Հոդված 1.Օրենքի նպատակները Սույն օրենքը կարգավորում է կենդանիների ցեղերի սելեկցիոն նվաճումների ստեղծման, իրավական պահպանության ու օգտագործման հետ կապված գույքային եւ անձնական ոչ գույքային հարաբերությունները: (1-ին հոդվածը լրաց. 04.11.03 ՀՕ-29-Ն, փոփ. 08.12.17 ՀՕ-233-Ն) Հոդված 2.Սելեկցիոն նվաճումների պահպանության մասին օրենսդրությունը Սելեկցիոն նվաճումների պահպանության եւ օգտագործման բնագավառում իրավական հարաբերությունները կարգավորվում են սույն օրենքով, Հայաստանի Հանրապետության քաղաքացիական օրենսգրքով եւ Հայաստանի Հանրապետության իրավական այլ ակտերով: Եթե Հայաստանի Հանրապետության միջազգային պայմանագրերով սահմանված են այլ նորմեր, ապա գործում են այդ նորմերը: Հոդված 3.Օրենքում օգտագործվող հիմնական հասկացությունները Սույն օրենքում օգտագործվում են հետեւյալ հիմնական հասկացությունները. ա) (կետն ուժը կորցրել է 08.12.17 ՀՕ-233-Ն) բ) սելեկցիոն նվաճում՝ (պարբերությունն ուժը կորցրել է 08.12.17 ՀՕ-233-Ն) - անասնաբուծությունում՝ մարդու կողմից ստեղծված եւ ծննդաբանական կառուցվածքով ու դա նույն կենդանիների ցեղի կենդանիներից տարբերելու եւ կենդանիների մեկ ցեղի ձեւով բազմանալու համար քանակապես բավարար հատկություններով օժտված կենդանիների ցեղը, այսինքն՝ ընդհանուր ծագում ունեցող կենդանիների բազմանդամ խումբը. գ) (կետն ուժը կորցրել է 08.12.17 ՀՕ-233-Ն) դ) (կետն ուժը կորցրել է 08.12.17 ՀՕ-233-Ն) դ 1 ) կենդանու ցեղ՝ կենդանիների խումբ, որն օժտված է գենետիկորեն պայմանավորված կենսաբանական եւ կազմաբանական հատկություններով եւ հատկանիշներով, որոնցից մեկը կամ մի քանիսը յուրահատուկ են տվյալ խմբի համար ու դրանցով տարբերվում են այլ խմբի կենդանիներից: Ցեղը ներկայացվում է արական եւ իգական սեռի կենդանիներով կամ տոհմանյութով: Ցեղի պահպանվող կատեգորիաներն են տիպը եւ գիծը. դ 2 ) տոհմանյութ՝ տոհմային կենդանի, դրա սեռական բջիջները, սաղմերը. դ 3 ) տոհմային կենդանի՝ ցեղի վերարտադրության համար նախատեսված կենդանի. ե) պահպանվող սելեկցիոն նվաճում` կենդանու ցեղ, որը գրանցվել է պահպանվող սելեկցիոն նվաճումների պետական գրանցամատյանում (այսուհետ` պետական գրանցամատյան). զ) հանրահայտ ցեղ` ճշգրիտ նկարագրություն ունեցող, պետական գրանցամատյանում գրանցում ստացած սելեկցիոն նվաճում. է) հայտատու` սելեկցիոն նվաճման արտոնագիր ստանալու համար հայտ ներկայացնող ֆիզիկական կամ իրավաբանական անձ. ը) հեղինակ` ֆիզիկական անձ կամ ֆիզիկական անձանց խումբ, որի ստեղծագործական աշխատանքով ստեղծվել են ցեղը. թ) սելեկցիոներ` ցեղի հեղինակը, նրա ժառանգորդները, անձինք, որոնք ցեղի հեղինակի գործատուն եւ նրանց իրավահաջորդներն են. ժ) լիազորված մարմին` սելեկցիոն նվաճման արտոնագրումն իրականացնող պետական լիազորված մարմին. ժա) բողոքարկման խորհուրդ` լիազորված մարմնի ստեղծած հանձնաժողով, որը լուծում է սելեկցիոն նվաճումների փորձաքննության հետ կապված վիճելի հարցերը: (3-րդ հոդվածը լրաց., խմբ., փոփ. 04.11.03 ՀՕ-29-Ն, փոփ. 08.12.17 ՀՕ-233-Ն)

Հոդված 4.Սելեկցիոն նվաճումների իրավական պահպանությունը 1. Սելեկցիոն նվաճման իրավունքը պահպանվում է օրենքով եւ հաստատագրվում է սելեկցիոն նվաճման արտոնագրով: Սելեկցիոն նվաճման արտոնագրի ձեւը սահմանում է Հայաստանի Հանրապետության կառավարությունը: 2. Արտոնագիրը հաստատում է արտոնագրատիրոջ` սելեկցիոն նվաճումն օգտագործելու բացառիկ իրավունքը: 3. Արտոնագիր ստացած սելեկցիոն նվաճումը գրանցվում է պետական գրանցամատյանում: 4. Արտոնագրի գործողության ժամկետը սահմանվում է 30 տարի: (4-րդ հոդվածը լրաց. 04.11.03 ՀՕ-29-Ն, 28.09.16 ՀՕ-145-Ն, խմբ. 08.12.17 ՀՕ-233-Ն)

Հոդված 5.Սելեկցիոն նվաճման իրավական պահպանության չափանիշները Սելեկցիոն նվաճման իրավական պահպանության չափանիշներն են` 1) նորությունը. Ցեղը համարվում է նոր, եթե մինչեւ արտոնագրման հայտ ներկայացնելու օրը տվյալ ցեղի տոհմանյութը սելեկցիոներն այլ անձանց չի վաճառել կամ այլ կերպ չի փոխանցել ցեղն օգտագործելու նպատակով` ա) Հայաստանի Հանրապետության տարածքում արտոնագրման հայտը ներկայացնելու օրվանից ավելի վաղ, քան 1 տարի առաջ, բ) այլ պետության տարածքում արտոնագրման հայտը ներկայացնելու օրվանից ավելի վաղ, քան չորս տարի առաջ. 2) տարբերիչ առանձնահատկությունը. Սելեկցիոն նվաճումը համարվում է տարբերիչ առանձնահատկություն ունեցող, եթե արտոնագրման հայտը ներկայացնելու պահին հստակ տարբերվում է հանրահայտ սելեկցիոն նվաճումից. 3) միատարրությունը. Սելեկցիոն նվաճումը համարվում է միատարր, եթե հաշվի առնելով նրա բազմացման առանձնահատկությունները` այդ ցեղի կենդանիները բավականաչափ միատարր են իրենց հիմնական հատկանիշներով. 4) կայունությունը. Սելեկցիոն նվաճումը համարվում է կայուն, եթե նրա հիմնական հատկանիշները բազմակի վերարտադրությունից կամ վերարտադրության առանձնահատուկ ցիկլի դեպքում` ամեն մի այդպիսի ցիկլի վերջում, մնում են անփոփոխ: (5-րդ հոդվածը լրաց. 04.11.03 ՀՕ-29-Ն, փոփ. 08.12.17 ՀՕ-233-Ն)

Հոդված 6.Արտոնագրի խնդրարկումը 1. Սելեկցիոն նվաճման արտոնագիր ստանալու հայտը (այսուհետ` հայտ) լիազորված մարմին է ներկայացնում սելեկցիոները: 2. Հայտի դիմումը ներկայացվում է հայոց լեզվով: 3. Հայտի մյուս փաստաթղթերը կարող են ներկայացվել այլ լեզվով: Այդ դեպքում ազգային հայտատուն պարտավոր է դրանց հայերեն թարգմանությունը ներկայացնել հայտի հետ միասին, իսկ օտարերկրյա հայտատուն` հայտը ներկայացնելու օրվանից երկու ամսվա ընթացքում: 4. Հայտը պետք է վերաբերի մեկ սելեկցիոն նվաճման: 5. Սելեկցիոն նվաճման հայտը պետք է պարունակի` ա) դիմում` արտոնագիր ստանալու մասին, որտեղ նշվում են սելեկցիոն նվաճման անվանումը, հայտատուն (հայտատուները), հեղինակը (համահեղինակները) եւ նրանց բնակության կամ գտնվելու վայրը. բ) սելեկցիոն նվաճման նկարագրությունը: 6. (մասն ուժը կորցրել է 28.09.16 ՀՕ-145-Ն) 7. Սելեկցիոն նվաճման հայտի փաստաթղթերի ձեւերի նկատմամբ պահանջները, այդ թվում՝ դիմումի ձեւը, սահմանում է լիազորված մարմինը. 8. Հայտը կարող է ներկայացվել առձեռն, փոստով կամ էլեկտրոնային եղանակով՝ լիազորված մարմնի պաշտոնական կայքի միջոցով: (6-րդ հոդվածը փոփ., լրաց. 28.09.16 ՀՕ-145-Ն)

Հոդված 7.Սելեկցիոն նվաճման անվանումը 1. Սելեկցիոն նվաճումը պետք է ունենա անվանում, որում պետք է ընդգրկվի ծագումնաբանությունը: 2. Անվանումը պետք է թույլ տա նույնականացնել ցեղը, բացառի միայն թվային արտահայտությունը, տարակուսանք չառաջացնի ցեղի որակական եւ ծագումնաբանական հարցերում: 3. Լիազորված մարմնին ցեղի անվանումն առաջարկում է սելեկցիոները: Եթե հայտնաբերվում է, որ այդ անվանումը չի համապատասխանում սույն հոդվածի 2-րդ կետի պահանջներին, ապա վերոհիշյալ մարմինը մերժում է գրանցումն ու պահանջում է, որ սելեկցիոները մեկ ամսվա ընթացքում առաջարկի ուրիշ անվանում: Ցեղի անվանումը գրանցում է լիազորված մարմինը` միաժամանակ տալով արտոնագիր: 4. Երրորդ անձանց կողմից նախկինում ձեռք բերված իրավունքները չեն քննարկվում: 5. Սելեկցիոն նվաճումն օգտագործվում է միայն պետական գրանցամատյանում գրանցված անվանմամբ: (7-րդ հոդվածը լրաց. 04.11.03 ՀՕ-29-Ն, փոփ. 08.12.17 ՀՕ-233-Ն)

Հոդված 8.Սելեկցիոն նվաճման առաջնությունը Սելեկցիոն նվաճման առաջնությունը որոշվում է հայտը լիազորված մարմին ներկայացնելու թվականով:

Հոդված 10.Սելեկցիոն նվաճման նորության փորձաքննությունը 1. Հայտը հրապարակելու օրվանից վեց ամսվա ընթացքում յուրաքանչյուր շահագրգիռ անձ կարող է լիազորված մարմին ներկայացնել առարկություն` հայտարարված սելեկցիոն նվաճման նորության վերաբերյալ: 2. Առարկության բացակայության դեպքում լիազորված մարմինը երեք օրվա ընթացքում որոշում է կայացնում հայտը նորության չափանիշին համապատասխանելու մասին: Լիազորված մարմինը որոշման մասին հայտատուին հայտնում է սույն օրենքի 9-րդ հոդվածի 7.1-ին մասով սահմանված կարգով եւ ժամկետներում: 3. Առարկություն ստանալու դեպքում լիազորված մարմինը տեղեկացնում է հայտատուին` տրամադրելով առարկության պատճենը: Լիազորված մարմինը, առարկությունն ստանալուց հետո՝ մեկ աշխատանքային օրվա ընթացքում, հայտում նշված եղանակով՝ կապի միջոցների օգտագործմամբ (այդ թվում՝ հայտատուի նշած հեռախոսահամարին հաղորդագրություն ուղարկելով) կամ էլեկտրոնային համակարգի միջոցով (այդ թվում՝ հայտատուի նշած էլեկտրոնային փոստի միջոցով) կամ օրենսդրությամբ սահմանված էլեկտրոնային կապի այլ միջոցներով տեղեկացնում է հայտատուին այդ մասին: Առարկությունն ստանալուց հետո՝ երեք աշխատանքային օրվա ընթացքում, լիազորված մարմինն առարկության պատճենը ուղարկում է հայտատուին փոստով, եթե հայտատուն հայտում նշում կատարելու միջոցով ցանկություն չի հայտնել լիազորված մարմնում նույն ժամկետում առարկության պատճենը ստանալ առձեռն: Եթե հայտատուն ծանուցագիր ստանալու օրվանից երեք ամսվա ընթացքում լիազորված մարմին գրավոր հերքում չի ներկայացնում, ապա լիազորված մարմինը որոշում է կայացնում արտոնագիր տալը մերժելու մասին: 4. Հերքում ստանալու դեպքում, իր ունեցած նյութերի հիման վրա պետական լիազորված մարմինը հայտի պաշտոնական հրապարակման օրվանից 12 ամսվա ընթացքում որոշում է կայացնում հայտը նորության չափանիշին համապատասխանելու կամ արտոնագիր տալը մերժելու մասին: Լիազորված մարմինը որոշման մասին հայտատուին հայտնում է սույն օրենքի 9-րդ հոդվածի 7.1-ին մասով սահմանված կարգով եւ ժամկետներում: 5. Արտոնագիր տալը մերժելու մասին որոշմանը չհամաձայնելու դեպքում, դա ստանալու օրվանից երկու ամսվա ընթացքում, հայտատուն իրավունք ունի բողոք ներկայացնել լիազորված մարմնի բողոքարկման խորհուրդ: (նախադասությունը հանվել է 28.09.16 ՀՕ- 145-Ն) Բողոքարկման խորհուրդը բողոքը քննարկում է այն ստանալու օրվանից մեկ ամսվա ընթացքում: Լիազորված մարմինը բողոքարկման խորհրդի որոշման մասին հայտատուին հայտնում է սույն օրենքի 9-րդ հոդվածի 7.1-ին մասով սահմանված կարգով եւ ժամկետներում: Լիազորված մարմնի բողոքարկման խորհրդի ձեւավորման կարգը, կանոնադրությունը եւ բողոքների քննարկման կարգը հաստատում է Հայաստանի Հանրապետության կառավարությունը։ Բողոքարկման խորհրդի որոշումը հայտը նորության չափանիշին համապատասխանելու կամ արտոնագիր տալը մերժելու մասին համարվում է լիազորված մարմնի վերջնական որոշում: 6. Բողոքարկման խորհրդի որոշմանը չհամաձայնելու դեպքում հայտատուն իրավունք ունի օրենքով սահմանված կարգով դիմել դատարան: (10-րդ հոդվածը փոփ., լրաց. 28.09.16 ՀՕ-145-Ն)

Հոդված 11.Սելեկցիոն նվաճման տարբերիչ առանձնահատկության, միատարրության եւ կայունության փորձարկումը 1. Սելեկցիոն նվաճման տարբերիչ առանձնահատկության, միատարրության եւ կայունության փորձարկումը կատարվում է Հայաստանի Հանրապետության կառավարության սահմանած կարգով եւ դեպքերում: Հայտատուն անհրաժեշտ քանակությամբ տոհմանյութ է տրամադրում փորձարկման համար: 2. Որպես փորձարկման արդյունք կարող են օգտագործվել Հայաստանի Հանրապետության հետ համապատասխան պայմանագիր կնքած օտարերկրյա պետությունների իրավասու մարմինների, լիազորված մարմնի հետ պայմանագիր կնքած կազմակերպությունների, ինչպես նաեւ հայտատուի տրամադրած տվյալները: 3. Սելեկցիոն նվաճման տարբերիչ առանձնահատկության, միատարրության եւ կայունության փորձարկումները կարող են համատեղվել դրա տնտեսական օգտակարության նպատակով կատարվող պետական փորձարկումների հետ: 4. Լիազորված մարմինը սելեկցիոն նվաճման պաշտպանունակության չափանիշների փորձաքննության դրական արդյունքների հիման վրա կայացնում է որոշում` արտոնագիր տալու մասին եւ կազմում է սելեկցիոն նվաճման նկարագրությունը: 5. Արտոնագիր տալը մերժելու մասին փորձաքննության որոշմանը չհամաձայնելու դեպքում, դա ստանալու օրվանից երկու ամսվա ընթացքում, հայտատուն իրավունք ունի կրկնական փորձաքննության խնդրանքով դիմել լիազորված մարմին: Կրկնական փորձաքննության անցկացման կարգը սահմանում է Հայաստանի Հանրապետության կառավարությունը: 6. Կրկնական փորձաքննությունից հետո լիազորված մարմինը կայացնում է որոշում` արտոնագիր տալու կամ արտոնագիր տալը մերժելու մասին: 7. Կրկնական փորձաքննությունից հետո արտոնագիր տալը մերժելու մասին որոշմանը չհամաձայնելու դեպքում, դա ստանալու օրվանից երկու ամսվա ընթացքում, հայտատուն իրավունք ունի բողոք ներկայացնել լիազորված մարմնի բողոքարկման խորհուրդ: Բողոքարկման խորհուրդը բողոքը քննարկում է դա ստանալու օրվանից երկու ամսվա ընթացքում: Լիազորված մարմինը որոշման մասին հայտատուին հայտնում է սույն օրենքի 9- րդ հոդվածի 7.1-ին մասով սահմանված կարգով եւ ժամկետներում: 8. Բողոքարկման խորհրդի որոշմանը չհամաձայնելու դեպքում հայտատուն իրավունք ունի օրենքով սահմանված կարգով դիմել դատարան: (11-րդ հոդվածը լրաց. 04.11.03 ՀՕ-29-Ն, փոփ., լրաց. 28.09.16 ՀՕ-145-Ն, փոփ. 08.12.17 ՀՕ-233-Ն)

Հոդված 12.Սելեկցիոն նվաճման գրանցումը Սելեկցիոն նվաճմանն արտոնագիր տալու մասին լիազորված մարմնի որոշումը հիմք է սելեկցիոն նվաճումը պետական գրանցամատյանում գրանցելու համար: Պետական գրանցամատյանի վարման եւ հրապարակման կարգը սահմանում է Հայաստանի Հանրապետության կառավարությունը: (12-րդ հոդվածը լրաց. 04.11.03 ՀՕ-29-Ն)

Հոդված 14.Սելեկցիոն նվաճման հեղինակի իրավունքները 1. Լիազորված մարմինը սելեկցիոն նվաճման արտոնագրատեր չհամարվող յուրաքանչյուր հեղինակի տալիս է հեղինակային վկայագիր: Հեղինակային վկայագրի ձեւը սահմանում է Հայաստանի Հանրապետության կառավարությունը: 2. Հեղինակային վկայագիրը հաստատում է սելեկցիոն նվաճման հեղինակ լինելը եւ հեղինակի` արտոնագրատիրոջից սելեկցիոն նվաճման օգտագործման դիմաց վարձատրություն ստանալու իրավունքը, եթե նա արտոնագրատեր չէ: 3. Սելեկցիոն նվաճման արտոնագրատեր չհամարվող հեղինակի վարձատրության չափը եւ վճարման պայմանները որոշվում են արտոնագրատիրոջ եւ հեղինակի միջեւ կնքված պայմանագրով: 4. Սելեկցիոն նվաճման համահեղինակների վարձատրությունը կարգավորվում է նրանց միջեւ կնքված պայմանագրով: 5. Հեղինակության յուրացումը, համահեղինակության պարտադրումը, մինչեւ հայտ ներկայացնելն առանց հեղինակի համաձայնության հայտի էության հրապարակումը, ինչպես նաեւ ներկայացված սելեկցիոն նվաճման էության բացահայտումը պետական արտոնագրային փորձագետի կողմից մինչեւ դրանց պաշտոնական հրապարակումն առաջացնում են պատասխանատվություն` Հայաստանի Հանրապետության օրենսդրությանը համապատասխան: (14-րդ հոդվածը լրաց. 28.09.16 ՀՕ-145-Ն)

Հոդված 15.Արտոնագրատիրոջ իրավունքները չխախտող գործողությունները Արտոնագրատիրոջ սելեկցիոն նվաճման իրավունքի խախտում չի համարվում, եթե արտոնագրված սելեկցիոն նվաճումն օգտագործվում է` ա) անձնական եւ ոչ առեւտրային նպատակներով. բ) փորձարարական նպատակներով. գ) որպես ելանյութ` նոր ցեղերի ստացման համար: (15-րդ հոդվածը լրաց. 04.11.03 ՀՕ-29-Ն, փոփ. 08.12.17 ՀՕ-233-Ն) Հոդված 16.Սելեկցիոն նվաճման ժամանակավոր իրավական պահպանությունը 1. Սելեկցիոն նվաճման հայտի պաշտոնական հրապարակման օրվանից մինչեւ տրված արտոնագրի մասին պաշտոնական տեղեկությունների հրապարակումը սելեկցիոն նվաճմանը տրվում է ժամանակավոր իրավական պահպանություն` համընդհանուր ծանոթացման դրված հավակնության սահմանման ծավալով: Սելեկցիոն նվաճման ժամանակավոր պահպանությունն ընդգրկում է սույն օրենքով արտոնագրատիրոջը տրվող բոլոր իրավունքները: 2. Ժամանակավոր իրավական պահպանությունը համարվում է չկայացած, եթե արտոնագիր տալը մերժելու մասին լիազորված մարմնի որոշման բողոքարկման հնարավորություններն սպառվել են: 3. Երրորդ անձինք, ովքեր օգտագործել են սելեկցիոն նվաճումը, սույն հոդվածի 1-ին կետում նշված ժամանակամիջոցում, դրա օգտագործման համար համապատասխան դրամական փոխհատուցում են վճարում արտոնագրատիրոջը: Փոխհատուցման չափը որոշվում է կողմերի համաձայնությամբ: Այդ համաձայնության բացակայության դեպքում հարցը լուծվում է դատական կարգով: 4. Սույն հոդվածի 1-ին կետում նշված ժամանակամիջոցը կարող է սկսվել այն օրվանից, երբ հայտատուն սելեկցիոն նվաճման մասին տեղեկացրել է դա օգտագործող անձին, եթե այդ օրը նախորդում է սելեկցիոն նվաճման հայտի պաշտոնական հրապարակման օրվան:

Հոդված 17.Սելեկցիոն նվաճման օգտագործման իրավունք տալը 1. Սելեկցիոն նվաճման օգտագործումը կարգավորվում է լիցենզային (բացառիկ, հասարակ, բաց եւ հարկադրական) պայմանագրերով: 2. Լիազորված մարմնում չգրանցված լիցենզային պայմանագրերն անվավեր են: Լիցենզային պայմանագրերի գրանցման կարգը սահմանում է Հայաստանի Հանրապետության կառավարությունը: 3. Բացառիկ լիցենզիայի դեպքում սելեկցիոն նվաճման օգտագործման բացառիկ իրավունքը փոխանցվում է լիցենզային պայմանագրով նախատեսված սահմաններում, ընդ որում, լիցենզատուն պահպանում է սելեկցիոն նվաճման օգտագործման իրավունքն այն մասով, որը չի փոխանցվել լիցենզառուին: 4. Հասարակ լիցենզիայի դեպքում լիցենզատուն, սելեկցիոն նվաճման օգտագործման իրավունքը փոխանցելով լիցենզառուին, պահպանում է արտոնագրից բխող բոլոր իրավունքները, այդ թվում` նաեւ երրորդ անձանց լիցենզիա տալու իրավունքը: 5. Բաց լիցենզիայի դեպքում արտոնագրատերը կարող է դիմել լիազորված մարմնի պաշտոնական տեղեկագրում սելեկցիոն նվաճման օգտագործման իրավունքն այլ անձի տալու մասին հայտարարություն հրապարակելու խնդրանքով: Բացի լիցենզիա ձեռք բերելու ցանկություն հայտնած անձը պարտավոր է արտոնագրատիրոջ հետ կնքել պայմանագիր` վճարումների մասին: 6. Հայաստանի Հանրապետության ազգային անվտանգության, հասարակության շահերից ելնելով կամ արտակարգ իրավիճակներում, ինչպես նաեւ պետության կողմից ոչ առեւտրային օգտագործման դեպքում Հայաստանի Հանրապետության կառավարությունն առանց արտոնագրատիրոջ համաձայնության իրավասու է օգտագործել կամ լիազորել երրորդ անձանց` օգտագործելու սելեկցիոն նվաճումը` դրա մասին տասն օրվա ընթացքում իրազեկ պահելով արտոնագրատիրոջը եւ ապահովելով նրան համարժեք դրամական փոխհատուցում` նկատի ունենալով յուրաքանչյուր դեպքի հանգամանքները եւ հաշվի առնելով այդպիսի թույլտվության տնտեսական նշանակությունը: 7. Հարկադրական լիցենզիա տրամադրելու պայմանները կարգավորվում են Հայաստանի Հանրապետության կառավարության հաստատած կարգով: 8. Հարկադրական լիցենզիան կարող է լինել միայն հասարակ (ոչ բացառիկ) եւ, կախված դրա նպատակից, տրվում է որոշակի ժամկետով եւ պայմաններով: Այդ ժամկետը կարող է երկարաձգվել, եթե շարունակում են գործել այն պայմանները, որոնց հիման վրա տրվել է հարկադրական լիցենզիան: Հարկադրական լիցենզիան անվավեր է ճանաչվում, եթե լիցենզառուն խախտում է այն պայմանները, որոնց հիման վրա տրվել է հարկադրական լիցենզիան: 9. Լիցենզային պայմանագրերի հետ կապված վեճերը լուծվում են դատական կարգով:

Հոդված 18.Սելեկցիոն նվաճման իրավական պահպանության վաղաժամկետ դադարեցումը 1. Սելեկցիոն նվաճման իրավական պահպանությունը վաղաժամկետ դադարեցվում է, եթե` ա) լիազորված մարմինը որոշում է կայացրել արտոնագիր տալը մերժելու մասին. բ) հայտատուն հետ է կանչել հայտը, կամ արտոնագրատերը գրավոր ձեւով հրաժարվել է արտոնագրից. գ) եթե պարզվել է, որ իրավական պահպանությունը տրվել է` գա) անձի, որն այդ իրավունքը չունի. գբ) գլխավորապես սելեկցիոների ներկայացրած փաստաթղթերի հիման վրա, եւ «տարբերիչ առանձնահատկություն», «միատարրություն» եւ «կայունություն» չափանիշները չեն կատարվել իրավական պահպանությունը տալու պահին. դ) (կետն ուժը կորցրել է 28.09.16 ՀՕ-145-Ն) ե) ցեղի անվանումը չեղյալ է համարվել իրավական պահպանություն ստանալուց հետո, իսկ հայտատուն կամ արտոնագրատերը չի առաջարկել համապատասխան անվանում: 2. Սելեկցիոն նվաճման իրավունքի պահպանությունը չի կարող վաղաժամկետ դադարեցվել սույն օրենքում սահմանված պատճառներից տարբերվող այլ պատճառներով: (18-րդ հոդվածը փոփ. 28.09.16 ՀՕ-145-Ն, 08.12.17 ՀՕ-233-Ն)

Հոդված 19.Պաշտոնական տեղեկությունների հրապարակումը 1. Լիազորված մարմինը պարբերաբար հրատարակում է սելեկցիոն նվաճման պաշտոնական տեղեկագիրը: Յուրաքանչյուր ամսվա կտրվածքով սույն մասով սահմանված տեղեկությունները, ինչպես նաեւ հայտարարված սելեկցիոն նվաճման նորության վերաբերյալ առարկությունները եւ հայտատուի ներկայացրած գրավոր հերքումները մինչեւ տվյալ ամսվան հաջորդող ամսվա տասը տեղադրվում են լիազորված մարմնի պաշտոնական կայքում եւ համարվում են պաշտոնապես հրապարակված տեղեկություններ: Սելեկցիոն նվաճման պաշտոնական տեղեկագրում հրապարակվում են հետեւյալ տեղեկությունները. ա) արտոնագրի եւ օգտագործման թույլտվության խնդրարկման հայտերը. բ) սելեկցիոն նվաճումների հավանություն ստացած անվանումները. գ) տվյալներ հայտատուների եւ հեղինակների մասին. դ) հայտերի վերաբերյալ որոշումները. ե) արտոնագիր տալու, արտոնագիրն ուժը կորցրած կամ անվավեր ճանաչելու վերաբերյալ որոշումները. զ) սելեկցիոն նվաճման իրավական պահպանության վերաբերյալ ընդունված որոշումները: 2. Արտոնագրման հայտերի եւ դրանց մասին ընդունված որոշումների վերաբերյալ տեղեկությունների հրապարակումից հետո յուրաքանչյուր անձ իրավունք ունի ծանոթանալ արտոնագրային հայտերի նյութերին: (19-րդ հոդվածը լրաց. 04.11.03 ՀՕ-29-Ն, 28.09.16 ՀՕ-145-Ն)

Հոդված 20.Արտոնագրային տուրքերը (հոդվածն ուժը կորցրել է 28.09.16 ՀՕ-145-Ն) Հոդված 21.Օտարերկրյա քաղաքացիների եւ իրավաբանական անձանց իրավունքները Օտարերկրյա ֆիզիկական եւ իրավաբանական անձինք Հայաստանի Հանրապետության մասնակցությամբ միջազգային պայմանագրերին համապատասխան կամ փոխադարձության սկզբունքով օգտվում են սույն օրենքով նախատեսված իրավունքներից ու կրում են պատասխանատվություն` Հայաստանի Հանրապետության քաղաքացիներին եւ իրավաբանական անձանց համահավասար: