Հոդված 1.Հայաստանի Հանրապետության պետական սահմանը Հայաստանի Հանրապետության պետական սահմանը (այսուհետ` պետական սահման) այն գիծն է եւ այդ գծով անցնող այն ուղղահայաց մակերեւույթը, որոնք որոշում են Հայաստանի Հանրապետության տարածքի` ցամաքի, ջրերի, ընդերքի, օդային տարածության շրջանակները: Պետական սահմանը որոշվում է Հայաստանի Հանրապետության միջազգային պայմանագրերով եւ Հայաստանի Հանրապետության օրենքով: Հոդված 2.Պետական սահմանում իրավահարաբերությունների կարգավորման սկզբունքները Պետական սահմանը տեղորոշելիս եւ փոփոխելիս, սահմանակից պետությունների հետ հարաբերությունները, ինչպես նաեւ սահմանամերձ շրջաններում եւ միջազգային հաղորդակցության ուղիներում իրավահարաբերությունները կարգավորելիս Հայաստանի Հանրապետությունն առաջնորդվում է հետեւյալ սկզբունքներով. ա) Հայաստանի Հանրապետության տարածքային ամբողջականության պաշտպանության. բ) Հայաստանի Հանրապետության անվտանգության եւ Հայաստանի Հանրապետության կողմից ստանձնած միջազգային պարտավորությունների կատարման ապահովման. գ) օտարերկրյա պետությունների հետ բազմակողմանի փոխշահավետ համագործակցության. դ) սահմանային հարցերի խաղաղ լուծման:

Հոդված 3.Պետական սահմանի պահպանությունը Պետական սահմանի պահպանությունը Հայաստանի Հանրապետության ազգային անվտանգության ապահովման համակարգի անբաժանելի մասն է եւ ընդգրկում է քաղաքական, իրավական, տնտեսական, ռազմական, օպերատիվ, կազմակերպչական, տեխնիկական, ռեժիմային, բնապահպանական, մշակութային եւ այլ միջոցառումներ, որոնք երաշխավորում են` ա) պետական սահմանի անձեռնմխելիությունը. բ) իրավաբանական եւ ֆիզիկական անձանց կողմից պետական սահմանի ռեժիմի, սահմանային ռեժիմի եւ պետական սահմանի անցման կետերի ռեժիմի պահպանման ապահովումը. գ) պետական սահմանում անձի, հասարակության եւ պետության համար կենսական շահերի պաշտպանությունն արտաքին եւ ներքին սպառնալիքներից: Ցամաքում, սահմանային ջրերում պետական սահմանի պահպանությունն իրականացնում են սահմանապահ, իսկ օդային տարածքում` հակաօդային պաշտպանության զորքերը: Հակաօդային պաշտպանության զորքերը պետական սահմանի պահպանությունն իրականացնելիս ղեկավարվում են սույն օրենքով, Հայաստանի Հանրապետության միջազգային պայմանագրերով եւ իրավական այլ ակտերով: Պետական սահմանի պահպանության ոլորտում Հայաստանի Հանրապետությունը համագործակցում է օտարերկրյա պետությունների հետ Հայաստանի Հանրապետության միջազգային պայմանագրերին համապատասխան: Պետական կառավարման մարմինների լիազորությունները պետական սահմանի պահպանության ոլորտում սահմանվում են սույն օրենքով եւ Հայաստանի Հանրապետության իրավական այլ ակտերով: Հոդված 4.Պետական սահմանի մասին օրենսդրությունը Պետական սահմանի մասին օրենսդրությունը բաղկացած է Հայաստանի Հանրապետության Սահմանադրությունից, Հայաստանի Հանրապետության միջազգային պայմանագրերից, սույն օրենքից, այլ օրենքներից ու իրավական ակտերից: Գ Լ ՈՒ Խ 2. ՊԵՏԱԿԱՆ ՍԱՀՄԱՆԻ ՏԵՂՈՐՈՇՈՒՄԸ, ՓՈՓՈԽՈՒԹՅՈՒՆԸ ԵՎ ԳԾԱՆՇՈՒՄԸ Հոդված 5.Պետական սահմանի տեղորոշումն ու փոփոխումը Պետական սահմանի տեղորոշումն ու փոփոխումը կատարվում է Հայաստանի Հանրապետության միջազգային պայմանագրերով եւ Հայաստանի Հանրապետության օրենքով: Հայաստանի Հանրապետության միջազգային պայմանագրերի հիման վրա, պետական սահմանի ստուգման արդյունքում, պետական սահմանի փոփոխում պարունակող, պետական սահմանը տեղորոշող փաստաթղթերը գործողության մեջ են դրվում Հայաստանի Հանրապետության օրենսդրությանը համապատասխան: Պետական սահմանը, եթե Հայաստանի Հանրապետության միջազգային պայմանագրերով այլ բան նախատեսված չէ, տեղորոշվում է` ա) ցամաքում` ըստ ռելիեֆի բնորոշ կետերի ու գծերի կամ պարզ տեսանելի կողմնորոշիչների. բ) գետերում (վտակներում)` դրանց կենտրոնով կամ գետի գլխավոր գետաբազկի կենտրոնով. գ) ջրավազաններում` այն ուղիղ գծով, որը պետական սահմանի ելքերը միացնում է ջրավազանի ափերին. դ) հիդրոհանգույցների ջրավազաններում` պետական սահմանի այն գծին համապատասխան, որն անցնում էր այդ տեղանքով մինչեւ դրանք լցնելը. ե) երկաթուղային եւ ավտոճանապարհային կամուրջների, ամբարտակների վրա ու այլ կառույցներում` այդ կառույցների կենտրոնով կամ դրանց տեխնոլոգիական առանցքով` անկախ պետական սահմանի անցումից: Գետով (վտակով), ջրավազանով անցնող պետական սահմանը չի տեղաշարժվում ինչպես դրանց ափերի գծագրության կամ ջրի մակարդակի փոփոխման, այնպես էլ գետի (վտակի) հունն այս կամ այն կողմ խոտորվելու դեպքում: Հոդված 6.Պետական սահմանի գծանշումը Պետական սահմանը տեղանքում գծանշվում է պարզ տեսանելի սահմանանշաններով, որոնց ձեւերը, տեղադրման կարգն ու նկարագիրը սահմանում է Հայաստանի Հանրապետության կառավարությունը` Հայաստանի Հանրապետության միջազգային պայմանագրերին համապատասխան:

Հոդված 7.Հայաստանի Հանրապետության սահմանային ջրերը Հայաստանի Հանրապետության սահմանային ջրերն են մինչեւ պետական սահմանագիծն ընկած այն գետերի (վտակների) եւ ջրավազանների ջրերը, որոնց ափերը պատկանում են Հայաստանի Հանրապետությանը: Գ Լ ՈՒ Խ 3. ՊԵՏԱԿԱՆ ՍԱՀՄԱՆԻ ՌԵԺԻՄԸ Հոդված 8.Պետական սահմանի ռեժիմը Պետական սահմանի ռեժիմը որոշվում է սույն օրենքով, Հայաստանի Հանրապետության միջազգային պայմանագրերով, ինչպես նաեւ Հայաստանի Հանրապետության իրավական այլ ակտերով: Պետական սահմանի ռեժիմն ընդգրկում է` ա) պետական սահմանի խնամքի կանոնները. բ) պետական սահմանի հատման կանոնները. գ) անձանց, տրանսպորտային միջոցների, կենդանիների, բեռների եւ այլ գույքի` պետական սահմանով բացթողնման կանոնները. դ) պետական սահմանում տնտեսական գործունեություն ծավալելու կանոնները. ե) սահմանակից պետությունների հետ սահմանային միջադեպերի լուծման կարգը: Հոդված 9.Պետական սահմանի խնամքը Պետական սահմանի խնամքի կանոններով կարգավորվում են սահմանանշանների տեղադրումը եւ պահպանումը, դրանց վերահսկողական զննումները, սահմանի երկայնքով թափանցիկ, սանիտարական շերտի ստեղծումն ու դրա խնամքը, սահմանակից պետության հետ պետական սահմանի համատեղ ստուգումները: Պետական սահմանի խնամքի կանոնները Հայաստանի Հանրապետության ազգային անվտանգության բնագավառի պետական լիազորված մարմնի ներկայացմամբ հաստատում է Հայաստանի Հանրապետության կառավարությունը: Սահմանակից պետության հետ սահմանի փոփոխություններ չպարունակող համատեղ ստուգումների արձանագրությունները Հայաստանի Հանրապետության ազգային անվտանգության բնագավառի պետական լիազորված մարմինը ներկայացնում է Հայաստանի Հանրապետության կառավարություն: Պետական սահմանին անմիջապես հարող հողային շերտը (սահմանային շերտ), օրենսդրությամբ սահմանված կարգով, պետական սահմանի խնամքն ու պահպանությունն ապահովելու նպատակով, տրամադրվում է Հայաստանի Հանրապետության սահմանապահ զորքերին (այսուհետ` սահմանապահ զորքեր)` անհատույց օգտագործման իրավունքով: Հոդված 10.Պետական սահմանի հատման կանոնները Երկաթուղային, ավտոմոբիլային, օդային եւ այլ հաղորդակցությունը պետական սահմանով իրականացվում է Հայաստանի Հանրապետության կառավարության սահմանած անցման կետերում` Հայաստանի Հանրապետության օրենսդրությանն ու Հայաստանի Հանրապետության միջազգային պայմանագրերին համապատասխան: Պետական սահմանի անցման կետերում ստեղծվում են սահմանապահ զորքերի հսկիչ- անցագրային կետեր: Պետական սահմանի անցման կետերում Հայաստանի Հանրապետության կառավարությունը սահմանում է մաքսային հսկողության գոտի, որտեղ հսկողություն են իրականացնում բացառապես մաքսային մարմինները: Սահմանապահ զորքերի զինծառայողներին եւ պետական սահմանի պահպանության պարտականություններ կատարող անձանց, Հայաստանի Հանրապետության սահմանակից պետությունների համաձայնությամբ, իրավունք է տրվում օգտվելու պետական սահմանը հատելու այլ կարգից: Օդանավերը կամ թռչող այլ սարքերը պետական սահմանը հատում են եւ Հայաստանի Հանրապետության տարածքում թռիչք են կատարում թռիչքների համար հատկացված օդային միջանցքներով` սույն օրենքին, այլ օրենքներին, Հայաստանի Հանրապետության միջազգային պայմանագրերին եւ իրավական այլ ակտերին համապատասխան: Պետական սահմանի հատումը Հայաստանի Հանրապետության օդային միջանցքներից դուրս թռիչքը թույլատրում է Հայաստանի Հանրապետության կառավարությունը: Հայաստանի Հանրապետությունից մեկնող օդանավերի կամ թռչող այլ սարքերի թռիչքը, ինչպես նաեւ Հայաստանի Հանրապետության օդային տարածք մտնելուց հետո դրանց վայրէջքն իրականացվում են միջազգային թռիչքների համար բաց օդանավակայաններում: Թռիչքի եւ վայրէջքի այլ կարգ սահմանում է Հայաստանի Հանրապետության կառավարությունը:

Հոդված 11.Անձանց, տրանսպորտային միջոցների, կենդանիների, բեռների եւ այլ գույքի բացթողնումը պետական սահմանով Պետական սահմանով` անձանց, տրանսպորտային միջոցների, կենդանիների, բեռների եւ այլ գույքի բացթողնումը Հայաստանի Հանրապետության կառավարության սահմանած անցման կետերով իրականացնում են սահմանապահ զորքերի զինծառայողները եւ մաքսային մարմինները` անձանց Հայաստանի Հանրապետություն մուտք գործելու կամ Հայաստանի Հանրապետությունից մեկնելու` Հայաստանի Հանրապետության օրենսդրությամբ սահմանված համապատասխան փաստաթղթերի առկայության դեպքում: Լիզինգի առարկա տրանսպորտային միջոցների բացթողնումն արգելվում է, եթե լիզինգի պայմանագրով ամրագրվել է լիզինգառուի կամ նրա լիազորած անձի կողմից տրանսպորտային միջոցի ելքի իրավունքի սահմանափակումը Հայաստանի Հանրապետությունից: Գրավադրված տրանսպորտային միջոցների բացթողնումն արգելվում է, եթե շարժական գույքի գրավի պայմանագրով ամրագրվել է գրավատուի կամ նրա լիազորած անձի կողմից տրանսպորտային միջոցի ելքի իրավունքի սահմանափակումը Հայաստանի Հանրապետությունից: Տրանսպորտային միջոցի ելքի սահմանափակման եւ սահմանափակումը վերացնելու վերաբերյալ տեղեկատվությունը մուտքագրվում է սահմանային էլեկտրոնային կառավարման տեղեկատվական համակարգ՝ Հայաստանի Հանրապետության կառավարության որոշմամբ սահմանված կարգով: Անձանց, տրանսպորտային միջոցների, կենդանիների, բեռների եւ այլ գույքի բացթողնումը պետական սահմանով իրականացվում է Հայաստանի Հանրապետության միջազգային պայմանագրերին եւ իրավական ակտերին համապատասխան: Հայաստանի Հանրապետության կառավարությունը կարող է սահմանել անձանց եւ տրանսպորտային միջոցների` պետական սահմանով բացթողնման պարզեցված կարգ: (11-րդ հոդվածը լրաց. 26.05.21 ՀՕ-221-Ն, 25.05.22 ՀՕ-129-Ն, 06.07.22 ՀՕ-326-Ն) Հոդված 12.Զանգվածային ոչնչացման զենքի, ռազմական բեռների տեղափոխման ու զորքերի տարանցման կարգը պետական սահմանով (վերնագիրը փոփ. 24.09.03 ՀՕ-9-Ն) Զանգվածային ոչնչացման զենքի տեղափոխումը պետական սահմանով թույլատրում է Հայաստանի Հանրապետության կառավարությունը: Օտարերկրյա պետության զորքերի եւ ռազմական բեռների տարանցումը պետական սահմանով թույլատրում է Հայաստանի Հանրապետության կառավարությունը` Հայաստանի Հանրապետության միջազգային պայմանագրերին համապատասխան: Զանգվածային ոչնչացման զենքի, օտարերկրյա պետության զորքերի եւ ռազմական բեռների` պետական սահմանով տարանցումը թույլատրելու դեպքում թույլատրելու մասին որոշումն ընդունելուց հետո` հնգօրյա ժամկետում, Հայաստանի Հանրապետության կառավարությունն այդ մասին պաշտոնապես տեղեկացնում է Հայաստանի Հանրապետության Ազգային ժողով: (12-րդ հոդվածը փոփ. 24.09.03 ՀՕ-9-Ն, 16.12.16 ՀՕ-11-Ն) Հոդված 13.Սահմանային վերահսկողությունը Սահմանային վերահսկողությունը միջոցառումների համակարգ է, որն ապահովում է պետական սահմանի հատման օրինականությունը: Սահմանային վերահսկողությունը միջազգային հաղորդակցության ուղիներում

Հոդված 14.Վերահսկողությունը եւ հսկողությունը պետական սահմանը հատելիս (վերնագիրը խմբ. 06.07.22 ՀՕ-326-Ն)

Հոդված 15.Տնտեսական եւ այլ գործունեությունը պետական սահմանում Հայաստանի Հանրապետության եւ օտարերկրյա պետությունների ֆիզիկական եւ իրավաբանական անձանց կողմից իրականացվող տնտեսական եւ այլ գործունեությունը, որը կատարվում է պետական սահմանի հատմամբ կամ անմիջապես պետական սահմանում, չպետք է վնաս պատճառի կամ խոչընդոտի պետական սահմանի պահպանությանը կամ պահպանմանն ուղղված մյուս գործողություններին: Հոդված 16.Վարակիչ հիվանդությունների տարածքում սպառնալիքի դեպքում պետական սահմանով հաղորդակցության ժամանակավոր դադարեցումը Հայաստանի Հանրապետության կամ օտարերկրյա պետության տարածքում վարակիչ հիվանդությունների առաջացման, տարածման սպառնալիքի դեպքում Հայաստանի Հանրապետության կառավարությունը կարող է ժամանակավորապես սահմանափակել կամ դադարեցնել հաղորդակցությունը, պետական սահմանը հատող անձանց, կենդանիների, բեռների, սերմնանյութերի, տնկանյութերի, բուսական եւ կենդանական ծագում ունեցող մթերքների բացթողնման վրա սահմանել կարանտին: Հոդված 17.Պետական սահմանը խախտողները

Հոդված 18.Սահմանակից պետությունների հետ փոխհարաբերությունները սահմանային հարցերում Սահմանակից պետությունների հետ սահմանային հարցերը Հայաստանի Հանրապետությունը լուծում է Հայաստանի Հանրապետության Սահմանադրությանը, Հայաստանի Հանրապետության միջազգային պայմանագրերին, սույն օրենքին եւ Հայաստանի Հանրապետության իրավական այլ ակտերին համապատասխան: Հոդված 19.Հայաստանի Հանրապետության սահմանային ներկայացուցիչները Պետական սահմանի ռեժիմի պահպանման հետ կապված հարցերի լուծման, ինչպես նաեւ սահմանային միջադեպերի կարգավորման համար Հայաստանի Հանրապետության կառավարությունը նշանակում է Հայաստանի Հանրապետության սահմանային ներկայացուցիչներ: Սահմանային ներկայացուցիչներն իրենց գործունեության ընթացքում ղեկավարվում են Հայաստանի Հանրապետության օրենսդրությամբ, ինչպես նաեւ Հայաստանի Հանրապետության միջազգային պայմանագրերով: Գ Լ ՈՒ Խ 4. ՍԱՀՄԱՆԱՅԻՆ ՌԵԺԻՄ Հոդված 20.Սահմանային ռեժիմը Հայաստանի Հանրապետության կառավարությունը, պետական սահմանում պատշաճ կարգ ապահովելու նպատակով, սահմանված կարգով, սույն օրենքին եւ Հայաստանի Հանրապետության իրավական այլ ակտերին համապատասխան, սահմանում է սահմանային ռեժիմ, որը կարգավորում է Հայաստանի Հանրապետության քաղաքացիների եւ այլ անձանց` սահմանային շերտ մուտքի, այնտեղ ժամանակավորապես գտնվելու, բնակվելու, տեղափոխվելու եւ այլ գործունեություն իրականացնելու հետ կապված հարաբերությունները: (20-րդ հոդվածը փոփ. 20.03.07 ՀՕ-138-Ն) Հոդված 21.Սահմանային գոտին եւ սահմանային շերտը Սահմանային գոտին այն տարածքն է, որը Հայաստանի Հանրապետության պետական սահմանագծից ծավալվում է դեպի Հայաստանի Հանրապետության տարածքի խորքը` մինչեւ հինգ կիլոմետր լայնությամբ: Սահմանային շերտը սահմանային գոտու մի մասն է, որը հարում է պետական սահմանին կամ պետական սահմանը ջրային տարածքով անցնելիս սահմանային ջրերի ափերին` մինչեւ մեկ կիլոմետր լայնությամբ: Սույն հոդվածին համապատասխան, սահմանային գոտու եւ սահմանային շերտի սահմաններն ըստ տեղանքի որոշում եւ փոփոխում է Հայաստանի Հանրապետության կառավարությունը: Հոդված 22.Սահմանային շերտ մուտք գործելը (վերնագիրը խմբ. 20.03.07 ՀՕ-138-Ն) Սահմանային շերտ մուտքի, այնտեղ ժամանակավորապես գտնվելու թույլտվությունը Հայաստանի Հանրապետության ոստիկանության եւ ազգային անվտանգության բնագավառների պետական լիազորված մարմինների համաձայնությամբ տալիս են սահմանապահ զորքերը: Անհրաժեշտության դեպքում սահմանապահ զորքերի հրամանատարությունը կարող է լրացուցիչ ժամանակավոր ռեժիմային սահմանափակումներ մտցնել սահմանային շերտ մուտքի եւ այնտեղ ժամանակավորապես գտնվելու համար: Ժամանակավոր ռեժիմային սահմանափակումներ մտցնելու դեպքում տեղական ինքնակառավարման մարմիններին տեղեկացնելով` սահմանափակվում կամ արգելվում են անձանց, տրանսպորտային միջոցների, ընտանի կենդանիների, բեռների եւ այլ գույքի մուտքը, այլ գործունեությունը սահմանային շերտում: Ժամանակավոր ռեժիմային սահմանափակումները չեն տարածվում պաշտպանական

Հոդված 23.Սահմանային շերտում տնտեսական գործունեություն իրականացնելու կարգը (վերնագիրը խմբ. 20.03.07 ՀՕ-138-Ն) Սահմանային շերտում պետական սահմանի պահպանության հետ չկապված այլ գործունեությունն արգելվում է, բացառությամբ օրենքով նախատեսված դեպքերի: Սահմանային շերտում տնտեսական գործունեությունն իրականացվում է միայն օրվա լուսավոր ժամերին: Գիշերային ժամերին, ինչպես նաեւ մութ ժամանակ սահմանային շերտում տնտեսական գործունեությունն արգելվում է, բացառությամբ անհրաժեշտության դեպքերի, սահմանապահ ջոկատի պետի թույլտվությամբ` սահմանապահ զորքերի հրամանատարության համաձայնությամբ: Համաճարակի կամ համաճարակի բռնկման վտանգի դեպքում վարակիչ հիվանդությունների տարածումը կանխելու նպատակով սահմանային շերտում կարող է ժամանակավորապես սահմանափակվել կամ արգելվել անասնապահությունը: Սահմանային շերտում հողերի, ջրային ռեսուրսների, անտառների, ընդերքի, բուսական եւ կենդանական աշխարհի օգտագործումը, երկրաբանական հետազոտությունները, լեռնային գործը, հիդրոկառույցների շինարարությունն իրականացվում են Հայաստանի Հանրապետության օրենսդրությամբ սահմանված կարգով: (23-րդ հոդվածը խմբ. 20.03.07 ՀՕ-138-Ն) Գ Լ ՈՒ Խ 5. ՊԵՏԱԿԱՆ ՍԱՀՄԱՆԻ ԱՆՑՄԱՆ ԿԵՏԵՐԻ ՌԵԺԻՄԸ Հոդված 24.Պետական սահմանի անցման կետերի ռեժիմի սահմանումը եւ պահպանումը Պետական սահմանի անցման կետերի ռեժիմը ներառում է`

Հոդված 25.Պետական սահմանի անցման կետերում անձանց, տրանսպորտային միջոցների մուտքի (ելքի), բեռների, կենդանիների եւ այլ գույքի տեղափոխման կարգը Պետական սահմանի անցման կետերում անձանց, տրանսպորտային միջոցների մուտքը (ելքը), բեռների, կենդանիների եւ այլ գույքի տեղափոխումն իրականացվում են համապատասխան փաստաթղթերի առկայության դեպքում՝ Հայաստանի Հանրապետության կառավարության սահմանած կարգով: (25-րդ հոդվածը փոփ. 06.07.22 ՀՕ-326-Ն) (06.07.22 ՀՕ-326-Ն օրենքն ունի անցումային դրույթ) Հոդված 26.Պետական սահմանի անցման կետերում անձանց ու տրանսպորտային միջոցների գտնվելու եւ տեղաշարժվելու կարգը Պետական սահմանի անցման կետերում ուղեւորների եւ բեռների միջազգային փոխադրումներ իրականացնող տրանսպորտային միջոցների կայանման տեղն ու տեւողությունը որոշում են օդանավակայանի, երկաթուղային կայարանի, ավտոմոբիլային կայանի եւ տրանսպորտային կազմակերպությունների ղեկավարները` համաձայնեցնելով սահմանապահ զորքերի եւ մաքսային մարմինների հետ: Մաքսային հսկողություն, սահմանային վերահսկողություն եւ օրենքով նախատեսված դեպքերում սահմանային այլ վերահսկողության կամ հսկողության գործառույթ իրականացնելու ժամանակամիջոցում անձանց մուտքն ուղեւորների եւ բեռների միջազգային փոխադրումներ իրականացնող տրանսպորտային միջոցներ սահմանափակվում է, իսկ անհրաժեշտության դեպքում կարող է նաեւ արգելվել: Հայաստանի Հանրապետությունից մեկնող եւ Հայաստանի Հանրապետություն ժամանող տրանսպորտային միջոցներ ուղեւորների նստելն ու դրանցից իջեցնելը, ինչպես նաեւ բեռնումն ու բեռնաթափումն իրականացվում են սահմանապահ զորքերի եւ մաքսային մարմինների թույլտվությամբ: Տրանսպորտային կազմակերպությունների պաշտոնատար անձինք, տրանսպորտային միջոցների սեփականատերերը կամ նրանց լիազորած անձինք սահմանապահ զորքերի ներկայացուցչի կամ մաքսային մարմինների պահանջով պարտավոր են զննման նպատակով բացել կնքված վագոնները, ավտոմեքենաները, տրանսպորտային միջոցները եւ դրանցով տեղափոխվող բեռները: Ուղեւորների եւ բեռների միջազգային փոխադրումներ իրականացնող տրանսպորտային միջոցները կարող են Հայաստանի Հանրապետությունից մեկնել եւ Հայաստանի Հանրապետության տարածք մուտք գործել, ինչպես նաեւ փոխել կայանման տեղը միայն սահմանապահ զորքերի եւ մաքսային մարմինների թույլտվությամբ: (26-րդ հոդվածը խմբ., փոփ. 06.07.22 ՀՕ-326-Ն) Հոդված 27.Պետական սահմանի անցման կետերում լրացուցիչ ռեժիմային կանոնները Պետական սահմանի անցման կետերում առանձնացվում է տարածք, շինություն, որտեղ ուղղակիորեն իրականացվում են սահմանային վերահսկողություն, մաքսային հսկողություն եւ օրենքով նախատեսված դեպքերում՝ նաեւ սահմանային այլ վերահսկողության կամ հսկողության գործառույթներ: Այդ տեղերում մտցվում են լրացուցիչ ռեժիմային սահմանափակումներ` սույն օրենքի 24-26-րդ հոդվածներով նախատեսված կարգի ու կանոնների սահմաններում: Պետական սահմանում Հայաստանի Հանրապետության շահերին սպառնալիք ծագելու դեպքում սահմանապահ զորքերի հրամանատարը կարող է ժամանակավորապես դադարեցնել հաղորդակցությունը պետական սահմանի անցման կետերում: (27-րդ հոդվածը փոփ. 04.12.19 ՀՕ-260-Ն, խմբ. 06.07.22 ՀՕ-326-Ն)

Հոդված 28.Հայաստանի Հանրապետության պետական կառավարման մարմինների լիազորությունները պետական սահմանի պահպանության ոլորտում Հայաստանի Հանրապետության արտաքին գործերի բնագավառի պետական լիազորված մարմինը` ա) իր իրավասության սահմաններում բանակցում է պետական սահմանի ռեժիմի պահպանման հարցերով, պատրաստում է անհրաժեշտ փաստաթղթեր եւ նյութեր. բ) իր իրավասության սահմաններում իրականացնում է պետական սահմանի պահպանության արտաքին քաղաքական, միջազգային-իրավական ապահովումը. գ) իր իրավասության սահմաններում ձեւակերպում է Հայաստանի Հանրապետության քաղաքացիների, օտարերկրյա պետությունների քաղաքացիների եւ քաղաքացիություն չունեցող անձանց` Հայաստանի Հանրապետություն մուտքի ու Հայաստանի Հանրապետությունից մեկնելու փաստաթղթերը. դ) լուծում է պետական սահմանի ռեժիմի պահպանման հարցերով պետական սահմանում Հայաստանի Հանրապետության սահմանային ներկայացուցիչների կողմից չկարգավորված հարցերն ու միջադեպերը: Հայաստանի Հանրապետության ազգային անվտանգության բնագավառի պետական լիազորված մարմինը` ա) պետական սահմանում Հայաստանի Հանրապետության անվտանգության ապահովման ընդհանուր համակարգում ապահովում է անձի, հասարակության եւ պետության կենսական շահերի պաշտպանությունը. բ) սահմանային շերտում եւ միջազգային հաղորդակցության ուղիներում իրականացնում է քաղաքական, սոցիալ-տնտեսական ու քրեածին իրադրության վերլուծություն եւ կանխատեսում. գ) ազգային անվտանգության մարմինների օպերատիվ-հետախուզական աշխատանքն ուղղում է պետական սահմանով օտարերկրյա պետությունների հատուկ ծառայությունների, հանցավոր խմբերի եւ առանձին անձանց ապօրինի գործունեությունը բացահայտելուն, կանխելուն ու խափանելուն. դ) օրենքով նախատեսված դեպքերում իրականացնում է սահմանային այլ վերահսկողության կամ հսկողության գործառույթներ: Հայաստանի Հանրապետության պաշտպանության բնագավառի պետական լիազորված մարմինը` ա) ապահովում է պետական սահմանի օդային տարածքի պաշտպանությունը. բ) ապահովում է Հայաստանի Հանրապետության զինված ուժերի մասնակցությունը պետական սահմանի պահպանությանը` սույն օրենքով եւ Հայաստանի Հանրապետության օրենսդրությամբ սահմանված կարգով. գ) իր իրավասության սահմաններում աջակցում է սահմանապահ զորքերին ռեսուրսային (պաշարային), հետախուզական ու պետական սահմանի պահպանության եւ այլ հարցերում: Հայաստանի Հանրապետության ոստիկանության բնագավառի պետական լիազորված մարմինը` ա) իր իրավասության սահմաններում աջակցում է սահմանապահ զորքերին պետական սահմանի պահպանության ոլորտում ռեժիմային միջոցառումներ իրականացնելիս, պետական սահմանում հակաիրավական գործունեության դեմ պայքարելիս, պետական սահմանի ռեժիմը խախտողներին որոնելիս, վարչական ձերբակալման ենթարկված անձանց կատարած իրավախախտումները քննելիս. բ) սահմանապահ զորքերի ներկայացմամբ պետական սահմանը խախտողներին որոնելիս, զինված ներխուժումը կամ սահմանակից պետության քաղաքացիների` Հայաստանի Հանրապետության տարածք զանգվածային ներխուժումը հետ մղելիս, ապահովում է տեղանքի առանձին տեղամասեր անձանց մուտքի ժամանակավորապես սահմանափակումը կամ արգելումը, արտակարգ իրավիճակների ժամանակ սահմանային գոտում (օդանավակայաններում, երկաթուղային, ավտոմոբիլային կայաններում եւ այլ օբյեկտներում) ապահովում է հասարակական կարգը. գ) սահմանային գոտում սահմանապահ զորքերի հետ համատեղ մասնակցում է բնակչության իրավական դաստիարակությանը, պետական սահմանում եւ պետական սահմանի անցման կետերում իրավախախտումների կանխման ուղղությամբ նախապատրաստական աշխատանքներին: Հայաստանի Հանրապետության մաքսային հսկողության բնագավառի պետական լիազորված մարմինը` ա) իրականացնում է մաքսային հսկողություն. բ) օրենքով նախատեսված դեպքերում իրականացնում է սահմանային այլ վերահսկողության կամ հսկողության գործառույթներ: (28-րդ հոդվածը փոփ. 20.03.07 ՀՕ-138-Ն, լրաց. 06.07.22 ՀՕ-326-Ն)

Հոդված 29.Հակաօդային պաշտպանության զորքերի լիազորությունները պետական սահմանի պահպանության ոլորտում Հակաօդային պաշտպանության զորքերի պետական սահմանը պահպանում են օդային տարածություններում: Հակաօդային պաշտպանության զորքերն իրավասու են` ա) օդանավին կամ թռչող այլ սարքին առաջարկել պատասխանելու հարցման ազդանշաններին, հարցում կատարել Հայաստանի Հանրապետության օդային տարածք մտնելու նպատակների մասին. բ) օդանավին կամ թռչող այլ սարքին առաջարկել փոխելու թռիչքի ուղղությունը դեպի թռիչքների համար առանձնացված օդային միջանցքներ, առաջարկել վայրէջք կատարելու միջազգային օդանավակայաններում, իսկ դրա անհնարինության դեպքում` մոտակա օդանավակայանում կամ համապատասխան այլ տարածքում. գ) Հայաստանի Հանրապետության անվտանգությանն սպառնալու դեպքում կամ Հայաստանի Հանրապետության նկատմամբ թշնամական որեւէ գործողություն կատարելիս ուղեկցել եւ ստիպել օդանավին կամ թռչող այլ սարքին վայրէջք կատարել օդանավակայաններում կամ համապատասխան այլ տարածքում: Եթե օդանավը կամ թռչող այլ սարքը շարունակում է նշված գործողությունները, հակաօդային պաշտպանության զորքերի ստորաբաժանումները ոչնչացնում են նշված օդանավը կամ թռչող այլ սարքը: Սույն հոդվածի 2-րդ մասով նախատեսված դեպքերում հակաօդային պաշտպանության զորքերի կողմից հակաօդային պաշտպանության միջոցներն օգտագործվում են Հայաստանի Հանրապետության կառավարության որոշմամբ սահմանված կարգով: (29-րդ հոդվածը լրաց. 10.12.21 ՀՕ-375-Ն) Հոդված 30.Սահմանապահ զորքերի կողմից օդանավի կամ թռչող այլ սարքի կալանման հիմքերը Հայաստանի Հանրապետության տարածքում գտնվող օդանավը կամ թռչող այլ սարքը սահմանապահ զորքերը կալանում են, եթե օդանավը կամ թռչող այլ սարքը` ա) ի վնաս Հայաստանի Հանրապետության անվտանգության, զբաղվում է տեղեկատվություն հավաքելով կամ կատարում է Հայաստանի Հանրապետության նկատմամբ թշնամական որեւէ այլ գործողություն. բ) գտնվել է թռիչքների համար առանձնացված օդային միջանցքներից դուրս. գ) մարդկանց իջեցնում կամ նստեցնում է, բեռները բեռնում կամ բեռնաթափում է միջազգային օդանավակայաններում` առանց համապատասխան թույլտվության, ինչպես նաեւ հրամանատարի կողմից անհրաժեշտ փաստաթղթեր չներկայացնելու դեպքում: Հոդված 31.Օդանավի կամ թռչող այլ սարքի զննման կամ կալանման արձանագրությունը Օդանավի կամ թռչող այլ սարքի զննման կամ կալանման մասին կազմվում է արձանագրություն, որն ստորագրում են սահմանապահ զորքերի ներկայացուցիչը եւ զննված կամ կալանված օդանավի կամ թռչող այլ սարքի հրամանատարը: Արձանագրությունը կազմվում է հայերեն, անհրաժեշտության դեպքում ապահովվում է արձանագրության տեքստի թարգմանությունը: Օդանավի կամ թռչող այլ սարքի կալանման դեպքում հրամանատարից առգրավվում են օդանավի կամ թռչող այլ սարքի եւ բեռի փաստաթղթերը, որոնք կցվում են արձանագրությանը: Եթե զննված կամ կալանված օդանավի կամ թռչող այլ սարքի հրամանատարը սահմանապահ զորքերի զինծառայողների գործողությունները համարում է ապօրինի կամ համաձայն չէ արձանագրության բովանդակությանը, կարող է այդ մասին նշել արձանագրության մեջ կամ առանձին` արձանագրությանը կցվող փաստաթղթերում: Եթե հրամանատարը հրաժարվում է ստորագրել արձանագրությունը, ապա այդ մասին կատարում է համապատասխան գրառում: Հոդված 32.Օտարերկրյա պետության օդանավի կամ թռչող այլ սարքի կալանման հետեւանքները Օտարերկրյա պետության կալանված օդանավը կամ թռչող այլ սարքը Հայաստանի Հանրապետության օրենսդրությամբ սահմանված կարգով կամ հանձնվում է համապատասխան օտարերկրյա պետությունների լիազոր ներկայացուցիչներին, կամ արտաքսվում է Հայաստանի Հանրապետության տարածքից, կամ Հայաստանի Հանրապետության օրենսդրությամբ նախատեսված դեպքերում բռնագրավվում է դատարանի որոշմամբ:

Հոդված 33.Համագործակցությունը պետական սահմանը պահպանելիս Սահմանապահ զորքերը եւ հակաօդային պաշտպանության զորքերը միմյանց օժանդակում են պետական սահմանի պահպանությունն իրականացնելիս, իրենց իրավասությունների սահմաններում համաձայնեցնում են պետական սահմանի ռեժիմի տարբեր տեսակի վերահսկողություն իրականացնող պետական մարմինների գործողությունները` չմիջամտելով այդ գործողություններին: Սահմանապահ զորքերը, Հայաստանի Հանրապետության միջազգային պայմանագրերին համաձայն, համագործակցում են սահմանակից պետությունների համապատասխան մարմինների հետ: (33-րդ հոդվածը փոփ. 06.07.22 ՀՕ-326-Ն) Գ Լ ՈՒ Խ 8. ՊԵՏԱԿԱՆ ՄԱՐՄԻՆՆԵՐԻ, ՊԱՇՏՈՆԱՏԱՐ ԱՆՁԱՆՑ, ՔԱՂԱՔԱՑԻՆԵՐԻ ԵՎ ԿԱԶՄԱԿԵՐՊՈՒԹՅՈՒՆՆԵՐԻ ՄԱՍՆԱԿՑՈՒԹՅՈՒՆԸ ՊԵՏԱԿԱՆ ՍԱՀՄԱՆԻ ՊԱՀՊԱՆՈՒԹՅԱՆԸ Հոդված 34.Պետական մարմինների, պաշտոնատար անձանց, քաղաքացիների եւ կազմակերպությունների մասնակցությունը պետական սահմանի պահպանությանն ու նրանց պարտականությունները Պետական մարմինները, պաշտոնատար անձինք, քաղաքացիները եւ կազմակերպությունները պարտավոր են իրենց իրավասության շրջանակներում աջակցել սահմանապահ զորքերին պետական սահմանի պահպանության գործում, իսկ պետական սահմանին սպառնացող վտանգի մասին տեղեկություններն անհապաղ հայտնել սահմանապահ զորքերին: Պետական մարմինները, պաշտոնատար անձինք, քաղաքացիները եւ կազմակերպությունները պարտավոր են կատարել պետական սահմանի ռեժիմի, սահմանային ռեժիմի պահանջները: Քաղաքացիները պետական սահմանի պահպանությանը մասնակցում են կամավոր հիմունքներով: Գ Լ ՈՒ Խ 9. ԵԶՐԱՓԱԿԻՉ ԴՐՈՒՅԹՆԵՐ Հոդված 35.Օրենքի ուժի մեջ մտնելը