ կրկնօրինակների տրամադրումը վարչական շրջանի կամ քաղաքապետարանի արխիվից. 4) կազմակերպում է իր վարչական շրջանում գտնվող քաղաքացիական կացության ակտերի գրանցման ծառայության համապատասխան կառույցների գործունեությունը. 5) միջոցներ է ձեռնարկում իր վարչական շրջանում երեխաների ծնունդների չգրանցման դեպքերը բացահայտելու եւ այդ ծնունդների պետական գրանցումներն ապահովելու ուղղությամբ, օրենքով սահմանված դեպքերում եւ կարգով տալիս է երեխայի ծննդի պետական գրանցման գրավոր հայտարարություն: (92-րդ հոդվածը լրաց. 16.09.10 ՀՕ-124-Ն, փոփ. 21.12.17 ՀՕ-17-Ն)

Հոդված 93.Վարչական շրջանի ղեկավարի լիազորությունները ֆինանսների բնագավառում 1. Վարչական շրջանի ղեկավարը ֆինանսների բնագավառում իրականացնում է հետեւյալ լիազորությունները. 1) մասնակցում է Երեւանի բյուջեի նախագծի ձեւավորմանը ավագանու սահմանած կարգով. 2) տնօրինում է Երեւանի բյուջեով վարչական շրջանի ղեկավարի լիազորությունների իրականացման համար հատկացված միջոցները, ապահովում է դրանց նպատակային օգտագործումը. 3) ստորագրում է ֆինանսական փաստաթղթերը. 4) կազմակերպում է իր տնօրինմանը հանձնված Երեւանի սեփականություն համարվող գույքի վարձավճարների գանձումը. 5) տեղական հարկերը եւ օրենքով սահմանված վճարումները չվճարող անձանց նկատմամբ օրենքով սահմանված կարգով կիրառում է համապատասխան միջոցներ:

Հոդված 94.Վարչական շրջանի ղեկավարի լիազորությունները քաղաքաշինության եւ կոմունալ տնտեսության բնագավառում 1. Վարչական շրջանի ղեկավարը քաղաքաշինության եւ կոմունալ տնտեսության բնագավառում իրականացնում է հետեւյալ լիազորությունները. 1) «Քաղաքաշինության մասին» Հայաստանի Հանրապետության օրենքով եւ այլ օրենքներով, այլ իրավական ակտերով համայնքի ղեկավարին քաղաքաշինության ոլորտում վերապահված այն լիազորությունները, որոնք սույն օրենքով վերապահված չեն քաղաքապետին. 2) սահմանված կարգով վերահսկողություն է իրականացնում շենքերի ու շինությունների նպատակային օգտագործման եւ պահպանման, կառուցապատողներին տրված ճարտարապետահատակագծային առաջադրանքով, քաղաքաշինական կանոնադրությամբ սահմանված պահանջների կատարման նկատմամբ. 3) իրականացնում է Երեւանի սեփականություն համարվող, իր տնօրինմանը հանձնված շենքերի ու շինությունների հաշվառումը, կազմում է սեփականության ամենամյա գույքագրման փաստաթղթերը. 4) օրենքով սահմանված կարգով տալիս է քաղաքային նշանակության գովազդային գոտի չհամարվող տարածքներում արտաքին գովազդ տեղադրելու թույլտվություն. 5) կազմակերպում է քաղաքապետին չվերապահված վարչական շրջանի կոմունալ տնտեսության աշխատանքը, ապահովում է իր տնօրինության տակ գտնվող` Երեւանի սեփականություն համարվող բնակելի տների եւ ոչ բնակելի տարածքների, հանրակացարանների, վարչական շենքերի եւ այլ շինությունների պահպանումը, շահագործումը, կազմակերպում է դրանց նորոգումը. 6) կազմակերպում է ոչ քաղաքային նշանակության փողոցների, հրապարակների, բնակավայրերի բարեկարգումը եւ կանաչապատումը. 7) օրենքով նախատեսված դեպքերում եւ օրենքով սահմանված կարգով նախապատրաստում է համատիրությունների հիմնադիր ժողովներ եւ աջակցում է դրանց անցկացմանը, ինչպես նաեւ օրենքով սահմանված` բազմաբնակարան շենքերի կառավարման այլ մարմինների ձեւավորմանը: Ապահովում է վարչական շրջանի մասնակցությունն այդ շենքերի սպասարկմանը` իր սեփականությունը համարվող բնակարանների քանակին համապատասխան. 7.1) կառուցման ավարտի գրանցում չունեցող այն բազմաբնակարան շենքերի, որոնց ստորաբաժանված միավորները առանձին վկայականներով գրանցված են որպես 100 տոկոսից ցածր ավարտվածություն ունեցող անավարտ շինություններ, կառուցման ավարտի գրանցման նպատակներով աջակցում է կառուցապատողի գործառույթների իրականացման համար սեփականատերերի կողմից համապատասխան կազմակերպության ընտրության գործընթացին կամ կառուցապատողի գործառույթների իրականացումը վերապահում է համայնքում գործող՝ բազմաբնակարան շենքի կառավարման որեւէ մարմնի, որն իրականացնում է կառուցապատողի գործառույթներ առանձնացված միավորների սեփականատերերի ծախսերով. 8) կազմակերպում է այն բազմաբնակարան շենքերի պահպանումը, որոնք չեն կառավարվում համատիրությունների կամ օրենքով սահմանված` բազմաբնակարան շենքի կառավարման մարմնի կողմից. 9) վերահսկում է գույքի սեփականատիրոջ կամ տիրապետողի կողմից պարտադիր բարեկարգման իրականացումը: (94-րդ հոդվածը լրաց. 19.06.15 ՀՕ-93-Ն)

Հոդված 95.Վարչական շրջանի ղեկավարի լիազորությունները հողօգտագործման բնագավառում 1. Վարչական շրջանի ղեկավարը հողօգտագործման բնագավառում իրականացնում է հետեւյալ լիազորությունները. 1) Երեւանի գլխավոր հատակագծին, վարչական շրջանի կամ դրա առանձին հատվածների գոտիավորման նախագծերին, հողերի գոտիավորման եւ օգտագործման սխեմաներին համապատասխան` սահմանված կարգով օտարում կամ օգտագործման է տրամադրում վարչական շրջանի տնօրինմանը հատկացված հողամասերը: Սույն կետով նախատեսված հողամասերը չեն կարող տրամադրվել վարչական շրջանի տնօրինմանը, եթե այդ տարածքի համար դեռեւս չկա հաստատված գոտիավորման նախագիծ. 2) օրենքով սահմանված կարգով վերահսկողություն է իրականացնում վարչական շրջանի սահմաններում գտնվող հողերի նպատակային օգտագործման, հողօգտագործողների կողմից հողային օրենսդրության պահանջների պահպանման նկատմամբ. 3) օրենքով սահմանված դեպքերում եւ կարգով կանխարգելում, կասեցնում եւ վերացնում է ապօրինի հողօգտագործումները. 4) իրականացնում է վարչական շրջանի տնօրինմանը հանձնված հողամասերի բարելավման աշխատանքներ:

Հոդված 96.Վարչական շրջանի ղեկավարի լիազորությունները առեւտրի եւ սպասարկման բնագավառում 1. Վարչական շրջանի ղեկավարը առեւտրի եւ սպասարկման բնագավառում իրականացնում է հետեւյալ լիազորությունները. 1) վարչական շրջանի տարածքում, առեւտրի համայնքային կանոններին համապատասխան, տալիս է ոգելից եւ ալկոհոլային խմիչքների եւ (կամ) ծխախոտի արտադրանքի վաճառքի թույլտվություն. 2) վարչական շրջանի տարածքում, սպասարկման գործունեության համաքաղաքային կանոններին համապատասխան, բաղնիքներին, սաունաներին, զվարճանքի օբյեկտներին տալիս է ժամը 24.00-ից հետո աշխատելու թույլտվություն. 3) վարչական շրջանի տարածքում, հանրային սննդի համայնքային կանոններին համապատասխան, տալիս է հանրային սննդի կազմակերպման եւ իրացման թույլտվություն: (96-րդ հոդվածը լրաց. 06.12.12 ՀՕ-226-Ն, փոփ. 04.10.17 ՀՕ-137-Ն)

Հոդված 97.Վարչական շրջանի ղեկավարի լիազորությունները կրթության, մշակույթի եւ երիտասարդության բնագավառում (վերնագիրը փոփ. 05.03.25 ՀՕ-60-Ն) 1. Կրթության, մշակույթի եւ երիտասարդության բնագավառում վարչական շրջանի ղեկավարը իրականացնում է հետեւյալ լիազորությունները. 1) վարչական շրջանի տարածքում կազմակերպում է դպրոցների, մանկապարտեզների, ակումբների, մշակույթի տների, գրադարանների, կրթական եւ մշակութային այլ կազմակերպությունների գործունեությունը, դրանց շահագործման եւ նորոգման աշխատանքները. 2) կարող է կազմակերպել տոների եւ հիշատակի օրերի հետ կապված միջոցառումներ. 3) երիտասարդության ոլորտում լիազորությունների իրականացման համար աջակցում է վարչական շրջանում գործող Երեւան քաղաքի երիտասարդական կենտրոնի մասնաճյուղի գործունեությանը. 4) առաջարկ է ներկայացնում քաղաքապետին վարչական շրջանում երիտասարդական քաղաքականության մշակումն ու իրականացումը ապահովելու նպատակով վարչական շրջանի աշխատակազմի աշխատակիցներից առնվազն մեկի գործառույթներում երիտասարդական աշխատողի գործառույթներ սահմանելու կամ հաստիքացուցակում երիտասարդական աշխատողի առնվազն մեկ հաստիք սահմանելու վերաբերյալ: Վարչական շրջանում երիտասարդական կենտրոնի եւ երիտասարդական աշխատողի գործունեության առանձնահատկությունները սահմանված են «Երիտասարդական քաղաքականության մասին» Հայաստանի Հանրապետության օրենքով: (97-րդ հոդվածը փոփ., լրաց. 05.03.25 ՀՕ-60-Ն)

Հոդված 98.Վարչական շրջանի ղեկավարի լիազորությունները առողջապահության, ֆիզիկական կուլտուրայի եւ սպորտի բնագավառներում 1. Առողջապահության, ֆիզիկական կուլտուրայի եւ սպորտի բնագավառներում վարչական շրջանի ղեկավարն իրականացնում է հետեւյալ լիազորությունը. 1) վարչական շրջանի տարածքում կազմակերպում է Երեւանի ենթակայության առողջապահական եւ մարզական հիմնարկների ու կազմակերպությունների գործունեությունը:

Հոդված 99.Վարչական շրջանի ղեկավարի լիազորությունները աշխատանքի եւ սոցիալական պաշտպանության բնագավառում 1. Վարչական շրջանի ղեկավարը աշխատանքի եւ սոցիալական պաշտպանության բնագավառում իրականացնում է հետեւյալ լիազորությունները. 1) (կետն ուժը կորցրել է 04.03.20 ՀՕ-99-Ն) 2) աջակցում է գործազուրկների հաշվառման եւ բնակչության զբաղվածության հետ կապված խնդիրների լուծմանը. 3) (կետն ուժը կորցրել է 04.03.20 ՀՕ-99-Ն) (99-րդ հոդվածը լրաց., փոփ. 17.12.14 ՀՕ-233-Ն, փոփ. 04.03.20 ՀՕ-99-Ն) Հոդված 100. Վարչական շրջանի ղեկավարի լիազորությունները գյուղատնտեսության բնագավառում 1. Վարչական շրջանի ղեկավարը գյուղատնտեսության բնագավառում իրականացնում է հետեւյալ լիազորությունը. 1) ավագանու սահմանած կարգով տալիս է վարչական շրջանի տարածքում գյուղատնտեսական ընտանի կենդանիներ պահելու թույլտվություն եւ կատարում է դրանց ամենամյա հաշվառում: Հոդված 101. Վարչական շրջանի ղեկավարի աշխատակազմը 1. Վարչական շրջանի ղեկավարն իր լիազորություններն իրականացնում է իր աշխատակազմի, ինչպես նաեւ քաղաքային ենթակայության կազմակերպությունների եւ ոչ առեւտրային կազմակերպությունների միջոցով: Վարչական շրջանի աշխատակազմի աշխատողները, բացառությամբ վարչական շրջանի ղեկավարի տեղակալի (տեղակալների), տեխնիկական սպասարկում իրականացնող անձանց, համայնքային ծառայողներ են: Վարչական շրջանի ղեկավարի աշխատակազմը քաղաքապետարանի աշխատակազմի առանձնացված ստորաբաժանում է: 2. Վարչական շրջանի ղեկավարի աշխատակազմը բաղկացած է վարչական շրջանի ղեկավարի տեղակալից (50000 եւ ավելի բնակիչ ունեցող վարչական շրջանում վարչական շրջանի ղեկավարը կարող է ունենալ երկու տեղակալ), աշխատակազմի քարտուղարից, բաժինների ղեկավարներից, ինչպես նաեւ հաստիքացուցակով նախատեսված այլ աշխատողներից: 3. Վարչական շրջանի նոր ղեկավարի նշանակվելուց հետո իր լիազորությունները վայր է (են) դնում վարչական շրջանի ղեկավարի տեղակալը (տեղակալները): 4. Վարչական շրջանի ղեկավարի աշխատակազմի քարտուղարը, բաժինների ղեկավարները եւ այլ աշխատողներ իրականացնում են վարչական շրջանի ղեկավարի աշխատակազմի կանոնադրությամբ, օրենքով եւ այլ իրավական ակտերով իրենց վերապահված լիազորությունները: Հոդված 102. Վարչական շրջանի ղեկավարի տեղակալը (տեղակալները) 1. Վարչական շրջանի ղեկավարի տեղակալը (տեղակալները) իրականացնում է (են) վարչական շրջանի ղեկավարի աշխատակազմի կանոնադրությամբ իրեն (իրենց) վերապահված լիազորությունները: 2. Վարչական շրջանի ղեկավարի բացակայության ժամանակ վարչական շրջանի ղեկավարի հանձնարարությամբ տեղակալը (տեղակալներից մեկը) իրականացնում է վարչական շրջանի ղեկավարի լիազորությունները: Վարչական շրջանի ղեկավարի կողմից ժամանակավոր պաշտոնակատար նշանակվելու անհնարինության դեպքում վարչական շրջանի ղեկավարի ժամանակավոր պաշտոնակատար է նշանակում քաղաքապետը: 3. Վարչական շրջանի ղեկավարի տեղակալի (տեղակալների) պաշտոնը համայնքային վարչական պաշտոն է: 4. (մասն ուժը կորցրել է 12.02.25 ՀՕ-39-Ն) (102-րդ հոդվածը լրաց. 04.10.17 ՀՕ-137-Ն, փոփ. 21.01.20 ՀՕ-25-Ն, լրաց. 28.10.20 ՀՕ- 469-Ն, փոփ. 12.02.25 ՀՕ-39-Ն) Հոդված 103. Վարչական շրջանի ղեկավարի աշխատակազմի քարտուղարը 1. Վարչական շրջանի ղեկավարի աշխատակազմի քարտուղարն իրականացնում է օրենքով, այլ իրավական ակտերով եւ վարչական շրջանի ղեկավարի աշխատակազմի կանոնադրությամբ իրեն վերապահված լիազորությունները, մասնավորապես` 1) աշխատակազմի գործավարությունը, նամակագրությունը եւ արխիվային գործը. 2) վարչական շրջանի ղեկավարի որոշումների, կարգադրությունների նախագծերի նախապատրաստման կազմակերպումը. 3) վարչական շրջանի ղեկավարի որոշումների հրատարակումը. 4) վարչական շրջանի ղեկավարի կողմից Երեւանի բնակիչների ընդունելության կազմակերպումը, նրանց հանրագրերի, դիմումների ու բողոքների քննարկման եւ ընթացքի հսկողությունը. 5) վարչական շրջանի ղեկավարի որոշումների կատարման, ինչպես նաեւ վարչական շրջանի ղեկավարի աշխատակազմի աշխատանքային կարգապահության պահպանման նկատմամբ վերահսկողությունը: (103-րդ հոդվածը փոփ. 21.12.17 ՀՕ-17-Ն)